Filemoni 1 - Dilagano Disha ku Wanhu wose

¹ Aniye Paulo, inyohigwe kosoko ya Kilisito Yesu, na Timoseyo imundugusetu. Chikukwandikila agweye Filemoni mwendigwa wetu, mwituma milimo miyetu,

² na Afiya ilumbudyetu na Alikipo musilikali miyetu hamwedu ne dikanisa idikitang'anyila munyumba yako.

³ Dihewa dyuwe nanye, ne digoya idikulawa kwe Mulungu na kwe Mundewa Yesu Kilisito.

Wendo wa Filemoni ne Dihuwi

⁴ Nikumulumba lugano iMulungu wangu amajuwa gose, fonikuwagelegela munhasai yangu;

⁵ Ifene fonikuhulika isimbuli so uwendo wako, ne dihuwi dowinadyo mwe Mundewa Yesu na wasunhile wose.

⁶ Kahi nikutasa fina uumwedu wochinawo mwihui dyako dyongesele udaha wo kumanya maswanu gose muumi wetu mundugusangu mugati ya Kilisito.

⁷ Uwendo wako unyingha chinyemi lugano na kuhoswa! Kulawa muuwendo wako, fidoga fya wasunhile, fisangalaswa lugano kosoko yako.

Kumutasila Onesimo

⁸ Kosoko iyo nichaka chogoho mugati ya Yesu, kukulagisa ichikuhanangigwa ugolose,

⁹ ninga kosoko ya uwendo nikwenda kukutasa, (aniye Paulo nimusehe na hambiya mufungwa kosoko ya Kilisito Yesu).

¹⁰ Nikukutasa kosoko ye imwanangu Onesimo yonimweleke mwihuwi mugati ye inyohigwa yangu.

¹¹ Iyowage katali munhu chaka ukwako mumilimo yakwe, amba hambiya kagaluka munhu munhusi ukwako na ukwangu.

¹² Nikumuwisa ukwako kwa moyo wangu wose.

¹³ Hanyuwa nikwenda nisigale naye uleke yanhogomele ahanhu hako ugele nyuwile muchifungo kosoko ye mbuli swanu,

¹⁴ aniye sendile kugolosa mbuli yoyose yonghwendile agweye, kosoko yo uswamu wako unghowe fonghukwenda agweye, ninga foulamule gweye kwa kwenda kwako.

¹⁵ Nhagela nochileka yakulekile kwa chigele, uleke uwe naye kwa amajuwa gose,

¹⁶ hambiya, nghefane mutumwa du, amba imutumwa iyohigwe chawelu chawelusi mundugusangu mwendigwa ukwangu kosekose ukwako agweye chimutufi na kwe Mundewa.

¹⁷ Hambiya nghona ukunyona aniye chahamwedu nagwe, muhokele ayuno fina fowowile ukunihokela aniye.

¹⁸ Nghona yakugolosele mbuli yoyose ihile, kahi nghona ukumudai chilunhu chochose noliha niye.

¹⁹ Aniye Paulo nyandika, kwa mukono wangu nimwenyecho aniye noliha. (Sikulonga mbuli yoyose yonikukudai hata gweye gomwenyecho).

²⁰ Heye mundugusangu nikuhananga nyongesa mwe Mundewa, kahi kusangalasa umoyo wangu mu Kilisito.

²¹ Kosoko mhuwila ichihuliko chako nochileka nikuwandikile nimanyile nhafi kogolosa kusuma agene gonilongile.

²² Ugele uwo munyikile ugono, kosoko nikuhuwila fina munhasa yenu modaha kunyona.

Mulamuso wa Kumalagisa

²³ Epafula iyohigwe hamwedu naniye mu Kilisito Yesu, yekukulamusa;

²⁴ hamwedu na Maluko, Alisitako, Dema, na Luka, awekugolosa imilimo hamwedi naniye.

²⁵ Dihewa dye Mundewa Yesu Kilisito, dyuwe hamwedu ne ifidoga fyenu.