Matayo 26 - Dilagano Disha ku Wanhu wose

Injama yo kumukoma Yesu

¹ Yesu yakamale kulonga simbuli siso sose, hoyowagamba awefusa wakwe,

² “Mumanya fina fogakuloka majuwa meli ikuwa Pasaka, ne Mwana we Munhu yakwenda yasongesigwe na kukomigwa kwa kutungikigwa mwibiki.”

³ Ugele uwo awakulu wa makuhani na wasehe wa wanhu, weja wakitang'anyila mudijumba dye Kuhani Mukulu, iyenangagwa Kayafa;

⁴ Wagolosa masimulisi hamwedu ifene fowakudaha kumukola Yesu kwa chimwefe na kumukoma.

⁵ Ninga howogamba, “Unghowe ugele we sikukuu, ungheje ulawanisa mugogolo ku wanhu.”

Yesu yakubakigwa mafuta Betania

⁶ Imwene Yesu hoyokuwa Betania munyumba ya Simoni mukoma,

⁷ mwanamuke yene chichupa cha mafuta ga malihamu, ga diliho ikulu lugano hakamusegelela na kumwitilila mwitwi dyakwe ugele yekale hachakudiya.

⁸ Awefusa wakwe wakone nhaifo, howosuha, howogamba, “Hasala yaki ino?

⁹ Kosoko amafuta gano hagowa gakudaha kuguligwa kwa mapesa mengi howogawiligwa awakiwa.”

¹⁰ Yesu yakamanye, hoyowagamba, “Nhani mukumwidasa imwanamuke? Kosoko kanigolosela chinhu chiswanu.

¹¹ Kosoko majuwa gose awakiwa mwinawo hamwedu nanye, ninga niye si hamwedu nanye majuwa gose.

¹² Kosoko kwa kunyitilila umutufi wangu amafuta gano, kagolosa nhaifo kosoko ya kutandila amasiko gangu.

¹³ Chawelu, nimukuwatamilani, chila ahakuhubiliigwa imbuli iswamu muchilunga chose, ichinhu chino choyagolose chotambuligwa, kosoko ya kumugelegela.”

Yuda yakufumila kumusongesa Yesu

¹⁴ Ugele uwo iyumonga wa waya ikumi na weli, disina dyakwe Yuda Isikalioti, hakawalutila awakulu wa makuhani,

¹⁵ hakagamba Moningha choni, ninghamulafa ukwenu? Howomuliha fipande makumi madatu fya fesa.

¹⁶ Kulawa ugele uwo yende yohananga luneka lwa kumusongesa.

Yesu yakudiya Pasaka hamwedu ne wefusa wakwe

¹⁷ Dijuwa dya kukonga dye mikate isigumigwe nungo, awefusa wakwe hawamulutila Mundewa Yesu, na kumugamba, “Ukuhananga chigolose hoki uleke ukadiile iPasaka?”

¹⁸ Hakagamba, “Luteni ukaya kwa munhu yumonga, Mukamugambe: ‘Mwalimu yekugamba; ugele wangu wahabehi; ukwako nikuhananga nigolose iPasaka hamwedu na wefusa wangu.’”

¹⁹ Awefusa hawagolosa fina Yesu foyawasigilile kamei hawaitandila iPasaka.

²⁰ Ikowe hegulo hakekala hachakudiya hamwedu na waya wefusa wakwe ikumi na weli.

²¹ Fowendewodiya, hakagamba, “Chawelu nikumutamilani, Yumwedu wenu yakunisongesa.”

²² Hawakona usungu lugano, hawakonga kiyusa yumwe yumwe, “No niye, Mundewa?”

²³ Hakabidula yakugamba, “Iyengise umukono wakwe mwibakuli hamwedu na uwangu, noyakwenda yanisongese.

²⁴ Imwana we Munhu yakuluta ifene foyaandikiigwe, ninga usungu wakwe imunhu yuya imwene yekumusongesa imwana wa Munhu! Hayuwa ibeka kwe munhu yuyo yowile nghelekigwe!”

²⁵ Yuda ayuya imwene yekumusongesa, hoyobidula, “Togola no niye, Mundewa? Hoyomugamba Agweye kuilonga.”

Chakudiya che Mundewa

²⁶ Ugele fowadiyage, Yesu hakalonda mukate, hakaulugutisa, hakaubendula, hakawengha awefusa wakwe, yakugamba, “Londeni mudiye, auno no mutufi wangu.”

