Yohana 4 - Dilagano Disha ku Wanhu wose

Yesu ne mwanamuke musamalia

¹ Hambiya iMundewa yakamanye fina Mafalisayo hawahulika fina Yesu yakugolosa wefusa wengi na kuwabatisa kusuma Yohana. (ninga

² Yesu mwecho nghabatise nanga awefusa wakwe.)

³ Hakaleuka Samalia hoyoluta kahi Galilaya.

⁴ Haimwagila yalokele Samalia.

⁵ Hakafika ku kaya imonga ya Samalia ikwinangwa Sikali, habehibehi no mugunda Yakobo wo yamwingha imwanagwe Yusufu.

⁶ Chisima cha Yakobo hachuwa baho, Yesu kosoko hakasoka ne inhambo hakekala hasi baho hachisima. Hachuwa chigele cha saa ya mutandatu nhafi.

⁷ Hakeja mwanamuke Musamalia kunega meji, Yesu hoyomugamba, “Ninghe meji nunywe.”

⁸ Kosoko awefusa wakwe hawaluta ku ikaya kugula chakudiya.

⁹ Imwanamuke Musamalia yamugamba, “Yanhani agweye go Muyahudi, utase ameji ukwangu, ni mwanamuke we Chisamalia? Kosoko Wayahudi wasikuhanga na Wasamalia.”

¹⁰ Yesu hakamubidula, Nhanga umanyile ichinghwa che Mulungu no nani iyakukugamba, “Ninghe meji nunywe, hakuwa ukumutasa, imwene hakowa yakukwingha ameji ga uwumi.”

¹¹ Imwanamuke hoyomugamba, “Mukulu, kwechaka chinhu cha kunegela, ne chisima ni chitali, ukupatahi ago ameji ga uwumi?

¹² Agweye kwa mukulu kusuma iBaba yetu Yakobo, iyachighile ichima chino, na imwene imwecho hakonywa meji ge chisima chino, na wanagwe, na sawo sakwe?”

¹³ Yesu yamugamba Chila munhu yakunywa ameji gano yakwenda yone nghilu kahi,

¹⁴ ninga chila munhu iyakunywa ameji gonikumwingha nghakwenda yone nghilu ka! Ameji gaya gonikumwingha gakuwa kugati yakwe nhyoko ya meji gakubwiluka ku wumi wa majuwa gose.

¹⁵ Imwanamuke yamugamba, “Mukulu, ninghe niye ameji gano, uleke ninghone nghilu, kahi kwija hano kunega meji.”

¹⁶ Yesu hoyomugamba, “Luta kamwinange imulumako, mwije hano.”

¹⁷ Imwanamuke hakabidula nechaka mugosi, Yesu kamugamba, “kulonga ichawelu fougambile, Nechaka mugosi;

¹⁸ Kosoko hakuwa na wagosi washano, na ayuno yowinaye hambiya, si mulumako; aho nanga kulonga ichawelu.”

¹⁹ Imwanamuke yamugamba, “Mukulu nikona agweye kwa mugonesi.

²⁰ Awababa setu wafungaga mwitunda adino; amba nyeye mukugamba Yelusalemu no kunhu kokufugila.”

²¹ Mundewa Yesu yamugamba, “Go mwanamuke unihuwile niye, ichigele chikwija ichene awakufuga wasikufugila mwitunda dino kahi si Yelusalemu, mukwende mumufuge iBaba.

²² Anyeye mukufuga cho musimanyile, aseye chikufuga cho chimanyile, kosoko uhonya ukulawa kuWayahudi.

²³ Ninga ichigele chikwija, na hambiya chabahano, awakumufuga Mulungu chawelu wakumufuga iBaba mu muhe na chawelu, awo iBaba nowoyakuhananga wamufuge.

²⁴ Mulungu ni Muhe, nawo awakumufuga inogela wamufuge kwa Muhe na kwa chawelu.”

²⁵ Ayuya imwanamuke hakamugamba, “Nimanya fina Imasiya yakwija; (iyakwinangwa Kilisito); ma yakwija, yakayochones simbuli sose.”

²⁶ Yesu kamugamba, “Aniye nikulonga nagwe no nene.”

²⁷ Chimwande awefusa wakwe howokwija. Hawakisina kosoko yendeyosimulila ne mwanamuke, ninga hechaka yamusile Ukuhananga choni? Nhani ukulonga naye?

