Yohana 12 - Dilagano Disha ku Wanhu wose

Yesu yakubakigwa mafuta Betania

¹ Fogasigale majuwa mutandatu kufika dijuwa dya Pasaka, Yesu hoyokwija Betania, ahowile Lasalo, imwene yenuligwe na Yesu kulawa mu difa.

² Baho hawamugolosela chakudiya; Malita yendeyotogoma, na Lasalo hakuwa yumwedu wawo awekale hamesa hamwedu naye.

³ Maliamu hoyolonda chichupa cha mafuta ge mhungile swanu hakamubaka mumigulu ya Yesu na hamusa imigulu yakwe kwa sinjwili sakwe, na inyumba hoimema mhungile swanu ya mafuta.

⁴ Ninga, Yuda Isikalioti yumwedu wa wefusa wakwe ayuya yowile wo kumusongesa, hoyogamba,

⁵ “Nhani amafuta gano gasambasigwe kwa dinali magana madatu na kuwegha awakiwa?”

⁶ Hakalonga nhaifo, sikosoko hakowa na ubasi na wakiwa, ninga kosoko hakowa muhiji, kosoko noyowile ne chisanduku cha mapesayendeyolonda amapesa gagumagwe umo.

⁷ Yesu yagamba, “Mulekeni, yageke kosoko ya dijuwa dya masiko gangu.

⁸ Awakiwa mwenawo majuwa gose hamwedu nanye, ninga aniye musihamwedu nani majuwa gose.”

Njama sa kumukoma Lasalo

⁹ Ditewa dikulu dya Wayahudi wakamanye fina kabaho, howoluta uko, si kosoko ya Yesu du ninga wendewahanana kumona na Lasalo, yenulinuligwe na Yesu kulawa mudifa.

¹⁰ Kosoko awatambiki wakulu hawahananga njila ya kumukoma Lasalo,

¹¹ kosoko matewa ga Wayahudi wendewoleuka ukwawo na kumulutila Yesu na kumuhuwila.

Kwingila Yelusalemu kwa chinyemi

¹² Dijuwa dya keli itewa ikulu dya wanhu awejile kusikukuu hawahulika fina Yesu yakwija Yelusalemu.

¹³ Howobena matambi ge mitende howoluta kumuhokela wakujoja, “Hosana! Kamotesigwa ayuya iyakwija mudisina dye Mundewa wa Isilaeli!”

¹⁴ Na Yesu iMundewa hoyolangisa dipunda didodogi, na kwikala muchanhya yakwe; fina foitulumwe,

¹⁵ “Unghogohe biti Sayuni; Langa; iMundewa yakwija kekala mwi mwana we dipunda.”

¹⁶ Awefusa wakwe wasatangile chino kunghonga; ninga Yesu yakatunyigwe, Kamei howogelegela fina haitulumigwa nheifo kosoko yakwe, fina imemelesigwa ukwakwe.

¹⁷ Ditewa dyowile hamwedu naye ugele foyamwinange Lasalo kulawa kuchilalo na kumwinula kulawa kuwafile howolafa uhomelesi.

¹⁸ Chileka amatewa galutile kumuhokela ni kosoko hawahulika fina hakagolosa ichitangilo chicho.

¹⁹ Amafalisayo howokigamba awecho kwa wecho, “Mukona fina anyeye musikudaha dyodyose; langeni, ichilunga chikumwandamila.”

Wayunani wakumuhananga Yesu

²⁰ Mu wanhu walutile Yelusalemu kufuga ugele wa sikukuu hawowa Wayunani.

²¹ Awene wawo howomulutila Filipo yalawile Betisaida ya Galilaya, wagamba, “Mukulu aseye chikuhanga kumwona Yesu.”

²² Filipo kejamutamila Andelea; Andelea na Filipo wejamutamila Yesu,

²³ Yesu kawabidula kagamba, “Ugele ufika we Mwana we Munhu kutunyigwa.

²⁴ Chawelu, chawelu nikumutamilani imhule ye ngano inghaleka kulagala hasi musanga na kufa, ikusigala imwene, ninga inghafa ikweleka singi nyingi.

²⁵ Iyakwenda uwumi wakwe yakuwagilisa, na yuya iyekulema uwumi wakwe muchilunga chino yakuupata ku uwumi wa majuwa gose,

²⁶ munhu wowose yanghanitogomela, imwagila yanyandamile; na honuwile niye, baho noho yakwenda yowe imutogomi wangu, imunhu yanghanitogemela, iBabangu yakwenda yalumbe kosoko yakwe.”

