Ovilinga 9 - Etestamende Epe Moludhimba

Eliteyululo lyaSaulus

¹ Saulus wa kala ondjedhi yovaitaveli vaMuhona, wa li ama hala oku ve dhipaa. Ye wa ya komuyambethi omunene,

² he mu kumbu, a pewe omikanda, a ende navyo kovanene wodhosinagoga dhomoDamasko, opo e tjiiwe okukambula ovalanduli avehe wondjila yaMuhona Jesus, mboka mbama ka vadha ko, ovalumentu ne ovakadhintu, e ve ete odhonkwatwa koJerusalem.

³ Iya Saulus hiaa li ama hala okuvadha popedhi naDamasko, dhivadhiva wa kondolokwa keen̯i ndyaa dha meulu.

⁴ Saulus wa wila pohi, ha tee ondaka ndjimai mu popitha hai tyaa: “Saulus, Saulus, mo ntaantele tji?”

⁵ Saulus wa yaka ha tyaa: “Muhona, iya oove an̯i?” Ondaka ye mu yaka hai tyaa: “Aame Jesus, ngoka ngumo taata.

⁶ Kulama, enda motjitungwalongo, moka mumo ka heelwa soka hiwa thele okuninga.”

⁷ Ovalumentu mboka mbava li amava ende pamo naSaulus, va t̯a ompalakaka, wo kava popile ondaka noimo. Wo va tyaa ondaka, iya wo kava mwene omuntu noumo.

⁸ Saulus wa kulama, hiaa tya okupathumuka, wa twika, ke ku lwete. Iya ve mu kambula mokuwoko, have mu eta moDamasko.

⁹ Saulus wa kala aa twika oule womatango atatu, ahama li, ye ahama nu.

Saulus ma tjatjwa

¹⁰ MoDamasko mwa li omulongwa umo nguu tiwa oAnanias. Muhona we liholololela ye memoneko, we mu ithana ha tyaa: “Ananias!” Ananias we mu yaka ha tyaa: “Muhona, aame hengu!”

¹¹ Iya Muhona we mu heela ha tyaa: “Kulama, enda koyooJudas komuvanda mbuu tiwa Omuvanda Mbwaavyuukilila, u pule omulumentu Omutarso nguu tiwa oSaulus. Mo ke mu vadha ama kumbu.

¹² Wa mona memoneko omulumentu nguu tiwa oAnanias ame ya kuye, he mu tendeke omawoko e potjipala, a twikuluke.”

¹³ Ananias we mu yaka ha tyaa: “Muhona, mba hipululilwa kovantu ovengi ouhunga nomulumentu hengu, ovipuka ovivi mbyaa ningila ovantu woye ovadhilikwa moJerusalem.

¹⁴ Otjikwawo, huno koDamasko we ya ko nodhonkono ndhaa dha kovayambethi ovanene okukambula ovantu avehe mbamave ku tumbaleke.”

¹⁵ Muhona wa heela Ananias ha tyaa: “Enda ko, mena lyokutya ame mbe mu holowola, a ndjundapele, ye a ivithe ena lyandje koviwan̯a vyovapaani nokodhohamba dhawo nokOvaisraeli.

¹⁶ Ame me ke mu yulikila okutya ovihuna mbima ka mona vi lithike pi, mena lyokutumbaleka ena lyandje.”

¹⁷ Ananias wa kulama, ha i konganda hoka huku kala Saulus. We mu tendeka omawoko ha tyaa: “Mukwetu Saulus, mba tumwa kuMuhona Jesus, ngoka ngwee liholololela ove mondjila hiwa li amo ya huno, wa ntumu okutya u twikuluke, ove u yulithwe Ombepo Ondhilikwa.”

¹⁸ Dhivadhiva momeho aSaulus mwa wa ovipuka mbimavi ngala omatatu, ye ha twikuluka. Saulus wa kulama po, ha tjatjwa,

¹⁹ iya hiaa dhi pokutjatjwa, ha li, tjau ha kala nawa. Saulus wa kala omatango amo novaitaveli womoDamasko.

Saulus ma teetha moDamasko

²⁰ Wa vyuukilila kodhosinagoga, ha teethele ovantu okutya Jesus oye e li OmunwaKalunga.

²¹ Avehe mboka mbave mu tyaa, ve kumwa, have lipula hava tyaa: “Omulumentu hengu nan̯i haye e li ye ngwaa dhipaa ovantu avehe, mbava tumbaleka Jesus moJerusalem? Huno ke dhile okukambula ovantu, e ve twale ngodhonkwatwa kovayambethi ovanene?”

