Yohana 3 - Dilagano Disha ku Wanhu wose

Yesu na Nikodemo

¹ Hambiya, heja howa na munhu yumonga wa Mafalisayo, yakwinangwa Nikodemo, mukulu wa Wayahudi.

² Munhu yuno yamwijila Yesu nechilo na kugamba, “Labi, chimanya gweye fina kwa mwalimu na kulawa kwa Mulungu, kosoko hechaka munhu yakudaha kugolosa fitangilo fina fino foukugoloa gweye, inghowa iMulungu nghehamwedu naye.”

³ Yesu hoyomubidula, “Chawelu chawelu nikukutamila, imunhu yanghaleka kwelekwa kwa usha, nghodaha kuwona undewa we Mulungu.”

⁴ Nikodemo yamugamba, “I munhu yakudaha kwelekigwa nhani yanghowa musehe? Yakudaha kwingila kahi munda mwe ing'ina na kwelekigwa?”

⁵ Yesu hakamubidula, “Chawelu, chawelu nikumutamilani imunhu yanghaleka kwelekigwa kwa meji na Muhe, ghodaha kwingila ku undewa we Mulungu.

⁶ Achiya chelekigwe kwa mutufi ni mutufi, na chiya chelekigwe kwa Muhe ni muhe.

⁷ Unghakisine kosoko nikugambile fina, yagila kwelekigwa kwa usha.

⁸ Imheho ikutowa foikwenda iyecho, mukuhulika dibumo dyakwe, ninga musikumanya ikulawa hoki kahi ikuluta hoki; nheifo nofoyuwile ku chila muunhu yelekigwe kwa Muhe.”

⁹ Nikodemo hakamugamba, “Yodahika nhani kuwa nheifo?”

¹⁰ Yesu yabidula yakugamba, “Agweye kwa mwalimu wa Isilaeli na simbuli sino nghusimanyile.

¹¹ Chawelu, chawelu nikukutamila fina, chikulonga adiya dyo chimanyile, na kukuhomelela kugaya gochonile, ninga nyeye musikuhokela uhomelesi wetu.

¹² Nghonaga nimutamileni simbuli sa muisi nanye musikuhuwila, mohuwila nhani ninghamutamilani simbuli si kulanga.

¹³ Kwechaka munhu wowose yakwilile kulanga ninga ayuya do yadululike kulawa kulanga iMwana wa Munhu.

¹⁴ “Kahi fina iMusa foyenula dijoka diya munyika, nheifo iMwana we Munhu kokwinuligwa.

¹⁵ Uleke chila munhu iyakumuhuwila yowe na uwumi wa majuwa gose.

¹⁶ Mulungu kachenda ichilunga lugano, hoyomulafa iMwanagwe iyumwedu du uleke chila munhu iyakumuhuwila yang'hagilile ninga yowe na uwumi wa majuwa gose.

¹⁷ Kosoko Mulungu nghamwigale iMwanagwe amuno muchilunga, uleke yachilamule ichilunga, ninga ichilunga chihonyigwe ne imwene.

¹⁸ Iyakumuhuwila imwene nghakuliganisigwa; inghakumuhuwila imwene kafulusa kuliganisigwa, kosoko nghadihuwile disina dye iMwana yumwedu we Mulungu.

¹⁹ “Auno no ulamusi, fina ujelu wija muchilunga awanhu howokwenda ichisa kusuma ujelu, kosoko sinhenda sawo hasuwa sihile.

²⁰ Kosoko chila munhu yakugolosa gehile yakuudesekela ujelu, kahi nghakwija ku ujelu sinhenda sakwe singhonigwe.

²¹ Ninga ayuya iyakugolosa ichawelu yakwija kuujelu, uleke yoneke hajelu fina kagolosa kwa Mulungu.”

Yesu na Yohana mubatisaji

²² Kulawa baho Yesu na wefusa wakwe hawaluta kuisi ya Uyahudi, hakasinda uko hamwedu nawo na kubatisa.

²³ Yohana naye yendeyobatisa, ako Ayinoni, habehi na Salimu kosoko uko hakuwa na meji mengi, awanhu wendewomulutila na kubatisigwa.

²⁴ Kosoko Yohana hakowa nghenati yagumigwe kuchifungo.

²⁵ Howolawanisa nyikusha mugati ya wefusa wa Yohana na Muyahudi yumonga kosoko ya usunhaji.

²⁶ Howomulutila Yohana na kumugamba, “Labi ayuya yowile nagwe umwambu wa Yolodani, wowahomelele, kabahano, yakubatisa, na wose wakumulutila imwene.”

²⁷ Yohana hakabidula, “I munhu ng'hakudaha kuwa na chinhu chochose ichene chonghenghigwe kulawa kulanga.

²⁸ Anye muwecho mukudaha kuhamelela, fina hanigamba, ‘Aniye siyo no Kilisito, ninga nigaligwa nimulongolele!’

²⁹ Iyenaye mutoligwa, no mutolaji. Imbwi yakwe we mutolaji, iyakwima na kumutegelesa, yakusekelela lugano foyakuhulika dijwi dye mutolaji. Kosoko iyo ichinyemi changu hambiya chimemelesigwa.

³⁰ Imwene yongeseke ninga aniye nihunguke.”

Iyakulawa kulanga

³¹ “Imwene iyekwija kulawa kulanga ni mukulu kusuma wose. Ayuya wa hachilunga ni munhu wa hachilunga na yakulonga simbuli sa hachilunga, ayuya yakulawa kuchanhya, kamuchanhya ya gose.

³² Yakuhomelela agaya goyonile na kugamelela na kugahulika, ninga hechaka iyakuhokela uhomelesi wakwe.

³³ Iyakuhokela uhomelesi wakwe yakufumilisa fina Mulungu ni chawelu.

³⁴ Kosoko iyatumigwe na Mulungu yakulonga simbuli sa Mulungu; kosoko Mulungu ng'hakulafa Muhe kwa chiliganiso;

³⁵ iBaba yakumwenda iMwana, naye kamulekela finhu fyose mumikono yakwe.

³⁶ Iyakumuhuwila iMwana kena uwumi wa majuwa gose; inghekwandamila simbuli sakwe nghakwenda yawone uwumi, ninga inyono ye Mulungu ikumwikalila.”