Waebulaniya 3 - Dilagano Disha ku Wanhu wose

Yesu ni mukulu kusuma malaika

¹ Hambiya wandugu sangu wasunhile mukuhangila mulwinango lwa kulanga mugelegeleni Yesu imutumigwa na mutambi mukulu wo kulamba kwetu.

² Yeja yowa muchawelu kwe Mulungu yamusagule imwene kifana Musa foyowile muchawelu munyumba ye Mulungu.

³ Kahi Yesu yataliligwa muchawelu iyena ditunyo lugano kusuma Musa ifene imujengaji we inyumba foyena ditunyo lugano kusuma inyumba iyecho.

⁴ (Kosoko chila nyumba ijengigwa na munhu yumonga, ninga imujengaji we finhu fyose ni Mulungu.)

⁵ Hambiya Imusa yeja yowa muchawelu munyumba yose ye Mulungu yefane mutogomi yowe muhomelesi we simbuli isikasilongigwa ichigele chikwija.

⁶ Ninga iKilisito yeja yowa muchawelu muchahya ye nyumba ye Mulungu kifana mwana, kahi aseye no sinyumba sakwe chinghakolelesa lugano ighinyo yetu na inyitogolela dihuwi dyetu.

Kubwihila kwa wanhu we Mulungu

⁷ Hambiya fina Imuhe Musunhile foyakulonga, “Diyelo, munghahulika dijwi dyakwe,

⁸ munghaigolose imimoyo yenu yuwe mikugutu fina ichigele che ufuti fina dijuwa dyo kugesigwa kunyika,

⁹ ako konagesigwe na wababa senu na kona imilimo yangu,

¹⁰ kwa minyaka makumi mane. hambiya hanidesigwa ne cheleko chiya, na kugamba, ‘Majuwa gose ni wanhu wagilile mumimoyo yawo, wasisimanyile sinjila sangu.’

¹¹ Fina fonikilahile munyono yangu, ‘Wasidaha kwingila muubwihilo wangu.’”

¹² Wandugu sangu langisiseni, nghanghowe na yumwedu wenu imwihi yena umoyo uwichaka dihuwi uukulongosa kugwila kutali ne Mulungu imumi.

¹³ Ninga mukilolese munhu na miyagwe chila ijuwa, inangwa, “Diyelo,” uleke nghanghowe na yumwedu wenu yowe mukugutu kosoko ya kudanhiliswa na wihi.

¹⁴ Kosoko chihangila muKilisito chinghagendelesa kukolelela inghinyo yetu ye nghonga mpaka kundumo.

¹⁵ Kosoko hailongigwa, “Diyelo munghahulika dijwi dyakwe munghaigolose mimoyo yenu yuwe mikugutu kifana chigele cho ufuti.”

¹⁶ No chenani wahulike na kugendelela kuwa wafuti? Nhafo siwowile awaya wose awaleuke Misili ugele wo ulongosi wa Musa?

¹⁷ Kahi no chenani awamudesile kwa minyaka makumi mane? Siwaya wose awagolose wihi, awene mitufi yawo hayugwa mwibalangu?

¹⁸ Kahi no chenani welahile fina wanghengile mubwihilo wakwe ninga si waya awowile wafuti?

¹⁹ Hambiya chikona fina wasadahile kwingila kosoko ya kuleka kuhuwila kwawo.