Sinhenda 8 - Dilagano Disha ku Wanhu wose

Kwidasigwa kwe dikanisa

¹ Na Sauli hakendesigwa na kukomigwa kwakwe Sitefano. Dijuwa didyo hokulawanisa lwidaso lukulu lugano kwikanisa diya Yelusalemu. Awahuwile wose ninga awaya awatumigwa du, howokiyagala kusiisi sa Uyahudi na Samalia.

² Awanhu awakumogoha Mulungu howomusika Sitefano na kumugolosela mohongesi makulu.

³ Ugele uwo, Sauli hoyogesa kudibana dikanisa. Hoyoluta kwa chila nyumba, hoyowalafa kunje awahuwile, wagosi kwa wanawake, hoyowaguma kwi gelesa.

Imbuli swanu ikuhubiliigwa Samalia

⁴ Awaya awahuwile awakiyagale, howoluta kose kose wakuhubili imbuli iya.

⁵ iFilipo hakadulika mukaya ya Samalia na kumuhubili Kilisito ku wakaya wa baho.

⁶ Awanhu howokihasa kwa chinyemi kuutegelesa simbuli sa Filipo na kona majumo gaya goyagolose.

⁷ Kosoko simhepo sihile isawekalile wanhu wengi, hosilawa sikutula chowe chikulu; kahi na wanhu wengi wowile na utamu wa kuholola vilungo fyawo no filema howohonyigwa.

⁸ Hokukuwa na chinyemi mukaya iya.

⁹ Baho, hahowa na munhu yumonga yakwinangwa Simoni, imwenye yagolose uhayi wakwe mukaya iyo ku majuwa galokile, na kuwatenda wanhu wa Samalia wakisine lugano, yakiyona imwene ni munhu mukulu.

¹⁰ Awanhu wose wakulu na wadodo, hawamutegelesa wakugamba, “Munhu yuno ni udaha uya mukulu we Mulungu.”

¹¹ Hawakwegigwa lugano ne imwene kosoko hawakisina uhayi wakwe kwa majuwa mengi.

¹² Ninga wakahuwile inonga ya Filipo mchanhya ya Imbuli iswanu yo undewa we Mulungu na disina dya Yesu Kilisito, howobatisigwa wanawake na wagosi.

¹³ Hata Simoni imwenyecho hoyohuwila; yakamale kubatisigwa hoyokiyandamila na Filipo, hoyokisina amajumo gagolosagwe na Filipo.

¹⁴ Awaya watumigwa wowile Yelusalemu wakahulike fina awakaya wa Samalia waihokela imbuli ya Mulungu, howowatuma ukwawo Petulo na Yohana.

¹⁵ Wakafike howowawombela awahuwile uleke wahokele Muhe Musunhile;

¹⁶ kosoko ugele uwo Muhe Musunhile hakowa nghenati yamwingile hata yumwedu wao muchiligati yao; ninga hawowa wabatisigwe du mudisina dye Mundewa Yesu.

¹⁷ Petulo na Yohana howowechila mikono awaya wahuwile, awo howohokela Muhe Musunhile.

¹⁸ Baho Simoni yakone fina kwa kwikiligwa mikono na watumigwa wanhu wakuhokela Muhe Musunhile. Kosoko iyo hoyoweng'a Petulo na Yohana mapesa,

¹⁹ yakugamba Ningheni na niye udaha uwo uleke wowose wonikumwichila mikono yahokele Muhe Musunhile.

²⁰ Ninga Petulo hoyomubidula, Wagilile kutali na mapesa gako kosoko kumanya simboto sa Mulungu sikuguligwa kwa mapesa!

²¹ Kwachaka mugawo wowose, kahi ifungu dyodyose mumulimo uno kosoko umoyo usiliganile kumwande ya meso ge Mulungu.

²² Kwa nheifo, ulambe uwihi wako uno na umutase Mundewa naye yakudaha kukonela ubasi amawaso fina gago.

