Waebulaniya 11 - Dilagano Disha ku Wanhu wose

Dihuwi

¹ Hambiya dihuwi ni kuwa na chawelu ye finhu ifikuhuwiligwa, ni inyuwa na dihuwi dya simbuli isisikoneka.

² kosoko kwa didyo awanhu wa katali hawafumiligwa ne Mulungu.

³ Kwa dihuwi chimanya fina ichilunga hachumbigwa kwa mbuli ye Mulungu uleke hata ifinhu fikoneka hafigolosigwa kulawa mufinhu ifisikoneka.

⁴ Kwa dihuwi Habili hakamulafila Mulungu nhambiko iswanu lugano kusuma Kaini, iyamugolose yataliligwe uchawelu, iMulungu yakuhomelela kwa kufumila ifilafwa fyakwe; hakafa, ninga kugendela dihuwi dyakwe yenghali longa.

⁵ Kwa dihuwi Henoko yenuligwa kuchanhya uleke yanghone difa; na nghoneke, kosoka Mulungu hakamulonda. Hambiye ugele woyowile yenhati yalondigwe hakahomelelwa fina hakamwendesa Mulungu.

⁶ Kahi bila ya dihuwi isikudahika kumwendesa imwene. Kosoko wowose iyakumusegelela Mulungu yagila yahuwile fina kabaho na fina yakuwengha mageleko wose awekumuhananga imwene.

⁷ Kwa dihuwi Nuhu, yakafuluse kujamigwa ne Mulungu muchanhya ye simbuli isisinhati soneke hakamutegelesa Mulungu na kugolosa ngalawa kosoko ya kuwahonya awanhu we inyumba yakwe; kwa dino hakaliganisa ichilunga muhasi wo uchawelu uwukwija kwa dihuwi.

⁸ Kwa dihuwi Ibulahimu hakafumila foyenangigwe kuluta ahanhu hoyowile yakuhokela uhasi; na hakaleuka, nghamanyile koyekwija.

⁹ Kwa dihuwi hakekala muisi iya ye dihuwiso, kefana mugeni, yekale mumahema hamwedu na Isaka na Yakobo, wahasi hamwedu naye we dihuwiso difane didyo.

¹⁰ Kosoko hakalangaga kumwande ku kaya iyina singindiso, imujengaji na Mugolosaji wakwe ni Mulungu.

¹¹ Kwa dihuwi Sala imwenyecho hakahokela ludole lwo usokesi, hamwedu hakaloka ichigele che cheleko hakamuhuwila imwene muchawelu iyahuwise.

¹² Hambiya kugendela munhu yumwedu, na imwene hakowa munhu muswanu ninga yefane yafile, hachelekwa cheleko chingi kifana nyelesi sa kulanga kahi nghukudaha kutala kifanadisanga idyuwile mungingi ye bahali.

¹³ Awano wose hawafa mwihuwi wasinhati wahokele ichalaganiswe, ninga wafuluse kuchona na kubwedelela kwa kutali, na kumanya fina hawowa wageni na wagendaji muchilunga.

¹⁴ Kosoko awanhu awekulonga simbuli sifane siso wakonesa chalinje fina wakukongha iisi yawo yo kwikala.

¹⁵ Kusigwe hawadogaga kosoko ye iisi yiyo yowaleuke, hawowa wakuwa na luneka lwa kuya.

¹⁶ Ninga ifene foyuwile, wakuhananga iswanu, iyakulanga. Nochanghone Mulungu nghakona chinyala kwinangigwa Mulungu wawo, kosoko kawatandila kaya.

¹⁷ Kwa ihuwi Ibulahimu foyagesigwe, hakamulafa Isaka yowe nhambiko na imwene iyahokele amahuwiso hakafumila kumulafa imwanagwe yumwedu,

¹⁸ imwene hailongigwa, Kugendela Isaka icheleko chako chokwinangigwa.

