Waebulaniya 13 - Dilagano Disha ku Wanhu wose

Kumwendesa Mulungu

¹ Uwendo we chindugu ugendelele.

² Munghaleke kuwahokela wageni, kosoko kwa nheifo awamonga hawawaheka wamalaika bila kumanya.

³ Wagelegeleni awayo wohigwe kifana mohigwa nawo, na awekupunjigwa kifana anyeye nanye muwa mumutufi.

⁴ Inyitola inghigwe chogoho na wanhu wose na ugono uwe muswanu, kosoko iMulungu kowaligania awechilanga na awedihabwa.

⁵ Munghende mapesa mmemeswe ne finhu fomwinafo; kosoko imwenyecho kagamba, “Sidaha kukuhungukila hegu kukuleka.”

⁶ Hata chikudaha kulonga kwa ng'inyo “Mundewa no mutasi wangu, sikudaha kogoha; imunhu konitendaki?”

⁷ Wagelegeleni ifilongosi wenu, awaya wamutamileni imbuli ye Mulungu ukwenu; dogeni imigendele ye mikalile yawo, kahi yandamile dihuwi dyawo.

⁸ Yesu Kilisito no mwene yuyuya digulo na diyelo na wa majuwa gose.

⁹ Munghagiliswe na mafuso gengi fe chigeni, kosoko yendesa umoyo ugumigwe ludole na dihewa si kwa fyakudiya ifyene awaya wafyandamile fisiwatasile.

¹⁰ China ifugilo idyene wose awekutogomela dihema diya wasikuhanangigwa wadiye.

¹¹ Kosose mifimba ye sinyama siya isakame yawo igaligwa ahamu hasunhile na mutambiki mukulu kefana nhambiko kosoko yo wihi sisomigwa kunje ye nghambi.

¹² Hambiya Yesu naye hakasambasika kunje ye dilango uleke yawasunhe wanhu kokola sakame yakwe imwenyecho.

¹³ Nase chilawe chimulutile imwene kunje ye ngambi, chilondile matofulo gakwe.

¹⁴ Kosoko hana chichaka kaya iikwikala majuwa gose ninga chikuikongha ikaya iya iikwija.

¹⁵ Kwa kugendela imwene chimulafile Mulungu nhambiko ya ditunyo, nayo ni dimudyo dye milomo iikutambula disina dyakwe.

¹⁶ Ninga munghaleke kugolosa maswanu nakutamila agaya gomwinago, kosoko nhambiko ifane ino ikumwendesa Mulungu.

¹⁷ Wahulikeni awakuwalongosa kahi wengheni chogoho, kosoko awo wakudima ifidoga fyenu, kifana wanhu awakwijawalafa inhala, uleke wagolose nhefo kwa chinyemi ninga si kwa usungu, kosoko isowile ikumwagilani nyeye.

¹⁸ Chitasileni; chimanya fina china fidoga fiswanu, chikuhananga kuwa na migendele miswanu kusimbuli sose.

¹⁹ Nikumutani lugano, kugolosa gano uleke nyuwisigwe ukwenu chumwande.

Nhasa ya kumalagisa

²⁰ Hambiya iMulungu we digoya imwinule Mundewa Yesu kulawa kuchilalo, imudimi mukule we sungholo, na we sakame ye dilagano dya majuwa gose,

²¹ yamugoloseni nyeye muwe mmemelekeka muchila nhenda swanu, mudahe kugolosa sinyenda sakwe iyikugolosa mulimo mugati yenu iyikwendesa hamwande yakwe kugendela Yesu Kilisito, ditunyo dyuwe kwe mwene majuwa gose. Hano.

Mbuli sa Kumalagisa

²² Nikumutasani wandugusangu, mufumile imbuli ino ina maloleso kosoko nimuwandikilani kwa uguhi.

²³ Manyeni fina imundugusetu Timoseyo kalekeleligwa, imwene yangheja chimwande chokiyona nanye hamwedu ne mwene.

²⁴ Walamuseni wose ifilongosi wose na wasunhile wose. Iwaye awenya Italiya wakumulamusani.

²⁵ Dihewa dyuwe na nyeye mose.