2 Yohana 1 - Dilagano Disha ku Wanhu wose

¹ Kulawa kwe musehe kwi Mudala na wanagwe wonikwenda lugano. Siyo andiye du ni mwene, ninga wose awaimanyile ichawelu wakumwendani,

² kosoko ya ichawelu ikwikala umwetu nayo yokuwa hamwedu nase majuwa gose.

³ iMulungu Baba na Yesu Kilisito, iMwana wa Baba, yachinghe dihewa, ubasi na digoya, mu chawelu na uwendo.

Ichawelu na Uwendo

⁴ Nikusekelela lugano kona fina awanago wamonga wakwikala mu chawelu, fina iBaba foyalagise.

⁵ Kosoko iyo nikukutasa gweye Mudala mwendigwa; chose chikiyende. Adino si ilagiso isha dyonikukwandikila ukwako; no dilagiso dyochowile nadyo kulawa kunghonga, chikiyende.

⁶ Uwendo uno wonikulonga ni chikale mukwandamila amalagiso ge Mulungu. Amalagiso ageno gomwahulike kulawa kunghonga ni fina mose mwikale mu uwendo.

⁷ Awadasi wengi wenela iisi yose, awanhu awasikufumila fina Yesu keja kwa mutufi wa chimunhu munhu wa nheifo ni mudasi na munghondo wa Kilisito.

⁸ Muwe meso, uleke munghagilise dyomugolosele milimo, ninga muhokele digelo dyenu dimemelekele.

⁹ Munhu wowose inghakwikala na mafuso ga Kilisito, ninga yakulokanisa, kechaka Mulungu. Wowose yuya yakwikala na mafuso gakwe kenawo wose iBaba na iMwana

¹⁰ Munhu wowose yanghakwijila inghekwigala amafuso gano, munghamuhokele musinyumba senu, kahi munghamulamuse;

¹¹ kosoko munhu wowose yakumulamusa yakuwa miyagwe musinhenda sakwe sihile.

Simbuli so Kumalagisa

¹² Ninago mengi ga kumwandikilani, nikona si fiswanu kumwandikilani kwa kalatasi na wino, ninga nikona nokwija nimwenyecho kumonani na kulonga nanye chimesomeso, uleke ichinyemi chetu chimemelesigwe.

¹³ Awana we lumbudyo musagulwa wakuwalamusani.