²⁷ Hakalonda ichikombe, hakalumba, na kuwengha, yakugamba, “Munywile mose muchichino.

²⁸ Kosoko aino no sakame yangu ya dilagano iikwitika, kosoko ya wengi kuwaleusila uwihi.

²⁹ Ninga nikumutamilani, sikunywa kahi kulawa hambiya difai aino ikulawa mumisabibu, mpaka fonikanikunywa aiya inyisha hamwedu nanye, mu undewa we Babangu.”

³⁰ Kamei wakamale kwimba lwimbo, hawalawa kunje, hawaluta kwitunda dya Miseituni.

Yesu yakulonga kukukanigwa na Petulo

³¹ Noho Yesu hoyowagamba, “Anye mose motija kosoko yangu ichilo chino cha diyelo,” kosoko iandikigwa, “Nikumutowa imudimi, ditewa dye singholo, dyokiyagala.

³² Ninga, fonikwinuka kulawa mu difa, nowalongolela kuluta Galilaya.”

³³ Petulo hakagamba, “Wose wanghatija kosoko yako, aniye sikutija ng'o!”

³⁴ Yesu hakamugamba, “Huwila, nikukutamila agweye, ugele dijogolo disinati dike, ukuwa unikanile, kadatu.

³⁵ Petulo, hoyomugamba, ‘Inghanyagila kufa nagwe, sikukukana ng'o!’ Awefusa wamonga nawo howolonga nheifo.”

Yesu yakutasa Getisemane

³⁶ Yesu hakaluta hamwedu nawo mpaka ahanhu henangagwe Getisemane, hakawagamba awefusa wakwe, “Ikaleni baha, ani nilute kuya nikatase.”

³⁷ Hakamulonda Petulo na awaya awana aweli wa Sebedayo, howokonga kuwa na usungu na kwidasika.

³⁸ Hakagamba, “Nina usungu lugano, kifana kufa. Ikaleni hano, muwe meso hamwedu naniye.”

³⁹ Hakaluta kumwande chidodogi, na kugwa chifunhifunhi, hoyotasa, yakugamba, “Baba, inghadahika, unileusile ichikombe chino cha magayo dino! Ninga si fina fonikuhananga niye, ninga foukuhananga agweye.”

⁴⁰ Hakawejila awaya awefusa, na kuwefika wagonile; hakamugamba, “Petulo Mulemeligwa kwikala meso na niye hata isaa imwedu?

⁴¹ Ikaleni meso, mutase, mungheje mukwingila mumagesa; ichidoga chikufumila, ninga umutufi wechaka ludole.”

⁴² Hakaluta kahi, keli, yakutasa, yakugamba, “Baba nghonaga isikudahika kunileusila ichikombe chino cha magayo, ninghachunywe, foukwenda gweye nofoyuwe.”

⁴³ Hoyokwija kahi, na kuwona wagonile; kosoko ameso gawo hagowa masito.

⁴⁴ Hoyowaleka kahi, hoyoluta, kuwomba lwa kadatu, yakulonga simbuli sisiya.

⁴⁵ Kamei hoyowejila awefusa wakwe, na kuwawagamba, “Munghali mugonile na kubwihila; Langeni, ugele usegelela, Imwana we Munhu yakugumigwa mumikono ya wanhu awena uwihi.

⁴⁶ Inukeni, chigendeni. Langeni, ayuya iyakunisongesa kasegelela.”

Kukoligwa kwa Yesu

⁴⁷ Ugele foyalongage, Yuda, yumwedu, wa awaya ikumi na weli hoyokwija, hamwedu na itewa ikulu dya wanhu wena mapanga na mapulo walawa ku wakulu wa Makuhani na awasehe wa wanhu.

⁴⁸ Na yuya yakumusongesa hakawengha chitangilo, kawagamba, “Wonikwenda nimunonele no yuyo Mukoleni”

⁴⁹ Chimwandemwande, hoyomulutila Yesu, hoyogamba, “Baho hako Mundewa!” Hoyomunonela.

⁵⁰ Yesu hoyomugamba, “Mbwiyangu, golosa idikwigale” Howoluta howogolola imikono yawo, howomukola Yesu.

⁵¹ Langa yumwedu wawo awaya awowile hamwedu na Yesu, hoyogolola umukono wakwe, hoyokwega dipanga dyakwe, hoyomutema imutumishi we kuhani Mukulu, hoyomudumula inghutwi.

