Maluko 16 - Dilagano Disha ku Wanhu wose

Kwinuka kwa Yesu

¹ Isabato ikaloke Maliamu Magidalene, na Maliamu ing'ina wa Yakobo, na Salome, hawagula mafuta gena mhungile swanu wakamubake.

² Kwikali lwisalwisa, dijuwa dye inghonga dye dijuma, hawaluta kuchilalo ugele dijuwa fodyakongage kutonhomoka.

³ Hawakonga kulonga awecho kwa wecho, “Nani yakuchifingilisila diwe diya hamulango we chilalo?”

⁴ Wakalange na kona diwe diya difulusa kufingilisigwa; nadyo hadyuwa ikulu lugano.

⁵ Hawengila kuchilalo, na kona mwanike yekale ulwandi lo kulume kafala suke njelu, hawakisina.

⁶ Yawagamba, “Munghakisine! Mukumuhananga Yesu Munasaleti, iyatungikigwe. Kenuka muchilalo! Kahechaka hano, halangeni howamwikile.

⁷ Ninga luteni mukawatamile awefusa wakwe, na Petulo: Fina kawalongolela kuluta Galilaya, mukamona uko fina foyamutamileni.”

⁸ Hawalawa kunje, hawabilima kulawa hachilalo, kosoko wakutetema na kisina. Kahi wasamutamile munhu mbuli kosoko hawogoha. [

Yesu yakiyonesa kuwefusa weli

⁹ Naye yakenuke nhosikusiku dijuwa dye inghonga dye kukonga dye dijuma, hoyokiyonesa kunghonga kwa Maliamu Magidalene, imwene wo yamulafa simhepo mufungate.

¹⁰ Aye hoyoluta hoyowatamila awaya awowile hamwedu naye. Nawo wakali hongesa na kulila;

¹¹ Ninga awene fowahulike fina mumi, naye kawona, wasahuwile.

Yesu yakoneka ku wafusa weli

¹² Kahi hakakiyonesa na weli wawo na kena futa ingi; nawo wende wagenda wakuluta kumugunda.

¹³ Awa nawo hawaluta hawawatamila awaya wamonga, awene nawo hawaleka kuhuwila.

Yesu yakiyonesa ku wefusa ikumi na yumwedu

¹⁴ Hanyuma, hakoneka na waya ikumi na yumwedu fowende wodiya. Hokawagombela kosoko ya kuswela dihuwi kwawo na ukugutu we fidoga fyawo, kosoko wasawahuwile awaya awamwonile foyenuke muchilalo.

¹⁵ Hakawagamba, “Luteni kuchilunga chose mukahubili imbuli swanu kwa chila munhu.

¹⁶ Iyakuhuwila na kubatisigwa yakuhona; inghakuhuwila yakulamuliligwa.

¹⁷ Fitangilo fino fikwende fikiyandamile na awaya awakuhuwila. Kwi sina dyangu wolafa si mhepo; wolonga kwa nonga nyisha;

¹⁸ wokola majoka, hata wanghadiya chinhu cha kukoma chisikuwabulaga ng'o; wokwika imikono yawo muwatamu, nawo wakuhona.”

Yesu yakwinuligwa kulanga

¹⁹ Basi Mundewa Yesu yakamale kulonga nawo, hakenuligwa kulanga na kwikala umukono wo kulume we Mulungu

²⁰ Nawo awaya hawalawa hawaluta kuhubili kosekose, iMundewa yakugolosa milimo hamwedu nawo na kumemelesa aiya imbuli kwa fitangilo ifyakiyandamile nayo. Hano.]