²⁸ Kamei imwanamuke hakaleka dibiga dyakwe, hakaluta kwikaya, yawagamba awanhu,

²⁹ Mwije, mulange munhu yanitamile ifinhu fyose fonigolose. Ayuno yakudaha kuwa no Kilisito?

³⁰ Hawalawa kunje ye kaya na wende womwijila imwene.

³¹ Ugele uwo awefusa wakwe wakuhananga yadiye, wakugamba, “Labi udiye!”

³² Ninga kawagamba, “Nina chakudiya ichene anyeye msichimanyile.”

³³ Kameyi awefusa wakiyusa wecho kwa wecho, Hena yumonga yamwigalile chakudiya?

³⁴ Yesu kawagamba, “I chakudiya changu ni kugolosa ifyene foyakwenda ayuya yanitumile, na kumalagisa ikasi yakwe.

³⁵ Mwina ulosi, ukugamba Ikali minyesi mine ukuwa ugele wokugola, ninga nikumutamilani, langisiseni imigunda; simhule sikangala ugele wokugola ufika!

³⁶ iyekugola yakuhokela digelo dyakwe, yakulunda figoligwe fiya ku uwumi wa majuwa gose; kwa neifo imunhu yahandile na yuya yakugola wakusekelela wose.

³⁷ Inonga ino ni chawelu, ‘Munhu yumwedu yakuhanda, munhu yumonga yakugola.’

³⁸ Hanimutumani kugola afiya ifyene fomusagolosele milimo; wamonga hawagolosa, anye mwingila mu milimo yawo.”

³⁹ Matewa ga Wasamalia mukaya iya wamuhuwila Yesu kosoko imwanamuke hakagamba, “Mwije mulange imunhu yanitamile ifinhu fyose fonigolose.”

⁴⁰ Kamei Awasamalia wakeje ukwakwe, howomutasa yekale nawo; hoyokwikala uko majuwa meli.

⁴¹ Na wengi lugano hawamwihuwila kosoko ya imbuli yakwe,

⁴² hakamugamba imwanamuke, Sikosoko ya simbuli sako du ilekile chihuwila, kosoko aseye chiwecho chimuhulika, na chimanya fina ayuno chawelu nao Mwihula we chilunga.

Yesu yakuhonya iMwana we mukulu yumonga

⁴³ Yakamale kwikala majuwa meli hoyoluta Galilaya.

⁴⁴ Kosoko Yesu mwecho hakalonga fina imugonesi nghakupata itunyo muisi yakwe imwecho.

⁴⁵ Nheifo yakeje Galilaya, awanhu wa Galilaya, howomuhokela, kosoko wonile gose agene goyagolose Yelusalemu ugele we dijuwa dikulu kosoko awene nawo hawaluta kusikukuu.

⁴⁶ Kahi Yesu hoyoluta ku Kana ya Galilaya, koyagaluse meji kuwa difai. Baho Kapelanaumu hahowa mukulu yumonga wa Selekali, imwene hakowa na mwanagwe mutamu.

⁴⁷ Hakahulike fina Yesu keja kulawa Uyahudi hata Galilaya, hoyaluta na kumutasa walutanye yakamuhonye mwanagwe, kosoko hakowa mutamu lugano, habehi na kufa.

⁴⁸ Yesu kosoko iyo hoyomugamba, “Munghaleka kona fitangilo na majumo muisi kuhuwila.”

⁴⁹ Imukulu yuya hoyogamba, “Mundewa wije imwanangu nghenati yafe.”

⁵⁰ Yesu hakamugamba, “Luta imwanago yakuhona!” Imunhu yuya hoyohuwila imbuli yoyalongile Yesu ukwake hoyaluta.

⁵¹ Foyalutage, imutogomi wakwe hakakitanganyila na kumutamila fina imwanagwe kahona.

⁵² Hakosa ichigele choyakongile kuwa mumi, howomugamba, “Digulo chigele cha saa mufungate, imhungo imuleuka.”

⁵³ iBabamunhu hoyogelegela fina ichigele chiya no chigele Yesu choyagambile, Imwanago yakuhona. Imwene imwecho hoyohuwila, we inyumba yakwe yose.

⁵⁴ Achino hachuwa chitangilo chakeli choyagolose Yesu yakoye kulawa Uyahudi na kuya Galilaya.