Yohana 20 - Dilagano Disha ku Wanhu wose

Ichilalo chechaka chinhu

¹ Dijuwa dye inghonga dye dijuma, Maliamu Magidalena yekilawa kuluta chilalo, ugele kukali malisalisa, hoyokona fina diwe difingilisigwa kulawa muchilalo.

² Hakabilima na kuluta kwa Simoni Petulo, mwifusa yuya yumonga, yendigwe na Yesu, yawagamba, “Wamuleusa Mundewa muchilalo na chisimanyile wamwika hoki.”

³ Baho Petulo hoyolawa hamwedu na yuya mwifusa yumonga, howoluta kuchilalo.

⁴ Wabilima wose weli, ninga imwifusa yumonga hoyomujumha Petulo hoyokonga kufika kuchilalo;

⁵ hoyofunamana kusungilila kugati, hoyokona sisuke se bafuta sowile ukuya kugati, ninga nghengile kugati.

⁶ Kameyi Simoni Petulo keja yakumwandamila, hoyokwingila kuchilalo, hoyokona sisuke siya se bafuta suwile baho hasi,

⁷ ne chitambala chohigwe kwitwi nacho chabaho, fisunhile hamwedu na sisuke ichene cheimwene chikunjigwa.

⁸ Noho ayuya imwifusa yumonga, yakongile kufika hachilalo, naye hoyokwingila, hoyokona na kuhuwila;

⁹ kosoko hawowa wasinhati wamanye amawandiko, fina imwagila yenuke kulawa kuwafile.

¹⁰ Kameyi nowefusa wakwe howoleuka howoluta kusikaya sawo.

Yesu yakoneka kwa Maliamu Magidalena

¹¹ Maliamu hakema hanje ye chilalo yekulila, foyalilage yafunamana kulanga hasi ye chilalo;

¹² Hoyokona Malaika weli wena suke njelu; wekala howekigwe umutufi wa Yesu, yumonga ulwandi lwa kumatwi, yumonga ulwandi lwa kumigulu.

¹³ Hawamugamba, “Gomwanamuke nhani ukulila?” Naye hakawagamba; Kosoko wamuleusa Mundewa wangu, simanyile wamwika hoki.

¹⁴ Yakalonge nheifo, yabiduka na kumona Yesu yemile, ninga nghamanyile fina ni Yesu.

¹⁵ Yesu yamugamba, “Gomwanamuke ukulilila choni? Ukumuhananga nani?” Hakamanya nhagela nomwimilisi wa busitani, yamugamba, “Mukulu, honaga umuleuse nitamile koumwikile, nikudaha kumulonda na kumuleusa.”

¹⁶ Yesu hoyomugamba, “Maliamu!” Hakabiduka na kumugamba kwa Chiebulaniya “Laboni!” nong'amba, “Mwalimu.”

¹⁷ Yesu hoyomugamba, “Unghanikole, kosoko sinati nikwile kwa Babangu; ninga luta kawatamile wandugu sangu uwagambe nhafi, nikukwila kwe Babangu, na Baba yenu, kwe Mulungu wangu na Mulungu wenu.”

¹⁸ Maliamu Magidalena hoyoluta na kuwatamila awefusa Nimona Mundewa, na kuwatamila fina kalonga simbuli ukwakwe.

Yesu yakoneka kuwefusa wakwe

¹⁹ Chigele cha hegulo dijuwa didiya, dijuwa dye inghonga dye dijuma, imilango yose ihindigwe ahanhu howowile awefusa wakwe, kosoko ya kogoha Wayahudi, Yesu hakeja na kwima muchiligati yawo na kugamba, “Digaya dyuwe ukwenu.”

²⁰ Yakamale kulonga nhaifo, na kuwonesa imikono yakwe na lubafu lwakwe. Kameyi awefusa howosekelela wakamone Mundewa.

²¹ Yesu hoyowagamba kahi, Digoya dyuwe hamwedu nanye. Fina Baba foyenitumile niye, aniye nani nikumutumani nyeye.

²² Yakamale kulonga nheifo, hakawakehela, na kugamba, “Hokeleni Muhe Musunhile.

²³ Munghawalekelela wanhu uwihi wawo, wakuwa walekeleligwe.”

Yesu na Tomasi

²⁴ Hambiya, Tomaso wa awaya ikumi na weli, iyakwinangwa Ipasa, hakowa hechaka Yesu foyejile.

²⁵ Kameyi awayagwe howomutamila, Chimona Mundewa, Ninga mwene hoyogamba, “Ninghaleka kona mumiko yakwe singhofu se misumali, na kukwafa ne fidole fyangu isinghofu se misumi, na kwalabata no mukono wangu ulubafu lwakwe, sikwenda nihuwile ng'oo.”

²⁶ Gakaloke majuwa munane, awefusa wakwe hawowa kahi munyuma, Tomasi naye hakowa hamwedu nawo. Milango hayuwa ihindigwe, ninga Yesu hakeja na kwima muchiligati yawo, hoyogamba, “Digoya dyuwe hamwedu nanye.”

²⁷ Hoyomugamba Tomaso, Guma ichidole chako hano, ulange imikono yangu; na golola umukono wako, walabate ulubafu lwangu, unghowe munhu yechaka dihuwi, ninga iyakuhuwila.

²⁸ Tomasi hakabidula, Mundewa wangu na Mulungu wangu!

²⁹ Yesu hakamugamba, “Kuhuwila kosoko kunyona niye? Ibeka awaya awasonile ninga wakuhuwila.”

Isoko ye chitabu chino

³⁰ Yesu hakagolosa majumo mengi kumwande ya wefusa wakwe, agene gasuwile muchitabu chino;

³¹ ninga agano gawandikwa uleke muhuwile fina iYesu no Kilisito, iMwana we Mulungu, fina kwa kuhuwila muwe na uwumi wa majuwa gose umwakwe.