Waebulaniya 2 - Dilagano Disha ku Wanhu wose

Uhonya Umukulu

¹ Hambiya chikuhanangigwa chikolelese lugano simbuli sose sochihulike, uleke chingheje chisiswela.

² Kosoko inghowa imbuli iyalongigwe na malaika hayuwa ya chawelu na chila kubana hegu kuleka kuwa na chihuliko, hakuhokela maliho galiganile,

³ aseye nase chodaha kinega nhani chinghaulema uhonya uno umukulu? Haulongigwa kunghonga na Mundewa, na kuhomelelwa na wose ukwetu na wose awamuhulike imwende,

⁴ ugele iMulungu naye yakuwuhomelela kwa fitangilo na majumo na majumo gehayohayo na kwe chinghwa cho Muhe Musunhile ichikwinghigwa ifene imwenyecho foyekwenda.

Iyekuchilongosa Kuuwumi

⁵ Kosoko iMulungu nghachilekile ichilunga ichikwija chochikulionga chilongoswe na malaika.

⁶ Fina foihomeleligwe ahamonga, “Imunhu no nani hata umugelegele, hegu imwana we munhu, hata umulangilile imwene?

⁷ Kumugolosa mudodogi kusuma malaika kwa chipisi, kumufasa inghofiya ye ditunyo na chogoho,

⁸ kwika ifinhu fyose hasi ye migulu yakwe.” Hambiya munyika ifunhu fyose hasi yakwe, nghasigase chinhu isichuwile hasi yakwe. Fina foyuwile, chisinati chone chila chinhu chuwe hasi yakwe.

⁹ Ninga chikumona Yesu, imwene kwa chigele chiguhi hakagolosigwa mudodogi kusuma malaika yafasigwe ditunyo na chogoho kosoko ya magayo ge difa, uleke kwe dihewa dye Mulungu yadahe kunomola difa kosoko ya chila mumunhu.

¹⁰ Kosoko haimwagila imwene, imwenele na kugendela imwene ifinhu fyose fyabahano, munyigala wana itewa ku ditunyo, yamugolose chilongosi wo uwumi wao yaliganile kugendela magayo.

¹¹ Kosoko iyakuhojojola na wose awakuhojojoligwa wena chotoko chimwedu. Nochanghone wena iYesu ighakona chinyala kuwenanga awene wanduguse

¹² yakugamba “Notagusa disina dyako kuwandugu sangu muchiligati ye dikanisa nomutunya imwene.”

¹³ Na kahi, “Nomuhuwila imwene.” Na kahi, “Aniye nabahano na wana woninghigwe ne Mulungu.”

¹⁴ Hambiya kosoko wana wahangila mumutufi ne sakame, Yesu naye yowa nheifo uleke jugendela difa yadahe kumubana imwene yene udaha we difa, naye no luhoma,

¹⁵ na kuwehula awo wose woile mwibalangulu dya wose watumwa kosoko ye ditisi dye difa.

¹⁶ Kosoko ni chawelu fina Yesu nghejile kuwatasa malaika ninga icheleko cha Ibulahimu.

¹⁷ Hambiya haimwagila kuligana na wanduguse musimbuli sose uleke yadahe kuwa mutambiki mukulu yena ubasi akahi muchawelu mufuga ye Mulungu, yadahe kuwa iliho kwa wihi wa wanhu.

¹⁸ Kosoko imwene naye yahokela magayo na kugesigwa, kena udaha wa kuwatasa wose awekugesigwa.