Waebulaniya 4 - Dilagano Disha ku Wanhu wose

¹ Hambiya kosoko dihuwilo dyo kwingila muchinyemi chakwe dinghali baho, chogohe uleke yanghowe yumwedu wenu yaliganiswe kosoko ya kusuma kudifikila.

² Kosoko imbuli iswanu haija ukwetu fina ukwawo, ninga imbuli yahubiliigwe ukwawo iswatasile, kosoko isahangile ne dihuwi dya wategelesage.

³ Kosoko aseye chihuwile chikwingila muubwihilo wakwe, kifana Mulungu foyalongile “Fina fonakilahile munyono yangu, Wasidaha kwingila mubwihilo wangu,” hata inghowa imilimo yakwe haihela ugele wo kwikigwa inghindiso ye chilunga.

⁴ Kosoko ahamonga kalonga simbuli se dijuwa dye mufungate, “Ne Mulungu hakabwihila dijuwa dyo mufungate kulawa kugolosa milimo yakwe yose.”

⁵ Na kahi ahanhu hano hakagamba, “Wasidaha kwingila mubwihilo wangu.”

⁶ Kosoko hambiya isigala kuwamonga kwingila umo, na wose awene kunghonga, hawahokela imbuli swanu ninga hawasumwa kwingila kosoko ya ufuti wawo,

⁷ kahi keka ijuwa dimonga, “diyelo” yakugamba kulokela Daudi minyaka mingi ilokile, musimbuli isamule kuwandikigwa, “Diyelo munghahulika dijwi dyakwe, munghaigolose imimoyo yenu yuwe mikugutu.”

⁸ Kosoko inghowa Yoshua hakamwinghani hanhu ha kubwihila iMulungu nghodaha kutambula hamwande dijuwa dingi.

⁹ Hambiya kahi ahaya isigala sabato dijuwa dyo kubwihila kwe Mwana we Mulungu!

¹⁰ Kosoko wowose iyakwingila muubwihilo we Mulungu yakubwihila munhogoma milimo yakwe fina Mulungu foyabwihile munhogoma yakwe.

¹¹ Lekeni hambiya chipiligale chingile kuubwihilo uya, uleke hanghowe na yumwedu wetu yogwe kosoko yo ufuti uno.

¹² Kosoko imbuli ye Mulungu nyumi, kahi ikutogoma milimo, nghali kusuma isunja, kahi ikuhoma mpaka ikutemanhula chidoga ne umuhe ne ifilungo fya umutufi ne umusopo, kumanya amadoga ne inyenda ye umoyo.

¹³ Kahi hamwande yakwe hechaka ichumbigwe chikifisile ninga fyoose fyahajelu na kugubuligwa mumeso gagwe imwene yena simbuli setu.

Yesu Imutambiki Mukulu

¹⁴ Kosoko hambiya china Imutambiki Mukulu iyengile kulanga, Yesu Imwana we Mulungu, chigendelele kukolelesa dihuwilo dyetu.

¹⁵ Kosoko chichaka Mutambiki Mukulu iyekuhanga nase musokesi wetu, ninga imwene naye hakahesigwa musinyuwa sose fina seye bila kugolosa wihi.

¹⁶ Chisegelele kwa nghinyo hegoda dye undewa dye dihewa, uleke chidahe kuhokela ubasi na dihewa dyo kuchitasa ugele wo chikuhananga.