²³ Nikukona kumama wifu mukali na kohigwa na uwihi!

²⁴ Simoni hoyobidula, Dedede, nitasileni kwe Mundewa dinghanipata dyodyose mugago gomulongile.

²⁵ Petulo na Yohana wakamale kulafa uhomelesi wao na kutamula imbuli ya Mundewa, howokuya Yelusalemu. Ugele fowoyage hawahubili imbuli swamu mu fikaya fingi fya Wasamalia.

Filipo yakumubatisa mukulu yumonga wa Esiyopiya

²⁶ Malaika we Mundewa hoyomugamba Filipo, Winuke, ulute kwikulu kwandamila injila ikulawa Yelusalemu kuluta Gasa, (Injila iyo ikugendela munyika)

²⁷ Kamei, hakenuka na kuluta. Ugele wuwo hokuwa na Mwesiyopiya yumwedu, yemhende, munhu yuyo hakowa munyamhala mukulu we sawo ye Kendake, iMundewa we chike we Chiyesiyopiya hakowa munhambo kulawa Yelusalemu kukufuga.

²⁸ Kamei yendeyokuya ukaya hokowa yakwilile umukokoteni ukukwegigwa, munhambo yakwe yendeyosoma chitabu che Mugonesi Isaya.

²⁹ Baho Muhe Musunhile hoyomugamba Filipo, Luta habehi ne mukokoteni uya ukukwegigwa, ukiyandamile nawo

³⁰ Filipo hoyobilimila habehi na digali didyo, hoyomuhulika ayo imunhu yakusoma muchitabu cha Isaya. Baho Filipo hoyomusa, Togola, ukutanga ago go ukosoma?

³¹ Imunhu yuyo hoyobidula, Nodaha kutanga nhani bila munhu kunilongosa? Baho hoyomwinanga Filipo yakwile mwigali dyakwe, yekale naye.

³² Hambiya, difungu dya matulumo masunhile dyoyasomage hadyuwa dino: Hakowa kifana ngholo ikwigaligwa kuchinjigwa; fina ichana che ingholo fochikunyamala posi ugele chikugetigwa, nghagubule mulomo wakwe.

³³ Hakagumigwa chinyala na koneligwa. Hachaka yakudaha kulonga muchanhya ye cheleko chakwe, kosoko uumi wakwe ulewusigwa muchilunga. Imwene naye nghalafile dijwi dyakwe hata chidodogi.

³⁴ Ayo Mwisiyopiya hoyomugamba Filipo, Nitamile, iMugonesi yuno yalonga kosoko yani? Yakulonga kosoko yakwe imwecho ama kosoko ya munhu yungi?

³⁵ Kamei, Filipo hoyokongela baho mu matulumo Masunhile, hoyomutamila simbuli si swanu muchanhya ya Yesu.

³⁶ Fowowile wakugendelela ne inhambo, howofika ahanhu hena meji, kamei imukulu yuya hoyogamba, “Ahanhu hano hena meji mengi: Togola, kwina chochose ichikudaha kunemesa nighabatisigwe?”

³⁷ [Filipo hoyogamba, “Honaga ukuhuwila kwa moyo wako wose ukudaha kubatiswa.” Imwene hoyobidula, “Heye, nikuhuwila fina Yesu Kilisito ni Mwana wa Mulungu.]”

³⁸ Kamei Imukulu yuya hoyolagisa mukokoteni uya wime; awene wose aweli howohumuluka, ayuya imukulu na Filipo hoyomubatisa.

³⁹ Wakalawe mumeji Muhe we Mundewa hoyomutenda Filipo yaleuke bila koneka na yuya Muwesiyopiya nghamonile kahi; ninga hoyogendelela na nhambo yakwe yamemile chinyemi lugano.

⁴⁰ Filipo hotangila kowa Asoto, hoyogenda musikaya sose yakuhubili Imbuli swanu hata foyafikile Kaisalia.