Yohana 17 - Dilagano Disha ku Wanhu wose

Yesu yakuwatasila awefusa wakwe

¹ Yesu yakamale kulonga simbuli siso, hoyokwinula ameso gakwe kulanga na kugamba, “Baba, ugele ufika umutunye iMwanago uleke iMwana naye yakutunye gweye,

² kosoko gweye ukumwingha udaha muchanhya ya wose wene mutufi, yawenghe uwumi wa majuwa gose awaya wo umwinghile.

³ Na uno no uwumi wa majuwa gose, fina wakumanye gweye go Mulungu yumwedu we chawelu ne Yesu Kilisito imwene wo umutumile.

⁴ Nikutunya muchilunga, nikamale umulimo wa wanitumile nigolose;

⁵ hambiya Baba, unitunye kumwande yako na ditunyo dyonowile nadyo hamwande yako na didunyo dyonowile hamwedu nagweye ugele ichilunga chisinati chumbigwe.

⁶ “Nidigolosa disina dyako dimanyigwe wowaninghile kulawa kuchilunga. Hawowa wako, houningha niye. Wagolosa fina imbuli yako foikulonga,

⁷ na hambiya wamanya fina chila chinhu chowaninghile chikulawa ukwako.

⁸ Niwengha imbuli iya yowaninghile niye, na waihokela; wamanya chawelu nilawa ukwako, na wakuhuwila fina hakunituma.

⁹ “Nikuwatasila; sikuchitasila ichilunga ninga awaya awene wouninghile, kosoko ni wako;

¹⁰ awangu wose wako, na awako wangu, na nikutunyigwa mugati yawo.

¹¹ Na hambiya si umuno kahi muchilunga, ninga awene wamuno muchilunga, aniye nikwija ukwako. Baba musunhile, uwakole mudisina dyako, dyouninghile uleke wowe na umwedu, kifana seye fochimwedu.

¹² Fonowile hamwedu du nawo, haniwakola mudisina dyako dyo waninghile, niwemilila hachaka yagilile hata yumwedu nanga imwana wo kwagilila, uleke matulumo gamemelesigwe.

¹³ Ninga hambiya nikwija ukwako; na simbuli sino nikusilonga muchilunga, uleke ichinyemi changu chimemelesigwe mugati yako.

¹⁴ “Niwengha imbuli yako; ichilunga chiwasula kosoko awene si we chilunga, fina niye fo si we chilunga.

¹⁵ Sikutasa fina uwaleuse muchilunga, ninga uwemilile na yuya iyehile.

¹⁶ Awene si wechilunga fina niye fo si wechilunga.

¹⁷ Uwasunhe ne chawelu, imbuli yako no chawelu.

¹⁸ Fina agweye fowanitumile muchilunga, ani nani nheifiya niwatuma muchilunga.

¹⁹ Na kosoko yawo nikilafa nimwecho, uleke nawo wowe wakilafile muchawelu.

²⁰ “Sikuwatasila awano du, ninga na awakwenda wahuwile kosoko ye imbuli yawo,

²¹ uleke wowe na umwedu, fina agweye, Baba, fowuwile mugati yangu, na niye mugati yako, awene nawo wowe mugati iyetu, uleke ichilunga chihuwile fina agweye nounitumile.

²² Ditunyo dyouninghile niwengha awene, uleke wowe na umwedu fina aseye fochina umwedu:

²³ Aniye mugati yawo na agweye mugati yangu, uleke wakangale muumwedu, uleke ichilunga chimanye fina agweye kunituma na kuwenda ifyene fyo ukunyenda niye.

²⁴ “Baba! Nikwenda, awaya awene wo uninghile, wowe hamwedu nani baho honyuwile, wadyone ditunyo dyangu dyo uninghile kwa uwendo wako ukwangu ugele ichilunga chisinati chumbigwe.

²⁵ Baba ni wachawelu, ichilunga chisikumanyile, ninga aniye nikumanya; na wano wamanya fina hakunituma.

²⁶ Niwatamila disina dyako, na nikwenda nigendelele kuwatamila, uleke uwendo uwene wo ukunyenda nawo uwe mugati yawo, na niye nuwe mugati yawo.”