Waebulaniya 7 - Dilagano Disha ku Wanhu wose

Imutambiki Melikisedeki

¹ Kosoko ayuno, “No Melikisedeki Mundewa wa Salemu, imutambiki we, Mulungu Iyekuchanhyasi, hakakitanyila na Ibulahimu foyendeyakuya kulawa kuwatowa wandewa na kumotesa,”

² na kwe imwene yuyo Ibulahimu hakalafa, “Imwedu ye ikumi ya chila chinhu choyowile nacho,” itapita ye Disina dyakwe bosi ni, “Mundewa we chawelu,” keli ni mundewa wa Salemu, “Imwene ni mundewa we digoya.”

³ Munhu yo kechaka baba, ninga ng'ina, kechaka welekwa, hegu nghonga ama ndumo mulwikala lwakwe, ninga kaliganisigwa ne Mwana we Mulungu, imwene ni kuhani mwajuwa gose.

⁴ Langeni fonimukulu! Ibulahimu baba yetu hakamwingha imwedu ya kumi ye ifinhu ifilawile kunghonga.

⁵ Na wose awecheleko cha Lawi awakuhokela umulimo wo utambiki wene lusigililo mwilagiso fina walonde imwedu ya kumi kulawa kuwanhu wawo, kosoko nawo ni welekwa wa Ibulahimu.

⁶ Ninga munhu yuno siyo wa lukolo lwawo, hakahokela imwedu ya kumi kwa Ibulahimu na kumumotesa imwene yene dihuwiso.

⁷ Kahi imanyika fina imudodogi yakumotesigwa ne mukulu.

⁸ Na hata wanhu ambawo wakudaha kufa wakuhokela imwedu ya ikumi, ninga kwa Melikisedeki imwdu ya kumi haihokeligwa na kuhomeleligwa ne imwene imumi inghakudaha kufa.

⁹ Munhu yakudaha kugamba fina, Lawi imwenyecho, iyakuhokela imwedu ya kumi, hakaliha kugendela Ibulahimu,

¹⁰ kosoko hakowa mufyuno fye Babakwe ugele Melikisedeki foyakitang'anyile naye.

¹¹ Hambiya inghowa ukangasi haupatagwa kwa njila ya utambiki we Chilawi, (kosoko hasi yakwe awanhu hawahokela malagiso), hahowa na soko yaki kahi ya mutambiki yungi yeme ahanhu ha Melikisedeki, kusuma hata yumwedu iyatambuligwe ahanhu ha Haluni?

¹² Kosoko halika utambiki ukudaha kubiduka, yagila amalagiso nago gabiduke.

¹³ Kosoko umwene yalongigwe mugago hakowa muhangi wo ulukolo lwingi, ulwene hechaka hata yumwedu mulukolo lwalwo iyetuma mulimo wo utambiki hefugilo.

¹⁴ Kosoko imanyika chalinje fina iMundewa wetu yalawa mucheleko cha Yuda, mulukolo ulwene Musa nghalonga mbuli yoyose muchanhya yakwe musimbuli sa watambiki.

Imutambiki yumonga kefana Melikisedeki

¹⁵ Adino digaluka dya chalinje lugano, ichigele mutambiki yungi yakwima kefana Melikisedeki,

¹⁶ iyagaluke mutambiki siyo kwa kwandamila inyenda ya malagiso ge chimutufi, ninga kwa ludole lwa uumi uusikubanika.

¹⁷ Kwasoko kahomelelwa fina “Agweye kwa mutambiki wa majuwa gose, ahanhu ha Melikisedeki.”

¹⁸ Kwa ulwandi lumonga dilagiso idilongole dikigwa hanghanda kosoko yo usokesi wakwe na kuleka kuwa na chakutogomelwa.

¹⁹ (Kosoko dilagiso sidyamemelese chochose); kwa ulwandi lumonga, dihuwilo diswanu hadinghiswa, uleke mugago chidahe kumusegelela Mulungu.

²⁰ Kahi sidyowile nheifo bila ya kilaha.

²¹ Wose kunghonga awowile watambiki hawalonda mulimo uwo bila ya kilaha, ninga ayuno kenghigwa kwa kilaha, “Imundewa kakilaha kahi nghodaha kubidula chidoga chakwe, ‘Agweye no mutambiki wa majuwa gose.’”

²² Kwa nheifo Yesu kagaluka mwimilisi we dilagano diswanu.

²³ Lugano, awatambiki we nghonga hawowa wengi, kosoko hawakindisigwa ne difa wanghagendelele mumulimo;

²⁴ ninga imwene kenawo utambiki wakwe uwichaka ndumo, kosoko ukugendelela majuwa gose.

²⁵ Nochanghone ugele wose kena udaha wa kuwahonya wose awakumusegelela Mulungu kwa kulokela imwene, kosoko muchigele chakwe chose choyakwikala yakuwatasila.

²⁶ Kosoko hayagila chuwe na mutambiki mukulu kifana yuyo, imusunhile yechaka ilema dyodyose, inghachafuke, iyakinega na uwihi, na yenuligwe kulanga.

²⁷ hafanile, kifana awatambiki wamonga wakulu; kechaka haja kulafa nhambiko chila ijuwa, kunghonga kosoko yo wihi wakwe imwenyecho, keli kahi na kosoko yo uwihi wa wanhu wose; aga hakagagolosa malumwedu du kwa wanhu wose ichigele foyakilafile imweneyecho.

²⁸ Kosoko dilagiso dikuweka wanhu wose awechaka ludole kuwa watambiki wakulu, ninga inonga ye nyilaha, iyejile kunyuma ye dilagiso haimusagula Mwana iyamemelekele majuwa gose.