Yohana 10 - Dilagano Disha ku Wanhu wose

Imbasi ye mudimi

¹ Chawelu, chawelu, nikuwatamilani, imunhu inghakulokela kumulango kukwingila mwidewa dye singholo, ninga yakukwilila kwingi, imunhu yo muhiji kahi muhokaji

² Ninga ayuya iyakwingilila kumulango no mudimi we singholo.

³ Ayo mwimilisi yakumukumulila umulango; singholo sikuhulika dijwi dyakwe, na yekusinanga singholo sakwe kwa masina na yekusilafa na kusilongosa kunje.

⁴ Yanghafulusa kusilafa kunje sose isakwe, yakusilongolela, na singholo sikumwandamila, kosoko sidimanya dijwi dyakwe.

⁵ Imugeni sisikumwandamila, kahi sikumutija, kosoko sisimanyile amajwi ga wageni.

⁶ Yesu hakalonga imbasi ino, ninga wasatangile choyalongage nawo.

Yesu mudimi muswanu

⁷ Yesu kahi hakawagamba, “Chawelu, chawelu, nikuwatamilani, aniye no nimulango we singholo.

⁸ Wose awanilongolele ni wahiji na wahokaji, ninga singholo sisawahulikise.

⁹ Aniye no ni mulango; wowose iyakwila kulokela ukwangu, yakwenda yahone, yakwingila na kulawa na kupata madimilo.

¹⁰ Imuhiji yakwija kuhija na kukoma na kubana; aniye nija uleke wowe na uwumi na wowe nawo telele.

¹¹ “Aniye no nimudimi muswanu. Mudimi muswanu yakulafa uwumi wakwe kosoko ya singholo.

¹² Munhu yakudimu kosoko yo maliho, siyo mudimi, singholo si sakwe, yakona diwusi dikwija, yakusileka singholo yakudija, diwusi dikusikola na kusagalisa.

¹³ Yakutija kosoko ni munhu wa iliho na kechaka usungu ne singholo.

¹⁴ Aniye no nimudimu muswanu, nisimanya singholo sangu naso sinimanya,

¹⁵ fina Baba foyanimanyile naniye, fonimumanyile Baba; na nikulafa uwuni wangu kosoko ya singholo.

¹⁶ Ninga nina ngholo singi, aso si sa ditewa dino; aso naso inyagila nisigale, naso sohulika dijwi dyangu. Kosoko yiyo kukuwa na itewa dimwedu, na mudimi yumwedu.

¹⁷ “Kosoko iyo iBaba yakunyenda niye, kosoko nikulafa uwumi wangu, uleke ni ulonde kahi.

¹⁸ Hachaka munhu yekudaha kunihoka, ninga nina udaha wa kuulafa, na kuulonda hahi; dilagiso dino nidihokela kulawa kwa Baba.”

¹⁹ Hagalawanisa matemanuko mugati ya Wayahudi kosoko ya simbuli siso.

²⁰ Matewa hawagamba, “Kena igini, na kena chilalu; waki womukumutegelesa.”

²¹ Wamonga hawagamba, “Asino siyo nonga sa munhu yena digini, digini dikudaha kugubula meso gemudula?”

Yesu yakulemigwa

²² Hayuwa ijuwa nikulu dya kukumula ako Yelusalemu;

²³ ichigele che inyota, na Yesu yendeyogenda Mwihekalu, mwikumbo dya Sulemani.

²⁴ Awayahudi hawamusunguluta na kumugamba, “Kogendelela kuchidasa mpaka milaki? Nghonaga agweye no ni Kilisito chitamile unghachifisefise.”

²⁵ Yesu hakawabidula, “Nimutamilani ninga musikuhuwila. Imilimo yonikugolosa mu disina dya Baba, ayo no ikunihomelela;

²⁶ ninga musikuhuwila, kosoko nyeye musuwile musingholo sangu.

²⁷ Singholo sangu sikuhulika dijwi dyangu, na nisimanya, isene naso sinimanya;

²⁸ nani nikusingha uwumi wa majuwa gose; na sisikudaha kwagilila, na kwechaka munhu yakudaha kunihoka kulawa mumukono wangu.

²⁹ iBabangu iyaninghile siso ni mukulu kusuma wose, na hachaka yakudaha kumuhoka, kulawa mumikono yakwe.

³⁰ Aniye na Baba ni chinhu chimwedu.”

³¹ Awayahudi hawadondola mawe kahi uleke wamutowele nago.

³² Yesu hoyowabidula, “Nimonesani milimo mingi miswanu kulawa kwa Baba; kosoko ya ihoki mu yiyo yomukunitowela mawe?”

³³ Awayahudi hawamubidula wakugamba, “Si kosoko ye milimo miswanu ikuleka chikutowa na mawe, ninga kosoko yo kutofula kosoko agweye, go wi munhu ukitenda fina kwa Mulungu.”

³⁴ Yesu yawabidula, “Isitulumigwe mu malagiso genu, Hanigamba, ‘Anye mwa milungu?’

³⁵ Ghonaga yawenange milungu awaya awejiligwe ne imbuli ya Mulungu na matulumo gasukudaha kubenigwa,

³⁶ Mukumugamba, ‘Ayuya imwene iBaba kamusagula na kumulafa na kumutuma kuchilunga. Agweye ukutofula kosoko nigambile Aniye no ni Mwana we Mulungu?’

³⁷ Nghonaga niye sikugolosa imilimo ya Baba, munghanihuwile;

³⁸ Ninga hona nikuigolosa, inghowa musikunihuwila niye, ihuwileni imilimo iyecho, uleke mutange na kumanya fina, iBaba kamugati yangu na niye nuwa mugati ya Baba.”

³⁹ Kahi howogesa kumukola, ninga hoyochulupuka kulawa mumikono yawo.

⁴⁰ Hakaleuka kahi yaluta umwambu wa Yolodani ahanhu ahene Yohana Mubatisaji hakakongela kubatisa, hoyokuwa baho.

⁴¹ Wengi hawamwijila; hawagamba, “Yohana chawelu nghagolose ijumo dyodyose, ninga chila mbuli yoyalongile muchanhya ye munhu yuno ayuwa ya chawelu.”

⁴² Na wengi howomuhuwila.