Yohana 21 - Dilagano Disha ku Wanhu wose

Yesu yakiyone kuwefusa mufungate

¹ Gakaloke majuwa makefu hakakiyonesa kahi kuwefusa wakwe habahali ya Tibelia; hoyokiyonesa nhafi.

² Simoni Petulo, Tomasi yekwinangigwa Ipasa, Natanaeli wa Kana ya Galilaya, awana wa Sebedayo, na wamonga wadatu wa wefusa wakwe hawowa hamwedu.

³ Simoni Petulo yawagamba, “Aniye nikuluta kulowa somba.” Hawamugamba, “Chikulutanya,” hawengila mungalawa; ninga ichilo chicho wasapatile somba ng'oo.

⁴ Fokwakongile kucha, Yesu hakema munghingi, awefusa wasatangile fina hakowa Yesu.

⁵ Yesu yawagamba, “Mowana mwina somba sosose?” Hawamubidula, hawagamba, “Ka!”

⁶ Hoyowagamba, “Kubiteni ulwafu ulwandi lwa kulume lwe ngalawa mukwenda musipate.” Baho howoukubita, kameyi lo hawasumigwa kuukwega, kosoko ya uwingi wa sisomba.

⁷ Imwifusa yuya iyendigwe na Yesu yamugamba Petulo, No Mundewa! Petulo yakahulike fina no Mundewa, hakafala sisuke sakwe, kosoko hakowa yasihambule ugele yakugolosa milimo, hakajumha kumeji.

⁸ Ninga awefusa wamonga howokwija ne ngalawa, wakukwega ulwafu lumemile sisomba, kosoko hasowile hatali kulawa kunghingi kifana nghanyo imwedu kulawa kunghingi.

⁹ Wakalawe kunje ya meji, howokona moto wa makala baho, muchanhya yakwe mwina somba, na mukate,

¹⁰ Yesu hoyowagamba, “Leleni sisomba simonga somulowile lulu baha.”

¹¹ Kosoko iyo Simoni Petulo hoyoluta kungalawa na kulukwega ulwafu kunghingi lumemile sisomba singhulu igana dimwedu makumi mashano na ndatu; kahi uwingi wose ninga ulwafu lusadegeke.

¹² Yesu yawagamba, “Mwije mudiye chisinhuka nguluule.” Hechaka kahi mwifusa wowose yagesile kumusa No nani gweye? Hawamanya no Mundewa.

¹³ Yesu yeja na kulonda umukate hoyowengha, na sisomba naso nheifiya.

¹⁴ Auno hauwa ugele wa kadatu wa Yesu kiyonesa kuwefusa wakwe yakafuluse kwinuka kulawa kuwafile.

Yesu na Petulo

¹⁵ Wakamale kudiya chakudiya cha nhosikusiku, Yesu hoyomugamba Simoni Petulo, “Simoni mwana wa Yohana, agwe ukunyenda kusuma wano?” Hoyomugamba, “Heye, Mundewa, kumanya fina nikukwenda.” Yesu hoyomugamba, “Ufinghe chakudiya ifikolo fyangu.”

¹⁶ Lwakeli kahi hoyomulonga, “Simoni mwana wa Yohana, ukunyenda?” Hoyogamba, “Heye, Mundewa, kumanya fina nikukwenda.” Yesu hoyomugamba, “Dima singholo sangu.”

¹⁷ Hoyomulonga kahi lwakadatu, “Simoni, mwana wa Yohana, ukunyenda?” Petulo hakona usungu kosoko yalongile naye lwakadatu, “Ukunyenda?” Na hoyomugamba, “Mundewa, kumanya fina nikukwenda!” Yesu homugamba, “Usinghe singholo sangu chakudiya.

¹⁸ Chawelu, chawelu, nikukutamilani fowowile mujelelo, wende ukiyoha gomwecho na kuluta koukuhananga; ninga foukuwa musehe, ukwenda ugolole imikono yako na munhu yungi kohutasa na kulongosa uhunhu ko nghukwenda kuluta.”

¹⁹ (Hakalonga nheifo konesa ni kwa difa dya nhani doyakayomutunyila Mulungu.) Sikahele siso hoyomugamba, “Nyandamile!”

Yesu ne mwifusa yumonga

²⁰ Petulo hoyobidula hoyomona imwifusa yumonga yakuwandamila, ayuya iyendigwe na Yesu, iyegamile muchifa chakwe ugele we chakudiya na yagambile, Mundewa no nani yakukusongesa?

²¹ Petulo yakamone hoyomulonga Yesu Mundewa yanhani imunhu yuno naye?

²² Yesu yamugamba, “Nghona nikwenda yekale mpaka ugele wonikuya inachoni ukwako? Nyandamile!”

²³ Inonga hayenela kuwandugu fina imwifusa yuno nghakufa, ninga Yesu nghalongile nheifo ukwakwe fina nghakufa, ninga, Honaga nikwenda ayuno yakale mpaka nuye ina choni ukwako?

²⁴ Ayono no mwifusa yakuhomelela simbuli sino; na chimanya fina uhomelesi wakwe ni chawelu. Kumalagisa.

²⁵ Ninga kwina mbuli nyingi soyagolose Yesu, kusigwa sose sandikigwe, hata Ichilunga chose sichowile chikudaha kwika ifitabu fyose fitulumwe.