Waebulaniya 5 - Dilagano Disha ku Wanhu wose

¹ Kosoko chila Mutambiki Mukulu yasaguligwe kulawa muwanhu, kekigwa yeme ahanhu ha wanhu yawatogomele musimbuli se Mulungu, kulafa filafwa na sinhambiko kosoko yo wihi.

² Yekudaha kuwalondela kwa uholo awasimanyile na wokwagilila, kosoko imwene naye kowa musokesi.

³ Kosoko ino imwagila naye yalafe nhambiko kosoko yo wihi wakwe na wihi wa wanhu wamonga.

⁴ Na hechaka munhu yekiingha ditunyo dyo Utambiki Mukulu ninga ayuya iyenangigwe ne Mulungu, fina foyowile Haluni.

⁵ No nheifo kahi iKilisito naye nghakiinule imwenyecho kuwa Mutambiki Mukulu, ninga hakasaguligwa ne Mulungu yagambile, “Agwe no Mwanangu, diyelo nikweleka,”

⁶ fina foyakulonga ahanhu hamonga, “Agweye no mutambiki wa majuwa gose, anhanhu ho utambiki ha Melikisedeki.”

⁷ Mumajuwa gakwe goyekalage muchilunga, Yesu hakatasaga lugano na kutasilisa, kwa ijwi ikulu na masosi kwe Mulungu yena udaha wo kumuhonya kulawa mudifa, na hakahulikigwa kosoko ye chogoho che Mulungu ichowile umwakwe.

⁸ Hamwedu na gago hakowa Mwana, iyakifusile kuhulika kugendela amagayo goyapatile

⁹ naye foyakangasigwe hakagaluka chotoko cha uhonya wa majuwa gose kuwose awekumuhulika,

¹⁰ kahi imwene kasaguligwa ne Mulungu kuwa mutambiki mukulu ahanhu ha Melikisedeki.

Kujama kosoko ya kuleka dihuwi

¹¹ Muchanhya yakwe china mbuli nyingi sa kulonga, ninga nghugutu kusilonga, kosoko anyeye hamukwenda kuhulika.

¹² Kosoko hamwedu na gago muwagila muwe wafusaji mukuhananga munhu yun gi yawafuseni amafuso ge inghonga ge Mulungu. Mukuhananga mele siyo chakudiya chikugutu;

¹³ Kosoko chila munhu iyakwikala kwa ndiya ya mele nghamanyile imbuli ye chawelu, kosoko ni mwana na.

¹⁴ Ninga chakudiya chigugutu ni cha wakulu wagima, kosoko wose awene imisungu wakudaha kusagula diswanu na dihile.