Waebulaniya 1 - Dilagano Disha ku Wanhu wose

Imbuli ye Mulungu Kugendela iMwanagwe

¹ Katali iMulungu hakalonga na wababa setu kugendela wagonesi mikangha mingi na kwa njila se hayo hayo;

² ninga majuwa gano kalonga nase kugendela iMwana, yoyamusagule yowe muhasi we finhu fyose, kahi kugendela imwene iMulungu kachumba ichilunga.

³ Imwene yakonesa ditunyo dye Mulungu kahi kena lubonoto lwe nyuwa yakwe, yakolelese ichilunga chose kwa ludole lwe mbuli yakwe. Foyagolose dihojojolo kosoko yo wihi, hakekala mumukono wo Ukulu uko kuchanhyasi,

Ukulu We Mwana we Mulungu

⁴ Kagaluka mukulu muchanhya ya malaika kosoko disina dyoyapatile iswanu lugano kusuma agawo.

⁵ Kosoko kwina malaika yuhoki ugele wowose iyadaha kwinangigwa ne Mulungu, “Agweye kwa mwanangu, 2 diyelo nghweleka”? Ama kahi, “Aniye nokuwa Babakwe, 2 naye kokuwa ukwangu mwanangu.”

⁶ Na kahi, ugele foyekumwigala inhula hanju muchilunga, yekugamba, “Leka awamalaika we Mulungu wose wamufuge imwene.”

⁷ Na ku malaika yekugamba, “Iyekugolosa awamalaika wakwe wowe mheho, na watogomi wakwe malilimba ga moto.”

⁸ Ninga kwi mwana yekugamba, “Undewa wako, Go Mulungu, ni wa majuwa gose na ugele wose, nagwe ukudima digoya majuwa gose muundewa wako.

⁹ Agwe ukwenda ichawelu na kudesekela uwihi; 2 hambiya Mulungu, iMulungu wako kakubaka mafuta ga chinyemi kusuma awayago.”

¹⁰ Kahi, “Agweye, Mundewa nowejawomba iyisi kunghonga na ulanga ni mulimo we mikono yako;

¹¹ nafyo fyobanika, ninga agweye kosigala; fyose fyodaha kulala kifana suke,

¹² kofisinga kifana suke na fyo fyobiduka, nafyo fyobiduka. Ninga agweye kosigala fina fouwile, na iminyaka yako ichaka ndumo”

¹³ Ninga kwina malaika yuhoki yoyadaya kumugamba chigele chochose, “Ikala ulwandi lwo mukono wangu wo kulume, mpaka niweke awanghondo wako chigoda cha kwegamikila migulu”?

¹⁴ Nhafo awo si mimuhe watumigwe kutogoma, kosoko ya wanhu awakwija wahokela uhonya?