⁵² Kamei Yesu hoyomugamba, “Yuwisa dipanga dyako baho hodyowile, Kosoko wose wakukola mapanga wakukomigwa na mapanga.”

⁵³ Kahi ukona fina aniye sikudaha kumutasa iBaba, naye yakunigalila hambiya hano matewa ga wasilikali malaika kumi na meli?

⁵⁴ Amatulumo gomemelesigwa nhani fina agakugamba ikuwa nheifo?

⁵⁵ Ugele uwo Yesu hoyowagamba matewa fina, “Togoleni, mulawa kifana kumukola muhiji, mwina mapanga na mapulo, kosoko ya kunikola? Majuwa gose hanikala Mwihekalu na kufusa, musanikolile.

⁵⁶ Ninga agano gose gagaluka nheifino, uleke amatulumo ga wagonesi gamemelesigwe.” Noho awefusa wakwe wose howotija, howomuleka.

Yesu kudibalasa

⁵⁷ Nawo awamukolile Yesu hawamwigala kwa Kayafa, Ikuhani Mukulu, kowamemile awatulumi na wasehe.

⁵⁸ Na Petulo yeja yandamila kwa hatali, mpaka kwi kumbo dye Kuhani Mukulu, hakengila kugati, na kwikala hamwedu na watumwa yone indumo yokuwa nhani.

⁵⁹ Awakulu wa Makuhani na dibalasa dyose howohananga uhomelesi wo udasi, kosoko ya Yesu, uleke wamukome;

⁶⁰ howoswela kamei, hawalawanisa wahomelesi wengi wa udasi, kulawabaho howolawanisa weli

⁶¹ wakugamba, “Ayuno hakagamba, ‘Yakudaha kudimola dihekalu dya Mulungu, na kudijenga kwa majuwa madatu.’”

⁶² Kamei Ikuhani Mukulu hoyokwinuka hakamugamba, “Nghukubidula mbuli? Awano wakukuhomelesa choni?”

⁶³ Ninga Yesu hakanyamala. Kuhani Mukulu hoyomugamba, “Nikukwilahisa kwa Mulungu imumi: Chitamile, nghona agweye no Kilisito, Mwana we Mulungu.”

⁶⁴ Yesu hoyomugamba, “Agwe nanga kuilonga. Ninga nikumutamilani kulawa hambiya mukwenda mumone iMwana we Munhu yekale kumukono wo kulume wo ludole, yakwija mumafunde ga kuulanga.”

⁶⁵ Ikuhani Mukulu, hoyodega si suke sakwe, yakugamba, “Lubeso. Nhani chikuhananga wahomelesi kahi? Langeni hambiya muhulika ulubeso lwakwe.

⁶⁶ Mukulamula nhani nyeye?” Howobidula, howogamba, “Imwagila yakomigwe.”

⁶⁷ Howomutwila amate kuchihanga, howomutowa, wamonga howomutowa makofi,

⁶⁸ wakugamba, “Agwe Kilisito! Tanga, nani yakutowile?”

Petulo yakumukana Yesu

⁶⁹ Petulo hoyokuwa yekale kunje ye dikumbo; mwamuke yumonga hoyomulutila, hoyogamba, “Agwe nagwe hakuwa hamwedu na Yesu wa Galilaya.”

⁷⁰ Ninga hakakana kumwade ya wose, na kugamba, “Simanyile cho ukulonga.”

⁷¹ Kamei yakalawe kunje mpaka habalasa, mwanamuke yungi hoyomona, hoyowatamila awanhu wowile baho, “Imunhu yuno hakowa hamwedu na Yesu Munasaleti.”

⁷² Hakakana kahi kwa kilaha, “Simumanyile imunhu yuno.”

⁷³ Chikaloke chipisi chidodogi, awaya awowile baho howomwijila Petulo, howomugamba Chawelu agwe nagwe kwa yumwedu wawo, “Kosoko hata inonga yako ikukusongesa.”

⁷⁴ Hoyokonga kuligita na kilaha yakugamba, “Simumanyile imunhu yuno!” Ugele uwo dijogolo hodikwika.

⁷⁵ Petulo hakagelegela imbuli yoyalongile Yesu fina, “Ugele dijogolo disinati dike, agweye ukuwa unikanile kadatu.” Hoyolawa kunje, hoyolila kwa usungu lugano.