Yesu yakulonga muchanhya ye difa dyakwe

²⁷ “Hambiya ichidoga changu chikwidasika nani nigambeki? ‘Baba, unihonye ne chipisi chino?’ Hata, ni kosoko iino nija kuchipisi chino.

²⁸ Baba, uditunye disina dyako. Baho hodikwija dijwi kulawa kulanga, Niditunya, na nikwenda niditunye kahi.”

²⁹ Matewa awemile baho hawahulika howogamba fina ididima. Wamonga howogamba, “Malaika kalonga naye.”

³⁰ Yesu yabidula, “Dijwi dino dija kosoko yenu, si kosoko yangu.

³¹ Hambiya no chigele cho kulamuligwa ichilunga chino, hambiya imukulu we chilunga chino yakutagigwa kunje;

³² na niye ninghafulusa kwinuligwa muchanhya kulawa hasi, nikuwakwega wanhu wose ukwangu.”

³³ Hakalonga sino konesa ni ifa dyaki dyoyakufa.

³⁴ Amatewa weja wamubidula kugamba, “Chihulika mumalagiso fina Kilisito yakwikala majuwa gose. Kodaha nhani kugamba Mwana we munhu yakwenda yenuligwe kuchanhya? Ayo Mwana we munhu no nani?”

³⁵ Yesu hoyowagamba, “Ujelu wa hamwedu nanye kwa chipisi chitali chidodogi. Mugende ugele mwenawo ujelu, ichisa chingheje chiwasumani, iyakugenda muchisa nghamanyile hoki koyakuluta.

³⁶ Ugele mwenawo ujelu, huwileni mu ujelu, uleke muwe wana wa ujelu.” Baho Yesu yakalonge nheifo, hakaleuka hakakifisa kulawa ukwawo.

Wanhu kuleka kuhuwila

³⁷ Hamwedu na majuwa gose goyagolose kumwande ya meso gawo, ninga wasamuhuwile;

³⁸ hayuwa uleke imbuli yalongigwe ne mugonesi Isaya imemelesigwe: “Mundewa, nani yahuwile imbuli yetu na kwa chinani ugubuligwa umukono we Mundewa?”

³⁹ Kosoko iyo wasadahile kuhuwila kosoko Isaya hakalonga kahi,

⁴⁰ “Kawatula ameso gawo na kaigolosa imiyoyo yawo kuwa mikugutu, uleke wanghone kwa meso gawo na kona kwa miyoyo yawo, na kunibidukila niwahonye.”

⁴¹ Isaya hakalonga siso kosoko hanona ditunyo dyakwe hoyolonga kosoko yakwe.

⁴² Hata nheifo, wengi wa wakulu howomwihuwila, ninga kosoko ya kuwogoha Mafalisayo, wasadahile kulonga chimesomeso, uleke wanhalafigwe mumasinagogi.

⁴³ Kosoko hawenda ditunyo dya wanhu kusuma ditunyo dye Mulungu.

Kuliganiswa kwa simbuli sa Yesu

⁴⁴ Yesu yenula dijwi yekugamba, “Wowose yakunihuwila niya, nghakunihuwila niye du, ninga ayuya iyanitumile.

⁴⁵ Na yakunyona niye yakumona na yuya yanitumile.

⁴⁶ Nija kuwa ujelu we chilunga, uleke ayuya iyakunihuwila yanghasigale muchisa.

⁴⁷ Hona kwina wowose yakuhulika simbuli sangu, na nghakusikola, aniye sikumuliganisa; kosoko sijile kuliganisa ichilunga ninga kuchihonya ichulunga.

⁴⁸ Imwene iyakunilema niye na nghakuhokela simbuli sangu, kena mulamusi, simbuli sonilongile no sikasimuliganisa mudijuwa dye indumo.

⁴⁹ Kosoko niye silongile kwa udaha wangu nimwecho; Baba iyanitumile kanigha dilagiso, nilonge choni na nisimulile choni.

⁵⁰ Na nimanya fina dilagiso dyakwe ni uwumi wa majuwa gose. Kosoko iyo chonikulonga, nikulonga ifyene Baba foyanitumile.”