¹⁹ Hakadogaga fina Mulungu yakudaha kuwenula wanhu hata kulawa kuwafile; kamei kulonga kwa konesa, hakamupata imwene kunyuma.

²⁰ Kwa dihuwi Isaka yalafa umoti wa majuwa gekwija kwa Yakobo na Esau.

²¹ Kwa dihuwi Yakobo, ugele wo kufa, hakamumotesa chila mwana wa Yusufu, kwa kufuga yegame ditwi mumhando yakwe.

²² Kwa dihuwi Yusufu, kundumiliso yo uwumi wakwe yatambula simbuli so kuleuka kwawo wana wa Isilaeli, na kulagisa muchanhya ya masiko gakwe.

²³ Kwa dihuwi Musa, ichigele cho kwelekwa kwakwe hakafisigwa minyesi midatu ne babakwae ne ingina, kosoko hawona imwana hakowa muswanu lugano; kahi wasogohe dilakiso dye mundewa.

²⁴ Kwa dihuwi Musa, foyakulile, hakalema kwinangigwa mwanagwe we mwana we chike wa Falao,

²⁵ hakona ibeka yapate magayo hamwedu na wanhu we Mulungu kusuma kibwedesa muwihi kwa chipisi chidodogi.

²⁶ Hakatala fina kutofuligwa kwakwe kosoko ya Kilisito, ni ugoli mukulu kusuma ugoli we iisi ya Misili kosoko hakalangaga ku imhongesi.

²⁷ Kwa dihuwi hakalewuka Misili, bila ya kogoha inyono ye mundewa; kosoko hakafinyilisa na kumulanga imwene inghekoneka.

²⁸ Kwa dihuwi haika iPasaka na kunyunyisa isakame, ileke imubanaji wa wana we nhula hanju yanghawakwafe.

²⁹ Kwa dihuwi awanhu hawaloka ibahali ya Shamu, kifana muisi inyalile; Amba Awamisili fowagesile kulonga hawonywa munghabu wose.

³⁰ Kwa dihuwi singhasi sa Yeliko hasugwa fosasungulitigwa majuwa mufungate.

³¹ Kwa dihuwi Lahabu we chilanga nghabanigwa hamwedu na waya awechaka chihuliko; kosoko hawanihokela kwa digoya awaya awasakulage.

³² Nani nongechoni kahi? Kosoko ye ichigele idikudahika kwigala simbuli sa Gidioni na Balaka na Samusoni na Yefuta na Daudi na Samwili na sa wagonesi

³³ awene kugendela dihuwi hawasuma siisi isowage na wandewa, hawowa wachawelu, hawapasa ichahuwisigwe, hawagubika imilomo ye sisimba.

³⁴ Hasima umoto na kwihuligwa mumakali ga mapanga. Hawagumigwa ludole kusuma usoka, hawowa fitungati munghondo, hawawinga amakingili ga wageni wowakitowage nawo.

³⁵ Awanawake hawahokela wanhu wawo wafile wenuke mudifa awamonga hawasambasigwa wakulema kudoholeligwa, uleke wenuligwe fiswanu.

³⁶ Awamonga hawagaya kwa kubesigwa na kutoigwa, kahi hata kwigaligwa kuchifungo.

³⁷ Hwatoigwa mawe mpaka kufa, hawadumuligwa kwa misumeno hawakomigwa kwa ipanga hata kusanguligwa kifana ngholo na mhene foikusanguligwa inghingo yakwe, wagaya na kudumangila, na kona usungu,

³⁸ wanhu ambawo chilunga chisagiligwe kuwa nawo. Hawasunguluta munyika na mumatunda, na mumapango na mashimo.

³⁹ Ninga mugagano gose, wasidahile kuhokela dihuwiso dyowahuwisigwe,

⁴⁰ kosoko Mulungu hakalongola kuchikila chinhu chiswanu lugano, uleke chose na wene chimemelekele hamwedu.