1 Timoseyo 2 - Dilagano Disha ku Wanhu wose

Ifuga Mwikanisa

¹ Iyilongolele sose, nikuhananga inhasa, kutasa, utasaji na malumbo figoloseke kosoko ya wanhu wose,

² kosoko ya wandewa na wose awena udaha, uleke chikale mikalile ye toyoyo ye chimulungu ne migendele miswanu

³ Imbuli ni swanu, kahi ifumilwa ne Mulungu Mwihula wetu,

⁴ iyekuhananga awanhu wose wehuligwe kahi wamanye ichawelu.

⁵ Kosoko kwina Mulungu yumwedu, kahi kwina mulamusi yumwedu hagati ya Mulungu na wanhu, imunhu Kilisito Yesu,

⁶ iyakilafile imwenyecho yowe mwihula wa wose, uhomelesi uwejile kwa ichigele chakwe.

⁷ Kosoko ino hanisaguligwa nyuwe muhubili kahi mutumigwa (Nikulonga chawelu, Aniye sikudanha), na mwalimu wa Wamembe mwihuwi ne chawelu.

⁸ Nikuhananga awagosi watase chila hanhu, wenule imikono misunhile chaka nyono hegu kugomba.

⁹ Nheigo kahi awanawake wakihambe suke sa usindamafu, hamwedu na chogoho kahi moyo wichaka makulu, si kwa kushuka njili hegu kwa sahabu na mawe gakwakaika hegu kwa suke sa maliho makulu,

¹⁰ ninga kwa sinhenda siswanu, ifene foiwagile awanawake awekumufuga Mulungu.

¹¹ Imwanamuke yefuse muusindamafu na kwa chogoho chose.

¹² Sikumwingha mwanamuke luneka lwa kufusa hegu kuwalongosa wagosi; yekuhanangigwa yanyamale twi.

¹³ Kosoko Adamu noyakonga kumbigwa, kamei Hawa;

¹⁴ kahi Adamu siyadanhiliswa, ninga imwanamuke noyadanhiliswa na kugwila muwihi.

¹⁵ Ninga imwanamuke kodaha kwihuligwa kugendela icheleko chakwe, yanghagendelela mwihuwi na uwendo na usunhile hamwedu na usindamafu.