Luka 24 - Dilagano Disha ku Wanhu wose

Kwinuka kwa Yesu

¹ Ninga dijuwa dye inghonga ye dijuma, hawaluta kuchilalo, na kulonda amafuta ge imhungile swamu gowagolose.

² Hawona idewe dyo kuhindila difingilisigwa kulawa muchilalo.

³ Ninga fowengile kugati, wasawonile umutufi wa Yesu.

⁴ Fowedasikage kosoko ye imbuli ayo, langa! Wanhu weli wema habehi nawo wena suke njelu swee;

⁵ na fowowile na chogoho na kukinya ameso gawo hasi, awanhu waya hawawagamba, “Nhani mukumulangisa imumi kuwanhu wafile?

⁶ Kahechaka hano, ninga kenuka. Gelegeleni fina foyawatamile foyowile yekali Galilaya,

⁷ fina, Imwana we munhu, kolafigwa mumikono ye wanhu wena uwihi, nawo womusambasa, na mwijuwa dya kadatu kokwinuka.”

⁸ Baho hawagelegela simbuli sakwe,

⁹ na wakoye kulawa kuchilalo, hawawatamila gose go awaya ikumi na yumwedu na wose wasigale.

¹⁰ Awanawake wo, hawowa Maliamu Magidalene na Yoane na Maliamu ing'ina wa Yakobo na wanawake wamonga wowowile nawo, hawawatamila awatumigwa;

¹¹ ninga simbuli asi hasoneka ni sa ubwalasi ukwawo na wasasihuwile.

¹² Ninga Petulo hakenuka na kubilima ku chilalo, hakenama na kulanga kugati hakona isanda iimwene, na hakoya ukaya yakwisina kwa soko ya dilawanise.

Nhambo ya kuluta Emau

¹³ Mwijuwa didyo weli wa wefusawakwe wenda weluta muchijiji chikwinangigwa Emau, utali wa isaa dimwedu nhafi kwa migulu kulawa Yelusalemu,

¹⁴ na wenda wesimulila awecho soko ye simbuli sose silawanise.

¹⁵ Fowasimulilage na kuwanga hamwedu, Yesu imwecho hakawejila na kwilongosa nawo.

¹⁶ Ninga ameso gawo hagahindigwa wanghamutange.

¹⁷ Hakawagamba, “Mbuli saki sino somukugenda mulonga?” Hawema, wakunyahala ifihanga fyawo.

¹⁸ Yumwedu wawo yekinangigwa Kileopa, hoyomubidula, “Agweye kwa mugeni we mwene ku Yelusalemu nghumanyile imbuli ilawanise kuya mumajuwa gano?”

¹⁹ Kawagamba, “Mbuli yaki?” Hawamugamba, “Imbuli ikumuhusu Yesu wa Nasaleti, yowile mugonesi yena udaha mu go yakulonga na kugolosa kumwande ye Mulungu na wanhu,

²⁰ na ifyene wakulu wa Makuhani na wakulu wetu fowamulafile yahokele indamulwa ye difa, kahi yasambasigwe.

²¹ Ninga hachihuwila fina imwene hakowa yakuwakombola Isilaeli. Heye, na kuleka gago gose, diyelo ni ijuwa dija kadatu kulawa gano galawanise.

²² Hamwedu na gago, awanawake wamonga wamwandamilage fina seye, wachitinhusa; hawaluta kuchilalo nhousikusiku.

²³ Na wasawonile umutufi wakwe, na woya wakugamba fina hawalawiligwa na malaika, wawatamile fina ni mumi.

²⁴ Awamonga wowile na seye hawaluta kuchilalo na kona fina awanawake fowalongile, ninga imwene wasamonile.”

²⁵ Hakawagamba, “Anye mu wanhu muwabwalasi! Na wakugutu wa kuhuwila gose galongigwe na wagonesi?

²⁶ Togoleni, isamwagile imubakigwa, yapate magayo gano na kwingila ku undewa wakwe?”

²⁷ Yakonga kulawa Musa na wagonesi wose, kawagubulila mumatulumo masunhile simbuli sose simwagile imwene.

²⁸ Kahi hawachisegelela ichijiji chowalutage. Imwene hakakigolosa fina yakuhananga kugendelela kumwande;

²⁹ ninga hawamulemesa wakugamba, “Ikala na seye, kosoko dijuwa diswa.” Baho hakaluta na kwikala nawo.

³⁰ Foyowile muchakudiya hamwedu nawo, hakalonda umukate kuumotesa, na kaubendula na kuwengha.

³¹ Na ameso gawo hagagubuka na hawamutanga; naye hakaleuka mumeso gawo.

³² Hawakiyusa, Imimoyo yetu isakile mugati yetu foyalongage na seye munjila, foyachigubulilage amatulumo masunhile?

³³ Kamei hawenuka muchigele chichiya na kuya Yelusalemu; na hawawafika awaya ikumi na weli wetang'anyile hamwedu na waya wose wowile nawo,

³⁴ wagambile, iMundewa kenuka chawelu na keyonesa kwa Simoni!

³⁵ Baho, awatumigwa aweli hawawatamila galawanise munjila na fyene fowamutangile mu kuubendula umukate.

Yesu yakiyonesa kwe wefusa wakwe

³⁶ Fowalongage gago, Yesu imwecho hakema mugati yawo na kuwagamba, “Digoya dyuwe ukwenu.”

³⁷ Ninga hawatinhuka na kwingilwa na manhonge, na hawamanya fina wona isoki.

³⁸ Na hakawagamba, “Nhani mukiidasika, na nhani mukiyusa mumimoyo yenu?

³⁹ Langeni imikono ne migulu yangu, fina no niye nimwenecho, nyalabaseni munilange, kosoko umusikule wechaka nyama na maguha fina fomukona ninafo.”

⁴⁰ Na yakalonge gago, hakawonesa imikono ne imigulu.

⁴¹ Na fowowile wenghali kuhuwila kosoko ye inyemo na kukisina, hakawagamba, “Mwina chochose hano chakudiya?”

⁴² Hawamwingha chibendu cha somba ibanikigwe,

⁴³ na hakakilonda na kudiya mumeso gawo.

⁴⁴ Kahi hakawagamba, “Asi no simbuli sonalongile na nyeye, fonowile nikali na nyeye, fina chila chinhu chitulumigwe muchanhya yangu mutolati ya Musa na wagonesi na Musabuli ikuhanangigwa chimemelekele.”

⁴⁵ Noho yawagubulila imisungu yawo wadahe kugatanga amatulumo,

⁴⁶ hakawagamba, “Nofo itulumigwe fina iKilisito kogaligwa, na mwijuwa dya kadatu kokwinuka kulawa kuwanhu wafile,

⁴⁷ na fina kulamba na kulekeleligwa uwihi fikuhanangigwa fihubiliigwe mudisina dyakwe kuMataifa gose kukongela Yelusalemu.

⁴⁸ Anyeye mwa wahomelesi wa simbuli asi.

⁴⁹ Langeni, nomwigalilani ayuya iBaba woyalongile; ninga mwikale mukaya mpaka mufasigwe uludole kulawa kuchanhya.”

Yesu yakukwila kulanga

⁵⁰ Kahi hakawalongosa kuluta mpaka Betania, hakenula mikono yakwe na kuwamotesa.

⁵¹ Foyeja yowa mukuwamotesa, hoyokwitemanula nawo na hakenuligwa kulanga kuchanhya.

⁵² Awene hawamufugamila na hawoya Yelusalemu kwa chinyemi chikulu,

⁵³ Hawekala chigele chose mwihekalu wakumutunya Mulungu.