Yohana 19 - Dilagano Disha ku Wanhu wose

¹ Kamei Pilato hakamulonda Yesu na kumujola fiboko.

² Wasilikali hawaluka nghofiya ya miwa, na kumufasa mwiti, hawamufasa nghasu dunghudunghu;

³ na kumwijila, wakugamba, “Bahoni, Mundewa wa Wayahudi! Na kumutowa ne makofi.”

⁴ Pilato yalawa kunje kahi, na kugamba, “Langeni nikumwigala kunje ukwenu, uleke mumanye fina sonile dyodyose dihile mwi munhu yuno.”

⁵ Kameyi Yesu hakalawa kunje, yafalile ikofiya ye miwa, na dijoho didunghudunghu. Pilato yawagamba, “Mulangeni imunhu.”

⁶ Awatambiki na watogomi wakamone, hawajoja wakugamba musambaseni, musambaseni mumusalaba! Pilato yawagamba, “Mulondeni anyeye muwecho mukamusambase mumusalaba, kosoko sikona chochose choyabanile.”

⁷ Wayahudi hawamugamba, “Aseye china dilagiso, na kwa dilagiso didyo kanogela kufa, kosoko kakigolosa kuwa mwana we Mulungu.”

⁸ Pilato yakahulike simbuli siso hakagendelela kuwa na itisi lugano;

⁹ hakengila kahi ku Plaitolia na kumugamba Yesu, “Kulawa hoki gweye?” Ninga Yesu nghamubidule.

¹⁰ Kamei Pilato hoyomugamba, “Nghukulonga naniye? Nghukumanya fina nina udaha wa kukulekela na nina udaha kukusambasa?”

¹¹ Yesu yamubidula, Nghowile ukudaha kuwa na udaha muchanhya yangu niye honaga nghwinghigwe kulawa kuchanhya, kosoko iyo ayuya iyanigale niye ukwako kena uwihi mukulu.

¹² Mu dino Pilato hoyohananga kumulekela, ninga Wayahudi hawajoja, Unghamulekela imunhu yuno agweye nghwi imbuya na Kaisali; chila munhu yakigolosa Mundewa, yakuwa chinyume na Kaisali.

¹³ Pilato yakahulike simbuli siso, hakamulafa Yesu kunje, hoyokwikala mudigoda dya ulamusi, ahanhu hakwinangigwa Sakafu ya mawe, Chiebulaniya Gabata.

¹⁴ Haduwa dijuwa dya kutandila ge Pasaka; hayuwa kifana saa ya mutandatu nhafi. Hoyowagamba Wayahudi Langeni Mundewa wenu!

¹⁵ Hawajoja, Muleuse, muleuse, musambase! Pilato hakawagamba, “Nimutungike mumusalaba iMundewa wenu?” Watambiki wakulu howobidula, “Chechaka Mundewa ninga Kaisali.”

¹⁶ Kameyi hoyomulafa ukwawo yatungikigwe mumusalaba.

Yesu yakusambasigwa mumusalaba

¹⁷ Baho howomulonda Yesu, hoyolawa kunje, yenule umusalaba wakwe imwecho, ku ahanhu hakwinangigwa iguha dya itwi, ahakugambigwa Goligota Chiebulaniya.

¹⁸ Baho hawamutundika hamwedu naye wamonga weli, yumwedu chila ulwandi na Yesu hagatigati yawo.

¹⁹ Pilato kahi hakandika diwandiko na kudika mumusalaba; dikugamba Yesu wa Nasaleti Mundewa wa Wayahudi.

²⁰ Wengi wa Wayahudi howosoma diwandiko didyo, kosoko ahanhu hoyatungikigwe Yesu hahowe habehi ne ikaya; na hadiwandikwa mu Chiebulaniya, Chilatini, na Chiyunani.

²¹ Awakulu wawatambiki wa Wayahudi hamugamba Pilato, Unghawandike, Mundewa wa Wayahudi, nanga imunhu yuno kagamba Aniye no ni Mundewa wa Wayahudi.