²² Iya Saulus wa vandhipala, ha kumitha Ovajuda womoDamasko, he ve yulikile okutya Jesus oye e li Messias.

²³ Hipa piti omatango omengi, Ovajuda va pangele ompango yokudhipaa Saulus,

²⁴ iya Saulus ompango yawo we i mona. Ovajuda va kala ava vandele povivelo avihe vyotjitungwalongo out̯iku nomutenya, opo ve tjiiwe oku mu dhipaa.

²⁵ Iya ovaitaveli Saulus ve mu pitithila montovi yekuma kout̯iku, have mu thothonokethele pohi mombwe.

Saulus ma teetha moJerusalem

²⁶ Iya Saulus hiee ya moJerusalem, wa lola okuya movalongwa, mbenya avehe ve mu tila, kava itavelele okutya naye wa ila omulongwa watjatjili.

²⁷ Iya Barnabas we mu itha po, he mu twala kovayapostoli. Barnabas wa hipululila ovayapostoli okutya Saulus wa mona Muhona mondjila yokuya koDamasko, ha popi naye. Ye he ve heele uke okutya moDamasko Saulus wa teetha nouvandhi ena lyaJesus.

²⁸ Iya Saulus wa kala povaitaveli, wa enda motjitungwalongo atjihe tjaJerusalem otjo ma teetha ena lyaMuhona Jesus nouvandhi ounene.

²⁹ Saulus nahi u popya nokulitetha ombata nOvajuda mbava popya Otjigreka, iya wo nahi va hala oku mu dhipaa.

³⁰ Iya ovaitaveli ovakwawo hive tji mono, va twala Saulus koKesarea, have mu tumu koTarso.

³¹ Iya eongalo alihe moJudea, moGalilea nomoSamaria lya kala nouwa. Kepopilo lyOmbepo Ondhilikwa eongalo lya tana motjihavelo, ovaitaveli avehe va tumbaleka Muhona.

Petrus moLidda nomoJoppe

³² Petrus wa endaenda hempa na hempenya, ha ka valulila po ovantu ovadhilikwa mbava li mondolopa yomoLidda.

³³ Iya hoka oko a vadha omulumentu nguu tiwa oEneas, ngwaa vela oule wodhombula epandutatu, ouvela wotjinteya.

³⁴ Petrus we mu heela ha tyaa: “Eneas, Jesus Kristus me ku velula. Imuka po, u ninge nawa oviyalo vyoye.” Eneas wa imuka po dhivadhiva.

³⁵ Ovantu avehe mbava kala moLidda nomoSaron ve mu mona, hava ningi ovaitaveli vaMuhona.

³⁶ Iya moJoppe mwa li omukadhintu umo omulongwa nguu tiwa oTabita. (Ena hendi mOtjigreka li tiwa oDorkas, mali tya omenye.) Ye wa kala aa undapa ouwa nokupopila ovathona.

³⁷ Pomatango ngoka Tabita wa kambulwa kouvela, ha t̯i. Iya ovaitaveli va koha olutu lwe, have lu twala mondjuwo yopeulu.

³⁸ Ovaitaveli va vadhwa ava tee okutya Petrus u li moLidda. Iya mena lyokutya Lidda ya li popedhi naJoppe, va tuma ovalumentu vavali kuPetrus nelaka ndimali tyaa: “Alikana kanyauka, indjo kunt̯e!”

³⁹ Petrus wa kulama, ha i nawo. Iya hiee thiki moJoppe, ve mu twala mondjuwo ndjoka yopeulu. Iya ovahepe avehe va li amava lili, hava kondoloka Petrus, have mu yulikile omasanya novikutu mbyoka Tabita mbyaa pampa, tainkolo hiaa li nomwenyo.

⁴⁰ Iya Petrus ovantu avehe we ve pititha pondje. Ye wa twika odhongolo, ha kumbu kuKalunga, wa pilulukila kotjivimbi ha tyaa: “Tabita, imuka po.” Tabita wa pathumuka, hiaa mono Petrus, wa imuka po, ha kala pohi.

⁴¹ Petrus we mu yaka mokuwoko, he mu kulametha. Wa ithana ovaitaveli novahepe, he ve pa ye ae na omwenyo.

⁴² Otjihipululo hehi tja handjana nondolopa aihe yaJoppe. Ovantu ovengi mbave tji tyaa, va itavela muMuhona.

⁴³ Petrus wa kala omatango omengi moJoppe, moyaSimon, omupeli woviyalo.