Waebulaniya 6 - Dilagano Disha ku Wanhu wose

¹ Hambiya chileke amafuso ge nghonga agechikilisito na chandamile agakangale, chingheke nhindiso kahi: Kwa kulamba kulawa mumilimo yufile ninga chike dihuwi kwe Mulungu,

² malagiso ge mbuli sa ubatiso na kwikiligwa mikono na kwinuka wafile na uliganiso wa majuwa gose.

³ Agano chogolosa Mulungu yenghenda.

⁴ Kosoko isikudahika kulamba kahi kwa wanhu awalekile dihuwi wowile muujelu na kunomola ichinghwa che Mulugu na kuwa na lugota na Muhe Musunhile,

⁵ na kufulusa kunomola uswanu we mbuli ye Mulungu na uludole we chigele chikwija,

⁶ na kuleka dihuwi isikudahika kuwowisa walambe kahi, kosoko wakumusambasa Imwana we Mulungu keli mufidoga fyawo na kumutofula kwa hajelu.

⁷ Kosoko isanga inyunyile ifula, itonyelwa chila ugele na kotesa mamudyo maswanu kwa yuya yakulima na kuhokela simboto kulawa kwe Mulungu.

⁸ Ninga inghotesa miwa na magugu, yokuwa chaka chambusi na kuwa habehi na kuhugutiswa; na kusomigwa kumoto.

⁹ Hata inghowa chikulonga nheifo, wendigwa wangu musimbuli senu chihuwila simbuli siswanu lugano so uhonya.

¹⁰ Kosoko Mulungu siyo mukugutu hata yaleke kona imilimo yenu na wendo womonese kosoko ye disina dyakwe, kuwatogomela awasunhile fina fomukugolosa hata hambiya.

¹¹ Chikuhananga chila yumwedu wenu yonese upiligale uwo kwa kumanya umemelesi we dihuwi mpaka kundumiliso,

¹² uleke munghowe wadoba, ninga awekuwandamila wose awena kulokela dihuwi na ufinyilisi wakuhala isilaganiswe.

Idihuwilo dye Mulungu dye chawelu

¹³ Kosoko ichigele iMulungu foyamulaganise Ibulahimu, na kosoko nghowile hata na munhu yumwedu mukulu wa kilahila, hakelahila muimwecho,

¹⁴ yekugamba, “Chawelu nokumotesa gweye na kukongesa.”

¹⁵ Kamei Ibulahimu yakamale kufinyilisa, hakahokela choyalaganiswe.

¹⁶ Kosoko awanhu wakilaha kwa yuya imukulu kusuma awene, na nyilaha ukwawo no kumala simbuli sose.

¹⁷ No nheifo, Mulungu naye yakwenda konesa lugano awahasi we dihuwilo ifene amadoga gakwe fogechaka chibidubidu hakongesa mudihuwiso kilaha,

¹⁸ uleke kwa finhu fili ifisikudaha kubiduka mufifyo Mulungu nghodaha kulonga udasi, uleke aseye chibilimile chuwe na ludole lukangale kudikola dihuwi dikigwe hamwande yetu.

¹⁹ Chinadyo dihuwi dino, dye chawelu na dimile nghwi kifana chigingi che fidoga, ne dihuwi idikwingila mugati ye dipasiya,

²⁰ Umo nomoyengile Yesu kosoko yetu, imwene noyachilongolele hakagaluka mutambiki mukulu wa majuwa gose kifana Melikisedeki.