²² Pilato hakabidula, Goniwandike niwandika.

²³ Wasilikali wakamale kumusambasa hawalonda sisuke sakwe howosigawa filungo fine, chimwedu kwa chila musilikali; na dijoho dyakwe. Ninga, dijoho didyo haduwa chaka mushono, ninga dilukigwa kulawa kuchanhya mpaka hasi;

²⁴ Howokigamba, “Chighadidege, ninga chiditowele kula, dyuwe dyani.” Hayuwa nheifo uleke Mawandiko gamemelesigwe, “Hawagawa sisuke sangu mugati yawo, na isuke yangu howoyitowela kula.”

²⁵ Afo nofowagolose wasilikali. Ninga habehi na musalaba hawema ing'ina wa Yesu, ne lumbudye we ing'ina wa Yesu, na Maliamu Magidalena.

²⁶ Yesu yakamone ing'ina, ne mwifusa yuya woyamwendage, kema habehi naye, hoyomugamba ing'ina, Mudala, mulange imwanago.

²⁷ Kamei hoyomulonga ayuya imwifusa, Mulange ing'inako! Kulawa isaa iya imwifusa yuya hoyomulonda ukaya ukwakwe.

Difa dya Yesu

²⁸ Hanyuma yakwe Yesu yakamanye fina gose hambiya gahela, hoyolonga (kumemelesa matulumo), “Nikona nghilu.”

²⁹ Dibakuli dimemile siki haduwa baho; howolonda sifongo howoyifabika, mudibali dina siki howoyisomeka mulusito howomwikila kumulomo.

³⁰ Kameyi Yesu yakaihokele isiki yiya, hoyogamba, “Ihela!” Hoyofunama ditwi dyake hoyolafa ichidoga chakwe.

Yesu yakuhomigwa mugoha

³¹ Kosoko dyowile ijuwa dya kiyandaa, uleke imitufi inghasigale mumusalaba dijuwa dye sabato (kosoko isabato haduwa ijuwa ikulu lugano), Wayahudi howomufasa Pilato imigulu yawo ibenigwe, na waleusigwe.

³² Wasilikali howokwija, homubena migulu wa kunghonga na yumonga yatungikigwe mumusalaba hamwedu naye;

³³ ninga wakeje kwa Yesu hawona fina kafulusa kufa wasabanile migulu yakwe.

³⁴ Ninga yumwedu wa wasilikali hoyomudoma halubafu na mugoha, na chimwande hoilawa sakame na meji.

³⁵ Ayuya iyonile kahomelela, uhomelesi wakwe ni wa chawelu uleke anye nanye muhuwile.

³⁶ Kosoko, simbuli sino sigoloseka uleke mawandiko gamemelesigwe, Kahi diguha dyakwe disikubenigwa.

³⁷ Na kahi diwandiko dimonga dikugamba, “Wakawomulanga imwene wowamudomile.”

Amasiko ga Yesu

³⁸ Gakahele gano Yusufu Alimataya yowile mwifusa wa Yesu, kwa chifiso, kosoko yakogoha Wayahudi hakamutasa Pilato yawulonde umutufi wakwe, Pilato hakafumila. Kwa nheifo hakakwija na kuulonda na kuuleusa umutufi wa Yesu.

³⁹ Nikodemo naye, ayuya yejile kwa Yesu nechilo, hoyokwija kegala muhanganiso wa manemane na wudi kifana latili igana dimwedu nhafi.

⁴⁰ Howoulonda umutufi wa Yesu, na kumoa musanda ye suke nyelu ya bafuta na manukato fina Wayahudi fowasowele mumasiko gawo.

⁴¹ Ahanhu haya hoyatungikigwe mumusalaba hahowa na busitani, na mubusitani iyo chilalo chisha chisinati chikigwe mutufi wa munhu wowose

⁴² Kosoko ya dijuwa dya Wayahudi dya kiyandaa na kosoko ichilalo chiya chowile habehi, howomusika Yesu umo.