Waebulaniya 9 - Dilagano Disha ku Wanhu wose

Ifuga ya Muchilunga na Kulanga

¹ Hambiya hata dilagano dye inghonga hadyuwa na nhenda sa kufuga na ahasunhile hakwe he chilunga.

² Kosoko dihema hadigoloswa, idyakunje, idyekigwe chigwaso che itaa na imesa na imikate yo Konesa; hekwinangigwa Hanhu Hasunhile.

³ Kunyuma ye dipasiya dya keli hadima dihema dikwinangigwa Ahasunhile ha Hahasunhile,

⁴ dina chiya cho kufunghisila ubani chigoloswe kwa sahabu na disanduku dye dilagano digubikwe musisandi sose kwa shaba, umowile na dikopo dya sahabu idyowile na imana iya na imhando ya Haluni iyatugute ne fibawo fiya fye dilagano;

⁵ muchanhya ya disanduku hamuwa na makelubi ge ditunyo gakuguma inyefu mwigoda dyo ubasi. Ninga musimbuli sino chichaka luneka lwa kulonga kwa utali.

⁶ Ifinhu afyo finghafulusa kugoloswa, awatambiki wakugendelela kwingila mwihema didyo dye inghonga kutogoma imilimo yo kufuga;

⁷ ninga mwihema didyo dya keli dikwingiligwa ne mutambiki mukulu muhala, mukangha umwedu chila mwaka; kahi si bila sakame, yoyekuhanangigwa yalafe kosoko yakwe na kosoko ye sisambi sa kuleka kumanya sa wanhu awo.

⁸ Mu dino iMuhe Musunhile yakonesa fina injila yo kwingila ahanhu hasunhile hayuwa inhati ikumuligwe, kosoko dihema dya kunje hadyuwa dikali dimile

⁹ (idyowile chitangilo che chigele chino). Mugoloswa nheifi; filafwa ne sinhambiko ifisikudaha kumugolosa imunhu, iyekufuga yowe na misungu ikangale,

¹⁰ kosoko fikutogomela muhala ifyakudiya ne ifinhu fyo kungwa na uhojojolo we hayo hayo na malagiso ge chimutufi agekigwe mpaka ichigele chino.

¹¹ Ninga ichigele Kilisito foyejile imutambiki mukulu we finhu fiswanu ifijile, kahi kugendela dihema dikulu, kahi idikangale lugano (idisigolosigwe kwe mikono, no ngamba, si dye cheleko chino)

¹² hakengila kamwedu kosoko ya wose Ahanhu Hasunhile, yalondile isakame siyo yesimhene na sindama, ninga isakame yakwe imwenyecho na kuwa ne indekelela ya majuwa gose.

¹³ Kosoko inghowa isakame ye simhene na makambaku na difu dye sindama se singombe dyowetililigwe awanhu awena uwihi dikusunha na kukwema umutufi,

¹⁴ silugano isakame ya Kilisito, imwene kugendela iMuhe wa majuwa gose hakelafa imwenyecho kuwa chilafwa chichaka wihi, kuwasunha amadoga genu na sinhenda senu sufile mudahe kumufuga Mulungu wenu imumi.

¹⁵ Kosoko ino Kilisito noyekugolosa dilagano disha uleke wose awenangwe wadahe kuhokela uhasi uwuhuwisigwe wa majawa, kosoko ye difa digoloseke kuwaleusila uwihi wawo awowile hasi ye dilagano dhe nghonga.

¹⁶ Kosoko yagila ahena dilagano dyo uhasi, howe na ifa dya imunhu iyadigolose.

¹⁷ Kosoko dilagano dyo uhasi dina ludole ichigele imunhu foyekufa, amba foyekuwa yekali mumi dikuwa chaka ludole.

¹⁸ Ninga hata dilagano diya dya katali sidyakongesigwe bila ya sakame.

¹⁹ Kosoko chila ilagiso fodyalongigwe na Musa kuwanhu wose ifene foilongigwe mumalagiso, hakailonda isakame ya sindama na yesimhene na kuhanganisa mumeji na kuinyaga muchitabu cha malagiso na awanhu kwa sufi na kwa mahamba ge dibiki dikwinangigwa hisopo,

²⁰ yekugamba, Ayino no sakame ye dilagano dye Mulungu dyoyamulagiseni.

²¹ Kahi nheifiya hakainyaka isakame yakwe mu fyose dihema na ifiya fyo kufugila.

²² Chawelu, hasi ya malagiso chila chinhu chikusunhigwa kwa sakame, na bila ya sakame kwachaka kulekeleligwa kwa wihi.

Inhambiko ya Kilisito Ikuleusa uwihi

²³ Ninga hayagila simbuli sose isasigale kulanga sisunhwe kwa kwandamila sinhenda sino, ninga simbuli isenyecho sa kulanga sisunhigwa kwa nhambiko siswanu kusuma sino.

²⁴ Kosoko Kilisito nghengile ahanhu hasunhile ahagolosigwe ne mikono hefane chawelu ninga kulanga ukwenyecho, hambiya koneka hamwedu ne Mulungu kosoko yetu.

²⁵ Kahi siyo yelafe kwa kuwila kuwila, imutambiki mukulu foyekwingilaga Ahanhu Hasunhile, chila mwaka kwe sakame siyo iyakwe;

²⁶ Kusigwa no nheifo, hayuwa ikumwagila kusambasigwa mikangha mingi kulawa kwikigwa kwe isinghindisi se chilunga. Ama hambiya kamwedu du kwa umemelesi we figele, kagubuligwa, yauleuse uwihi wa wanhu kwe nhambiko yakwe imwenyecho.

²⁷ Kahi kefana awanhu fowekiligwe kufa mukangha umwedu na fowekufa uliganiso,

²⁸ no nheifo, Kilisito naye yakafuluse kulafigwa kamwedu kulonda uwihi wa wengi, kokwija mukangha wa keli, siyo kutogomela uwihi ninga kuwahonya wose awena inghilu ya kumugojela.