Yohana 2 - Dilagano Disha ku Wanhu wose

Ihalusi ya Kana

¹ Dijuwa dya kadatu hakuwa halusi Kana ya Galilaya, na ing'ina wa Yesu hakowa uko;

² Yesu naye hakagonekigwa na wefusa wakwe, kuhalusi.

³ Idifai ikahele, ing'ina wa Yesu hoyomugamba, “Wechaka difai.”

⁴ Yesu hoyogamba, “Go mwanamuke china choni aniye na gweye? Ichigele changu chisinati chije.”

⁵ Ing'ina hakawagamba awatogomi, “Goloseni chochose choyakutamilani.”

⁶ Baho hahowa mabiga mutandatu ga mawe, kosoko ya ijadi ya Wayahudi yo kunawa na kisunha, chila ibiga dikwingila madebe mane mpaka mtandatu nhafi.

⁷ Yesu hakawagamba, “Memeseni amabiga meji. Wamemesa topu.”

⁸ Kawagamba, “Negeni gamonga mumwigalile imukulu we halusi.” Kameyi howolonda.

⁹ Imukulu we halusi yakanomole ameji agagaluke difai, nghamanyile fina ilawahi (ninga awatogomi awanegile ameji gaya hawamanya), imukulu we halusi hakamwinanga imutolaji

¹⁰ hakamugamba, “Chila munhu yakulafa difai swanu kunghonga, kamei awanhu wanghowa wonywile lugano, yakulafa difai ihile, ninga agweye kwika difai swanu mpaka hambiya.”

¹¹ Achino, no chitangilo che inghonga, iYesu choyagolose mu Kana ya Galilaya, hoyokonesa ditunyo dyakwe; awefusa wakwe howomuhuwila.

¹² Ago gakahele, yadulika Kapelinaumu, ne ing'ina na wanduguse na wefusa wakwe; howokwikala uko kwa majuwa makefu.

Yesu yakwingila kwihekalu

¹³ iPasaka ya Wayahudi hayuwa habehi, Yesu hoyokwila mupaka Yelusalemu.

¹⁴ Mwihekalu hakona wanhu wakwambasa nghambaku sa sing'ombe, ngholo, na sinjiwa, na wakwasakanya mapesa wowile mumilimo yawo.

¹⁵ Kagolosa chiboko cha sigi, hakawalafa wose, hamwedu na singholo na sing'ombe, kunje ye dihekalu, hoyokwitila amapesa ga waya awende wokwasakanya, na kubidula di mesa sawo.

¹⁶ Hakawagamba waya awambasage si njiwa, Galeuseni gano ahano, musikudaha kuigolosa inyumba ye Babangu kuwa igulilo.

¹⁷ Awefusa wakwe howogelegela fina itulumigwa, Uwendo we nyumba yako wombulaga.

¹⁸ Awayahudi howomugamba; Chitangilo chaki cho ukuchonesa kwa kugolosa nhafi?

¹⁹ Yesu hakawabidula, Moleni Dihekalu dino, aniye kwa majuwa madatu nikudinula.

²⁰ Wayahudi wagamba, “Dihekalu dino dijengigwa kwa minyaka makumi mane na mutandatu, agwe ukudaha kudinula kwa majuwa madatu?”

²¹ Ninga imwene hakalonga dihekalu dyo umutufi wakwe.

²² Kosoko iyo yakenuke muchilalo, awefusa wakwe hawagelegela fina foyalongile; hawagahuwila matulumo na imbuli yoyalongile Yesu.

Yesu kumanya ifidoga fya wanhu

²³ Ugele foyowile Yelusalemu mwijuwa dikulu dye Pasaka matewa hagahuwila mwisina dyakwe wakone ifitangilo foyagolose,

²⁴ ninga imwene nghakihuwilisa ukwawo; kosoko imwene hakawamanya wose,

²⁵ kosoko hakawamanya wanhu wose nghahanange munhu wowose kuhomelela simbuli sa munhu; kosoko imwene imwecho hakamanya isuwile mugati ye munhu.