Yohana 16 - Dilagano Disha ku Wanhu wose

¹ “Nimutamilani sose sino uleke munghaleke dihuwi dyenu.

² Wakumuwingani mumasinagogi chawelu, ichigele chikwija ichene wowose yuya yakumukomani yakona fina yakumutogomela Mulungu itunyo.

³ Na wakwenda wagolose nheifo kosoko wasimumanyile iBaba na niye nheifia.

⁴ Ninga nilonga sino ukwenu, ugele nomoo ukwija mugelegele fina hanimutamutamilani.” “Salongile simbuli sino kulawa kunghonga kosoko hanyuwa hamwedu nanye.

Umilimo wa Muhe Musunhile

⁵ Ninga hambiya nikuluta ukwakwe iyanitumile; hechaka munhu yekunyusa, ukwijahe?

⁶ Ninga kosoko nilongile simbuli sino ukwenu, usungu umema mufidoga fyenu.

⁷ No nheifo, nikumutamilani ichawelu: Ni fiswanu kwa ulwandi ulwenu fina nikuleuka, kosoko ninghaleka kuleuka, Imulolesi nghakwija ukwenu; ninga ninghaluta nikwenda nimwigale.

⁸ Ugele woyekwija, yakuchonesa ichilunga muchanhya ya uwihi, ichawelu, na kuliganiswa.

⁹ Muchanhya ya uwihi kosoko wasanihuwile;

¹⁰ muchanhya ya chawelu kosoko nikuluta kwa Baba, na musikwenda munyone kahi;

¹¹ muchanhya yo kuliganiswa kosoko, imukulu we chilunga chino kaliganiswa.

¹² “Nina finhu fingi fya kulonga ukwenu, ninga musikudaha kufihokela hambiya.

¹³ Nghona iMuhe we chawelu yakwija, yakayomulongosani kuchawelu chose; nghakwenda yalonga kwa udaha wakwe imwecho, ninga sose soyakuhulika nosoyakulonga, na yakumutamilani ifinhu fikwija ugele fisinati fije.

¹⁴ Kanitunya niye, kosoko yakulonga ifyangu na kumutamilani nyeye.

¹⁵ Fose foyenafyo iBaba ni fyangu, kosoko iyo nigamba yakulonda ifyangu, na kumutamilani anyeye.”

Usungu ne chinyemi

¹⁶ “Chipisi chidodogi musinyona, kahi chipisi chidodogi, monyona.”

¹⁷ Wefusa wakwe wamonga hawakiyusa, “Choni chichi cho yakulonga ukwetu, ‘Chipisi chiguhi, monyona; na kosoko nikuluta kwa Baba?’

¹⁸ Hawagamba, ‘Yakulonga choni foyakugamba, chipisi chiguhi?’ Chisikumanya choyakulonga.”

¹⁹ Yesu hakamanya fina wakwenda wamuse; yawagamba, “Achino nochomukiyusa, fina chonikulonga choni ma nigamba chipisi chiguhi musinyona na kahi chipisi chiguhi monyona?

²⁰ Chawelu chawelu nikumutamilani, molila na kuhongesa, ninga ichilunga chosekelela; mokuwa na usungu, ninga usungu wenu wobiduka kuwa chinyemi,

²¹ Imwanamuke nghonaga yakweleka, kena usungu, kosoko ichigele chakwe chifika, ninga yanghamala kweleka ichali, nghakugelegela kahi usungu uya kosoko ye chinyemi fina ichali chelekigwa muchilunga.

²² Kosoko mwina usungu hambiya, ninga namonani hanyuma na fidoga fyenu fokuwa na chinyemi, hachaka yakudaha kuleusa ichinyemi chenu.

²³ Dijuwa didyo musikuwa na soko ya kusa chinhu ukwangu. Chawelu chawelu nikumutamilani munghamutasa Baba chinhu chochose mwisina dyangu komwinghani.

²⁴ Mupaka hambiya musitasile chinhu chochose mudisina dyangu; taseni, mohokela, ichinyemi chenu chimeme.”

Kukusuma Ichilunga

²⁵ “Nilonga sino ukwenu kwa mbasi; Ichipisi chikwija, ugele uwene sikulonga nanye kwa mbasi kahi, ninga kumutamilani chimesomeso muchanhya ya Baba.

²⁶ Dijuwa dyo mukamutasa mudisina dyangu na sikugamba fina nikanimutasilani kwa Baba;

²⁷ kosoko iBaba imwecho yekumwendani, kosoko nyeye munyenda niye na muhuwila fina nija kulawa kwa Baba.

²⁸ Hanija kulawa kwa Baba, na nija kuchilunga; kahi, nikuchileka ichilunga; na kuluta kwa Baba.”

²⁹ Awefusa wakwe hawagamba, “Haa, hambiya ukulonga chimeso meso si kwa mbasi.

³⁰ Hambiya chimanya fina kumanya finhu fyose, kwechaka soko ya munhu wowose kukusa, kwa nheifino chikuhuwila fina hakulawa kwe Mulungu.”

³¹ Yesu yawabidula, “Hambiya nohomukuhuwila?

³² Ichipisi chikwija, chawelu, chija, ugele womukwenda mukiyagale, chila munhu ukaya ukwakwe, na monileka niye nimwene; ninga, si imwene; kosoko iBaba kahamwedu nani.

³³ Nilonga sino ukwenu, uleke umwangu muwe na digoya. Muchilunga mwina magayo; ninga musangalale aniye nichisuma ichilunga.”