Matayo 4 - Dilagano Disha ku Wanhu wose

Kugesigwa kwa Yesu

¹ Kamei Yesu hoyolongosingwa na Muhe hoyomwigala kunyika, uleke yagesigwe ne luhoma

² Hoyokwikala bila kudiya majuwa makumi mane chilo ne misi, hoyokona njala.

³ Imugesa hoyomwijila hoyomugamba, “Nghonaga gweye no Mwana we Mulungu, gagambe amawe gano gowe mikate.”

⁴ Ninga hoyomubidula hoyogamba, “Itulumigwa fina imunhu nghakudaha kuwa mumi kosoko yo mukate muhala, ninga kwa chila mbuli ikulawa mumulomo we Mulungu.”

⁵ Kamei Luhoma hoyomulonda mpaka ikaya isunhile, hoyomwika kuchisusu chisololoke kuchanhya ye dihekalu,

⁶ hoyomugamba, “Nghonaga gwe no Mwana we Mulungu kilagase hasi; kosoko itulumigwa, Yakwenda yatume malaika wakwe; Wakwenda wakuhokele mumikono yawo; Unghakibulage umugulu wako mwiwe.”

⁷ Yesu yamugamba, “Kahi itulumigwa, ‘Unghamugese Mundewa Mulungu wako.’”

⁸ Kamei Luhoma hoyomulonda mpaka kwitunda ditali lugano, hoyomonesa, undewa wose we chilunga, na uswanu wakwe,

⁹ yamugamba, “Aga gose nikwenda nikwinghe, unghogwa na kunifugamila.”

¹⁰ Kamei Yesu hoyomugamba, “Halawe, Shetani!” Kosoko itulumigwa, “Umufugamile Mundewa Mulungu wako, umufugamile imwene muhala!”

¹¹ Kulawa baho Luhoma hoyomuleka; kamei, howokwija malaika kumutogomela.

Kukonga kwe milimo ya Yesu Galilaya

¹² Kamei Yesu yakahulike fina Yohana kohigwa, hakaluta mpaka Galilaya;

¹³ Hakaleuka Nasaleti, hoyejakwikala Kapelinaumu, ikaya yuwile munhika ye bahali muundewa wa Sabuloni na Nafutali;

¹⁴ uleke iliganile imbuli yalongigwe ne Mugonesi; Isaya yagambile,

¹⁵ “Iisi ya Sabuloni na iisi ya Nafutali, Injila ye bahali, umwambu wa Yolodani, iGalilaya ya Mataifa,

¹⁶ Awanhu waya awekale muchisa wona ujelu mukulu, Nawo wekale muisi ya dinyefu dya difa ujelu uwahulumukila.”

¹⁷ Kulawa ugele uwo Yesu hakakonga kuhubili, na kugamba, “Lambeni, kosoko undewa wa kulanga usegelela.”

Yesu yekwinanga walowaji we sisomba wane

¹⁸ Naye foyendeyogenda munghanda ye bahali ya Galilaya, hakona wandugu weli, Simoni yekwinangwa Petulo ne munduguse Andelea, wakuguma ulwafu lwao mubahali, kosoko hawowa walowaji wa somba.

¹⁹ Yawagamba, “Munyandamile, nikuhananga niwagolose muwe walowa wanhu.”

²⁰ Chimwande howoleka sinyafu sawo, howomwandamila.

²¹ Yogendelela kumwande, yakawona wamonga wandugu weli, Yakobo wa Sebedayo ne munduguse Yohana, wowile mu chiya hamwedu ne Baba yawo Sebedayo, wendewogolosa sinyafu sawo; yawenanga.

²² Chimwande howoleka chiya chawo ne Baba yawo howomwandamila.

Yesu yakufusa, yakuhubili; na kuhonya

²³ Naye yendeyosunguluta Galilaya yose, yakufusa mumasinagogi gawo na kuhubili simbuli siswamu so undewa wa kulanga, na kuwahonya wanhu na matamu gose.

²⁴ Simbuli sakwe hosihulikika ako Shamu yose howomwigalila awanhu wose wowile na si nhamu, awowile na sinhamu se hayo hayo ne magayo, wowile na magini, wowile ne chisilisi, na wowile na utamu wa kuholola, hoyowahonya.

²⁵ Matewa ga wanhu wengi howomwandamila kulawa Galilaya, Dekapoli, Yelusalemu na Uyahudi na umwambu wa Yolodani.