Yohana 14 - Dilagano Disha ku Wanhu wose

Yesu njila yokulutila kwa Baba

¹ “Mughadasike mufidoga fyenu; muhuwileni Mulungu, nihuwileni na niye.

² Munyumba ya Baba mwina fibuha fingi; nanga si nheifo hanuwa nikumutamilani fina nikamwikilani ukalo?

³ Ninghaluta na kumwikilani ukalo, nokwija niwalondeni chilutanye ukwangu, uleke honuwile niye anye nanye muwe baho.

⁴ Na muimanya injila yonikulutila.”

⁵ Tomasi hoyomugamba, “Mundewa chisimanyile koukuluta choimanya nhani injila?”

⁶ Yesu hoyomugamba, “Aniye no ni njila, ne chawelu no uwumi; kwachaka munhu yakwija kwa Baba inghakulokela ukwangu.

⁷ Nanga unimanyile niye hakuwa u kumumanya ne Babangu nheifiya; hambiya mumumanya na mufulusa kumona.”

⁸ Filipo hoyomugamba, “Mundewa, chonese iBaba noyochikuhananga du chokwiguta.”

⁹ Yesu hoyomugamba, “Nikala nagwe majuwa gose gano, ninga agwe hunimanyile Filipo? Iyanyonile niye kamona ne Baba; ukudaha nhani kugamba, chonese Baba

¹⁰ Nghukuhuwila fina aniye na mugati ya Baba na Baba kamugati yangu? Simbuli sonikulonga ukwenu sikulonga kwa udaha wangu; ninga iBaba yowile mugati yakugolosa milimo yakwe.

¹¹ Huwileni, aniye na mugati ya Baba na Baba kamugati iyangu; hona si nheifo munihuwile kosoko ye milimo iyeecho.

¹² Huwileni, huwileni nikumutamilani, imunhu iyakunihuwila imilimo yonikugolosa, niye yakwenda yagolose kahi yakudaha kugolosa mikulu kusuma ino, kosoko nikuluta kwa Baba.

¹³ Chochose chomukutasa kwe disina dyangu, nigolose, uleke iBaba yatunywigwe mu iMwana;

¹⁴ Munghatasa chinhu chochose mu disina dyangu nikwenda nigolose.”

Dihuwiso dyo Muhe Musunhile

¹⁵ “Mughanyenda, mukukola malagiso gangu.

¹⁶ Na nikumutasa Baba, yakwenda yamwigheni mutasi yungi, yekale nanyi majuwa gose.

¹⁷ No Muhe we chawelu, imwene ichilunga chino chisikudaha kumuhokela; anye mukumumanya, kosoko yakwikala hamwedu nanye na yakuwa kugati yenu.

¹⁸ Sikumulekani mwi wemwene; mukumwijilani.

¹⁹ Ninga chipisi chiguhi ichilunga chisikwenda chinyone kahi, ninga anyeye mukweda munyone; kosoko niye ni mumi, anye nanye mukuwa womi.

²⁰ Dijuwa dyo, mukamumanya fina aniye nuwa mugati ya Baba ne Baba na nyeye muwa mugati yangu, na niye muwa mugati yangu, na niye mugati yenu.

²¹ Iyena malagiso gangu na kugagolosa, aye no yakunyenda, na iyakunyenda yakwenda yendigwe ne Babangu nami nikwenda nimwende na kigubula ukwakwe.”

²² Yuda, (si Isikalioti) hoyomugamba, “Mundewa yanhani fina ukuhananga kigubula ukwetu ninga si kuchilunga?”

²³ Yesu hoyomubidula, na kumugamba, “Awakunyenda wakukola imbuli yangu, na iBaba yakwenda yawende, nase chikwija ukwakwo na kugolosa ukalo wetu umwawo.

²⁴ Ayuya imwene inghakunyenda nghakukola simbuli sangu, na imbuli yomukuhulika si yangu ninga ni ya Baba iyanitumile.

²⁵ Simbuli sino nilonga nanye, ugele nikali hamwedu nanyi.

²⁶ Ninga, Imutasi, Muhe Musunhile iyekwenda yegaligwe na Baba ku disina dyangu, yakwenda yawafuse finhu fyose, na kuwagelegesa gose goniwafusile.

²⁷ “Digoya nikumulekelani; digoya dyangu nikumwinghani; sifina ichilunga fochikulafa; aniye nikumwinghani fidoga fyenu finghedasike, kahi finghogohe.

²⁸ Hamunihulika nikumugambani, ‘Nikuleuka, ninga nikwenda nimwijileni!’ Hona mukunyenda, nanga mukunyenda hamuwa mukusekelela, kosoko iBaba ni mukulu kusuma niye.

²⁹ Na hambiya nimutamilani ugele unghali kufika, uleke maukufika muhuwile.

³⁰ “Sikulonga mbuli nyingi kahi nanyeye, kosoko imukulu we chilunga chino yakwija. Kachaka udaha wowose ukwangu;

³¹ ninga nikugolosa fina iBaba foyanilagise, uleke ichilunga chimanye fina nikumwenda iBaba. Inukeni, chigendeni kuya.”