Yohana 1 - Dilagano Disha ku Wanhu wose

Imbuli ya uwumi

¹ Uko kunghonga hakuwa na Mbuli, naye Mbuli hakowa ne Mulungu.

² Imwene kunghonga hakowa na Mulungu;

³ ifinhu fyose hafigoloseka kwa njila ya imwene, na kuswela imwene kwichaka chochose chene chagolosigwe chowile chikugoloseka.

⁴ Mugati yakwe no mowile na uwumi; na uwumi uya hawuwa ujelu wa wanhu.

⁵ Ujelu ukumulika muchisa, na ichisa chisikudaha kuwusima.

⁶ Kweja kowa munhu yatumigwe kulawa kwe Mulungu, disina dyakwe Yohana.

⁷ Hakeja kosoko yo uhomelesi, kuuhomelela ujelu, uleke wose wahuwile kwa njila yakwe.

⁸ Imwene nghowile ujelu uya, ninga hakeja yauhomelele ujelu.

⁹ Ujelu we chawelu uwukumulikila chila munhu wokwija muchilunga.

¹⁰ Hakowa muchilunga, ne chilunga hachigolosigwa kwa njila yakwe, ninga ichilunga chisamumanyile.

¹¹ Hakeja kukaya yakwe imwenyecho, ninga awanhu wakwe wasamuhokele.

¹² Ninga ku wose awamuhokele, awahuwile disina dyakwe hakawengha udaha wogoloseke wana we Mulungu.

¹³ Awelekigwe, si kwa sakame hegu kwenda kwa munhu kwa chimutufi, ninga kwa Mulungu.

¹⁴ Imbuli hoikuwa mutufi, hoyokwikala muchilagati yetu, kamema dihewa ne chawelu; chidilanga ditunyo dyakwe, ditunyo fina dye imwana yemwene kulawa kwe Baba.

¹⁵ Yohana hakowa na uhomelesi muchanhya yakwe, na kujoja, “Ayuno no yuyuya wonagambile fina, ‘Iyakwenda yeje kunyuma yangu, imukulu kusuma niye, kosoko hakowa kumwande yangu.’”

¹⁶ Kulawa mukumema kwake ase wose chohokela dihewa muchanhya ya dihewa.

¹⁷ Kosoko dilagiso hadija kwe njila ya Musa; dihewa ne chawelu fija kwa njila ya Yesu Kilisito.

¹⁸ Hechaka yamonile Mulungu, ugele wowose uya; iMwana muhala, yowile mu chifa cha Baba, noyamugolose yamanyigwe.

Imbuli ya Yohana Mubatisaji

¹⁹ Na uno no uhomelesi wa Yohana, ugele Wayahudi fowatumile awatambiki na Walawi kulawa Yelusalemu wamuse, “Agweye no nani?”

²⁰ Hakafumila kahi ngalemile, ninga hakalonga fina, “Aniye siyo no ni Kilisito.”

²¹ Howomusa, “Aho gwegwe nani gweye? Aho gwe no Eliya? Hoyobidula Siniye ka. Agweye no yuya imugonesi? Hoyobidula, ka.”

²² Hawamusa, “Aho gwegwe nani? Chitamile uleke chiwabidule awaya awachitumile ukugambaki muchanhya yako?”

²³ Hakagamba, “Aniye no dijwi dye iyakujoja munyika: Igololeni injila ye Mundewa, fina foyalongile imugonesi Isaya.”

²⁴ Wawo awatumigwe hawalawa kumafalisayo.

²⁵ Hawamusa, “Aho nhani ukubatisa, nghonaga nghu Kilisito, kahi nghu Eliya, nghwi mugonesi?”

²⁶ Yohana hakawabidula, “Nikubatisa na meji; muchiligati chenu kema imwene anyeye musimumanyile.

²⁷ Ayuya iyakwija kunyuma yangu, aniye sikudaha kudohola isigi ye chilwatu chakwe.”

²⁸ Agano hagogoloseka Betania umwambu wa Yolodani, hoyabatisilage Yohana.

