Yohana 15 - Dilagano Disha ku Wanhu wose

Yesu musabibu wa chawelu

¹ “Aniye no ni musabibu wa chawelu, na iBabangu no mulimi.

² Chila inhambi idisikweleka, yakudileusa, na chila inhambi idikweleka mamudyo yakudihungulila uleke digendelele kweleka lugano.

³ Anyeye mufulusa kwela kosoko ye imbuli yonilongile ukwenu.

⁴ Ikaleni mugati iyangu, na niye mugani yenu. Fina dinhambi fodisikudaha kweleka diimwene, ikuhanangigwa dikale mumusabibu, anye nanye nheifo musikudaha kweleka munghaleka kwikala u mwangu.

⁵ “Aniye no ni musabibu, anyeye no mumanhambi. Iyakwikala mugati yangu, na niye mugati yakwe, no yuyo iyakweleka mamudyo mengi, kosoko munghaniswela musikudaha kugolosa chochose.

⁶ Imunhu nghona ngakwikala umwangu, yakutagigwa kunje kifana itambi na kunyala; na matambi gakulundigwa, na kukubititigwa mumoto na kusomigwa.

⁷ Munghekala umwangu, na simbuli sangu singhekala mugati yenu, taseni chochose chomukuhananga, na mukwenda mugoloseligwe.

⁸ Kwa nheifo iBaba yakutunyigwa, kosoko mukweleka mamudyo mengi, mukiyonesa chawelu fina mwa wefusa wangu.

⁹ Fina iBaba foyanyendile ani, nani nofonimwendileni; mugendelele kwikala mu wendo wangu.

¹⁰ Munghagakola amalagiso gangu, mwukwenda mugendelele kwikala mu wendo wangu, fina niye fonikolile amalagiso ga Baba na kwikala mu wendo wakwe.

¹¹ “Simbuli sino nisilonga ukwenu uleke ichinyemi changu chuwe ukwenu, uleke ichinyemi chenu chimemelekele.

¹² Adino no dilagiso dyangu, mukiyende fina aniye fonimwendileni anyeye.

¹³ Kwechaka wendo mukulu kusuma uno, we imunhu kulafa uwumi wakwe kosoko ya wambwiya sakwe.

¹⁴ Anyeye mwawambwiya sangu honaga mukugolosa fonimulagiseni.

¹⁵ Sikuwenanga kahi imutogomi kosoko imutogomi nghamanyile imukulu wakwe yakugolosa choni, ninga nimwinangani nyeye wambwiya sangu, kosoko gose gokunihulike kulawa kwa Baba niwatamilani.

¹⁶ Sinyeye mwanisagule, ninga aniye nonawasaguleni na kuwegala mulute mukeleke mamudyo na mamudyo genu gagendelele, uleke chochose chomukumutasa iBaba mudisina dyangu yamwingheni.

¹⁷ Dilagiso dyangu nodino, mukiyende.”

Ulusulo lwe chilunga

¹⁸ “Ichilunga chinghamusulani, mugelegele fina hachikonga kunisula niye.

¹⁹ Munghowa wanhu we chilunga, ichilunga chikumwendani kosoko mwawanhu wakwe. Ninga hanimusagulani kulawa muchilunga chino, anye mu si wanhu we chilunga; nochileka ichilunga chikuwasula.

²⁰ Mugelegele, imbuli yonamutamileni, ‘Imutumishi si mukulu kusuma imukulu wakwe, nghonaga niye hawanisambase, womusambasani na nyeye, nghona waikolile imbuli yangu,’ wakola iyenu nayo.

²¹ Ninga wowagolosela gose gano kosoko yangu, kosoko wasimumanyile ayuya iyanitumile.

²² Nanga sejile nakulonga nawo, hawowa wakuwa chaka wihi; ninga hambiya wechaka chinhu cha kuwalongela, kosoko yo uwihi wawo.

²³ Ayuya iyakunisula niye yakumusula na Baba neifia.

²⁴ Nhanga gagolose muchiligati yawo imilimo yene hechaka wowose yakudaha kugolosa, wasowile wakuwa na wihi, ninga hambiya wona na wanisula niye hamwedu na Baba.

²⁵ Kukumemelesa imbuli itulumigwe mwilagiso dyawo, ‘Wanisula chaka.’

²⁶ “Ninga, nghona Imulolesi yakwija, wonikwenda nimwigale kulawa kwa Baba, Muhe we chawelu, iyakulawa kwa Baba, yakwenda yowe muhomelesi wangu;

²⁷ anye nanye mwa wahomelesi, kosoko hamuwa hamwedu na niye kulawa kunghonga.”