Matayo 15 - Dilagano Disha ku Wanhu wose

Amafuso ga Wagono

¹ Baho Mafalisayo na Watulumi kulawa Yelusalemu howomulutila Yesu na kugamba,

² “Nhani awefusa wako wakubana ijadi? Kosoko wasikunawa imikono nghona wakudiya chakudiya.”

³ Hoyowabidula yakuwagamba, “Nhani anye nanye mukubana imisigililo ye Mulungu kosoko ya ijadi yenu?

⁴ kosoko Mulungu yagamba, ‘Mogohe iBabako, ne ing'inako, na Iyakuliga iBabakwe, ama ing'ina, yakomigwe chelu.’

⁵ Ninga anyeye mukugamba, ‘Iyakwenda yamulonge iBabakwe ama ing'ina, Chochose chiwagile kutasigwa kulawa ukwangu niye ni cha Mulungu. Kechaka soko ya kumogoha iBabakwe.’

⁶ Kamei mukuibesa imbuli ye Mulungu kosoko ye ijadi yenu.

⁷ Anye mwina ichimwefe, ni fiswanu foyalongile mugonesi Isaya kosoko yenu, yekugamba,

⁸ ‘Awanhu wano wakunyogoha kwa milomo; Ninga imimoyo yawo ya hatali naniye.

⁹ Nawo wakufuga chaka, Wakufusa amafuso ge misigililo ya Wanhu.’”

Finhu fikumutenda imunhu yowe mwafu

¹⁰ Hoyowenanga matewa hoyowagamba,

¹¹ “Hulikiseni, mumanye! Siyo ichikwingila kumulomo ichikumuguma imunhu uwafu; nanga ichikumulawa kumulomo nochikumuguma imunhu uwafu.”

¹² Noho awefusa wakwe wamulutile wakugamba, “Kumanya fina Mafalisayo fowahulike imbuli iya hawasuha?”

¹³ Hakabidula, “Chila mbeyu iisihandigwe ne Babangu wa kulanga ikung'oligwa.

¹⁴ Walekeni! Awene ni filongosi mudula, wa mudula; na mudula yanghamulongosa imudula miyagwe, wakwenda wahubugile mwikolongo wose foniweli.”

¹⁵ Kamei Petulo hakabidula yakugamba, “Chitamile, imbasi iyo.”

¹⁶ Yesu hoyowagamba, “Hata nyeye nanye mwikali mwechaka misungu?

¹⁷ Munghati mumanye fina chila chikwingila kumulomo chikuloka kunda, na kuluta kutagigwa kucholo?

¹⁸ Ninga ifikulawa kumulomo fikulawa kumoyo; nofikumuguma imunhu uwafu.

¹⁹ Kosoko kumoyo kukulawa magelegela gehile, kukoma, dihabwa, uhiji, uhomelesi wa udasi, na maligo;

²⁰ ago nanga gekumwingha imunhu uwafu, ninga kukudiya na mikono isinawigwe kusikumwingha imunhu uwafu.”

Dihuwi dye mwanamuke

²¹ Yesu yakaleuke uko hoyoluta ulwandi lwa Tilo na Sidoni.

²² Langa mwanamuke yumonga Mukananayo we simhaka sa kuya hoyomwijila, hoyokwinula dijwi, na kugamba, “Unyonele ubasi, Mundewa mwana wa Daudi. Mwanangu we chike, kekaliligwa lugano na simhepo.”

²³ Kahi Yesu nghamubidule mbuli. Awefusa wakwe howomulutila, howomutasa, wakugamba, “Muleke yaleuke, kosoko yakuchijojela kunyuma yetu.”

²⁴ Hakabidula, yekugamba, “Nhumigwa kusingholo sagilile du, se nyumba ya Isilaeli.”

²⁵ Naye hoyokwija hoyomufugamila hoyogamba, “Mundewa nitase!”

²⁶ Hakabidula yekugamba, “Siyo fiswanu kulonda ichakudiya cha wana na kugakubitila amabwa.”

²⁷ Hoyogamba, “Heye, Mundewa, ninga hata amabwa gakudiya chakudiya che sigafu ichikulagala musimesa se wandewa wawo.”

²⁸ Kamei Yesu hoyobidula yekugamba, “Mayi, dihuwi dyako ikulu.” Na yuwe ukwako fina fo ukuhananga. Imwanagwe we chike hoyohona kulawa ugele uwo.

Yesu yakuhonya wanhu itewa

²⁹ Yesu hakaleuka uko, na kufika ulwandi lwa bahali ya Galilaya; hoyokwila kwitunda, hoyokwikala hasi uko.

³⁰ Hawamulutila matewa wakumwigalila fiwete, fidula, fibubu, filema, na wamonga itewa hawaweka hamigulu yakwe; hoyowahonya;

³¹ Kamei amatewa howajuma, wakone fibubu wakulonga, filema wakuhona, fiwete wakugenda; na fidula wakona; howomutunya Mulungu wa Isilaeli.

Yesu yakwigusa ditewa dingi dikulu

³² Yesu hakawenanga wefusa wakwe hoyogamba, “Nikuwonela ubasi amatewa, kosoko gafika majuwa madatu wekala hamwedu na niye, kahi wechaka chinhu cho kudiya; kuwelaga wafungile sikwenda, wangheje wosilika munjila.”

³³ Awefusa wakwe howogamba, “Chopata hoki mikate ahano hanyika, yo kudigutisa ditewa dikulu fina dino?”

³⁴ Yesu hoyowosa, Mwina mikate mingahe? Howogamba, “Mufungate, Na fisomba fikefu.”

³⁵ Hoyowalagisa amatewa wekale hasi;

³⁶ hoyoilonda iya imikate mufungate ne fisomba fiya, hoyolumba, hoyoibendula, hoyowengha awefusa wakwe, awene nawo howowengha amatewa.

³⁷ Howodiya wose, howokwiguta, howodondola ifibendu fisigale fye mikate fisege mufungate, fimemile.

³⁸ Nawo awadiile hawowa wagosi figulu fine, leka wanawake na wana.

³⁹ Hoyowelaga amatewa, hoyokwila mu chiya, hoyoluta ulwandi lwa Magadani.