Langa Imwana Ngholo we Mulungu

²⁹ Dijuwa dya keli yakwe hakamona Yesu yakwija ukwakwe; hakagamba, “Langeni iMwana Ngholo we Mulungu, iyakulewusa uwihi we chilunga!

³⁰ Ayuno noyonalongile nikugamba, ‘Kunyuma yangu yakwija munhu imwene yowile kumwande yangu, kosoko hakuwa uko ugele aniye sinati nyuwe.’

³¹ Aniye nimwenyecho samumanyile, ninga kosoko yiyo hanija nikubatisa kwa meji, uleke yoneke ku Waisilaeli.”

³² Na Yohana hakahomela, “Hanyona Muhe yakuhulumuka kulawa kulanga kifana huwa, hoyosigala umwakwe.

³³ Aniye nimwecho samumanyile; ninga ayuya iyanitumile kubatisa kwa meji kanigamba, ‘Ayo yo ukona Muhe yakudulika muchanhya yakwe na kusigala u mwakwe no yakubatisa kwa Muye Musunhile.’

³⁴ Aniye nyona kahi nikuhomelela fina ayuno no Mwana we Mulungu.”

Awefusa we nghonga wa Yesu

³⁵ Dijuwa dyandamile Yohana hakema na weli wa wefusa wakwe;

³⁶ Kamulanga iYesu foyagendage hoyogamba, “Langeni iMwana Ngholo we Mulungu!”

³⁷ Awefusa aweli wamuhulika yakulonga nheifo, hawamwandamila iYesu.

³⁸ Yesu kabiduka, kawona wakumwandamila, kawagamba, “Mukuhananga choni?” Homugamba, “Labi” (nong'amba Mwalimu) “Ukwikala hoki?”

³⁹ Hakawagamba, “Mwije mulange Howoluta hawona hoyekalage,” howokwikala naye dijuwa dyo kosoko hayuwa kifana saa kumi ya hegulo.

⁴⁰ Yumwedu wa wefusa waya weli awamuhulike Yohana yakulonga hakowa hawamwandamila, hakowa Andelea imunduguse wa Simoni Petulo.

⁴¹ Andelea hakakonga kumona imukuluwe Simoni, kamugamba, “Chimona Masiya” (nong'amba Kilisito)

⁴² Hakamwigala kwa Yesu, Yesu hakamulanga, hakagamba, “Agweye no Simoni mwana wa Yohana? Ukwende winangigwe Kefa” (nong'amba Petulo)

Yesu yakwinanga Filipo na Natanaeli

⁴³ Dijuwa dyandamile Yesu hakasagula kuluta Galilaya. Hoyomona Filipo hoyomugamba, “Nyandamile.”

⁴⁴ Hambiya Filipo hakalawa Betania ikaya ya cha Andelea na Petulo.

⁴⁵ Filipo hoyomona Nataneli, hoyomugamba, “Chimona imwene yatulumigwe na Musa simbuli sakwe muchitabu na mumalagiso kahi iyatulumigwe na wagonesi Yesu wa Nasaleti iMwana wa Yusufu.”

⁴⁶ Natanaeli hoyomugamba, “Chodaha kulawa chinhu chochose chiswanu Nasaleti?” Filipo hoyamugamba, “Wije ulange.”

⁴⁷ Yesu kamona Nataneli yakwija ukwakwe kamugamba, “Langa, iMuislaeli tubwi, mugati yakwe mwichaka kidanhilisa!”

⁴⁸ Nataneli kagamba, “Kunimanya nhani?” Yesu kamubidula, “Ugele Filipo nghenati yakwinange fowekale hasi yo musada, hanikona.”

⁴⁹ Nataneli kamubidula, “Labi agweye kwa Mwana we Mulungu! Agweye no Mundewa wa Waislaeli.”

⁵⁰ iYesu kamubidula kagamba, “Kosoko nikugambile, hanikona wikale hasi yo musada, ukuhuwila? Ukwenda wone majuma makulu kusuma gano.”

⁵¹ Kamugamba, “Chawelu nikukutamila, ukwenda wone ulanga ugubuka na malaika we Mulungu wakukwila na kuhumuluka muchanhya ye Mwana we munhu.”