Yohana 18 - Dilagano Disha ku Wanhu wose

Kukoligwa kwa Yesu

¹ Yesu yakamale kulonga simbuli siso hakaleuka na kuloka ichikolongo cha Keduloni, uko hakuwa na busitani, Yesu na wefusa wakwe howokwingila mubusitani.

² Hambiya, Yuda ayuya yamusongese, hakahamanya ahanhu haya; kosoko Yesu hakasowela kuluta baho na wefusa wakwe.

³ Kamei Yuda hakalonda chitewa cha wasilikali, na watogomi kulawa ku makuhani wakulu, na Mafalisayo howowalutila wena na mwenje na mamuli na filama.

⁴ Yesu, yakamanye gose agowile kumwande yakwe, yekilafanisa kumwande ya wose, na kuwagamba, “Mukumulangisa nani?

⁵ “Hawamubidula Yesu wa Nasaleti.” Yesu hawagamba, “No niye, Yuda, iyamusongese, hakema hamwedu nawo.”

⁶ Yakawagambe, “No niye hawoya chisengelenyuma na kugwa hasi.”

⁷ Kahi hakawosa, “Mukumuhananga nani?” Hakagamba, “Yesu wa Nasaleti.”

⁸ Yesu hakawagamba, “Nimutamilani fina no niye,” hambiya, “Nghona mukunihananga niye, awanhu wano walekeni walute.”

⁹ Aino hayuwa kumemelesa imbuli yoyalongile, “Mu waya wowaninghile, simwagilise hata yumwedu.”

¹⁰ Baho Simon Petulo, yowile na dipanga, hakadikwega na kumudumula inghutwi yo kulume imutogomi we mutambiki mukulu. Yenangwa Maluku.

¹¹ Yesu hakamugamba Petulo, “Yuwisa dipanga dyako muyala yakwe; nileke kunywe ichikombe iBaba choyanyinghile?”

Yesu kumwande ya Anasi

¹² Baho awasilikali we Chilumi na wakulu wa Wayahudi hawamukola Yesu, na kumoha.

¹³ Kunghonga hawamwigala kwa Anasi; kosoko hakowa mukwewe wa Kayafa, yowile kuhani mukulu umwaka uya.

¹⁴ Hayuwa Kayafa imwene yejayalonga kuwayahudi fina inogela munhu yumwedu yafe kosoko ya wanhu.

Petulo yakumukana Yesu

¹⁵ Simoni Petulo hakamwandamila Yesu, na mwifusa yumonga. Kosoko imwifusa yuya yamanyike ne kuhani mukulu hakengila kwi balasa dye kuhani mukulu hamwedu na Yesu,

¹⁶ ugele wuwo Petulo hakema hanje hamulango, kwa nheifo imwifusa yuya yamanyike na kuhani mukulu, hakaluta kunje na kulonga ne mundele yuya yakwimilisa umulango, hakamukola Petulo yengile.

¹⁷ Imundele yuya yakwimilisa mulango yamugamba Petulo, “Agwe nagwe nghwi yumwedu wawo wa wefusa we munhu yuno?” Hoyogamba, “Ka nghana.”

¹⁸ Hambiya, awatumishi na wakulu hawagolosa moto wa makala, kosoko hakuwa na mheho, na hawema wakotela umoto; iPetulo hamwedu nawo, yemile naye yakotela umoto.

Imutambiki Mukulu yakumusa Yesu

¹⁹ Mutambiki mukulu hoyomusa Yesu muchanhya ya wefusa wakwe na mafuso gakwe.

²⁰ Yesu, hoyomubidula, “Nilonga ne chilunga chimesomeso, majuwa gose nifusa mumasinagogi na mudihekalu, hawakitang'anyila Wayahudi wose; Silongile chochose kwa chifiso.

²¹ Nhani ukunyusa niye? Wose awano, awanihulike, hanilonga nawo choni; wamanya hanilonga choni.”

²² Yakalonga nheifo, imutogomi yumonga yemile habehi naye hoyomutowa Yesu kofi na mukono wakwe, yakugamba, “Afo nofoukumubidula kuhani mukulu?”

²³ Yesu, hoyomugamba, “Hona nilongile fibi, homelela imbuli ihile; ninga hona nilongile fiswanu, choni cho ukunitowela?”

²⁴ Anasi, baho hoyomutuma yohigwe kwa Kayafa kuhani mukulu.

Petulo yakumukana Yesu keli

²⁵ Baho Petulo hakowa yemile yokotela moto. Hawamugamba, “Agweye nagwe nghwi yumwedu wa wefusa wakwe? Hakekana, yagamba Ka nghana!”

²⁶ Yumonga wa watogomi wa kuhani mukulu munduguse wa yuya imunhu yadumuligwe inghutwi na Petulo, hakamusa, “Si hanikona kubusitani hamwedu naye?”

²⁷ Petulo kahi hakakana, chimwande dijogolo hodikwika.

Yesu kumwande ye Pilato

²⁸ Hawamwigala Yesu kulawa kunyumba ya Kayafa mpaka ku Plaitolia. Hayuwa nhosikusiku. Awene awecho howoleka kwingila ku Plaitolia, uleke wanghachafuke, ninga wadahe kudiya Pasaka.

²⁹ Pilato hakalawa kunje kowowile, na kuwagamba, “Mwina mbuli yoni yomukumusongesa imunhu yuno?”

³⁰ Hawamubidula, “Nhanga imunhu yuno yechaka gehile goyagolose, chisowile chikumwigala ukwako.”

³¹ Pilato hakawagamba, “Mulondeni nyeye muwecho na mumulamule kwa malagiso genu.” Awayahudi hawamugamba, “Siyo nheifo, aseye chichaka udaha ilagiso wa kumukoma munhu.”

³² Aino hayuwa kumemelesa imbuli yoyalongile Yesu konesa yakwenda yafe kwa ifa dyaki.

³³ Pilato hakengila ku Plaitolia hakamwinanga Yesu kahi, yamugamba, “Agweye no go Mundewa wa Wayahudi?”

³⁴ Yesu yamubidula, “Simbuli sino ukulonga du agweye go mwecho, ama kwina wamonga wakutamile muchanhya ya niye?”

³⁵ Pilato yabidula, “Ani na Muyahudi? Ditaifa dyako gomwecho na makuhani wakulu nowakwigale ukwangu; kugolosa choni?”

³⁶ Yesu hakabidula, “Undewa wangu si wechilunga chino; nanga undewa wangu wowile we chilunga chino, awatumishi wangu howowa wakunilewelesa na Wayahudi kunihonya ne mikono ya Wayahudi, ninga undewa wangu si wa chilunga chino.”

³⁷ Pilato hakamugamba, “Nong'amba gweye kwa Mundewa?” Yesu yabidula, “Kuilonga aniye na Mundewa.” Kosoko iyo hanyelekigwa na kosoko iyo hanija kuchilunga, kuhomelela iichawelu. “Chila munhu we ichawelu yakuhulikisa dijwi dyangu.”

³⁸ Pilato yamugamba, “I chawelu no choni?” Yakalonge nheifo, hoyoluta kunje ku Wayahudi kahi, na kuwagamba, “Sikona wihi mwi munhu yuno.

Yesu yekuliganiswa yakomigwe

³⁹ Ninga musowela fina ugele we Pasaka nimudoholeleni munhu nyumwedu; Togoleni mokwenda mumudoholeni iMundewa wa Wayahudi?”

⁴⁰ Hawenula majwi gawo, kahi, Siyo yuno, ninga Balaba, Hambiya Balaba hakowa muhiji yakuhija kwa ludole.