Ovilinga 8 - Etestamende Epe Moludhimba

¹ Saulus wa li ae yuvite nawa Stefanus hiaa dhipawa. Okudha ketango ndyoka eongalo lyaJerusalem hilya vadhwa komatatetho omanene, ovaitaveli avehe va handjanena movilongo vyaJudea novyaSamaria, kakele vala kovayapostoli.

Saulus ma tatetha eongalo

² Ovalumentu vamo ovatilikalunga va paka Stefanus, wo ve mu lila unene.

³ Iya Saulus wa uta okuhan̯auna po eongalo. Ye wa hita modhonganda, ha kokolola mo ovaitaveli, ovalumentu novakadhintu, he ve yedhilile mokaliwoso.

Evaengeli mali teethwa moSamaria

⁴ Ovaitaveli mbava handjanekwa nyahi, va ya akuhe, hava ka teetha odhondaka dhaKalunga.

⁵ Filippus wa ya kotjitungwalongo tjaSamaria, he ve teethele Messias.

⁶ Owingi wovantu hiwa tyaa hitja popiwa kuFilippus, wa mona ovilingatangan̯eko mbyaa undapa, have litwaa mo nawa okuteelela soka hiaa li ama popi.

⁷ Odhombepo odhombi dha dha mo movantu ovengi, amadhi ulu unene. Ovilema novantu ovengi mbava li novinteya, va velulwa.

⁸ Iya ovantu womotjitungwalongo soka tjaSamaria ve hulukilwe unene.

⁹ Iya motjitungwalongo soka mwa vadhwa omulumentu umo nguu tiwa oSimon, wa li ompule ndjii kumitha Ovasamaria, wa li ae lityaa omunene,

¹⁰ novantu avehe ovanene novanunu ve mu tumbaleka amava tyaa: “Omulumentu hengu oye e li ye nguu tiwaa: ‘Odhonkono odhonene dhaKalunga.’ ”

¹¹ Wo ve litwaa mo muye, mena lyokutya we ve kumitha olule noumpule we.

¹² Iya ovantu hiva itavele ondaka ombwa ndjoka ndjiva teethelwa kuFilippus, ndjimai popi otjilongo tjaKalunga nena lyaJesus Kristus, ovalumentu novakadhintu va tjatjwa.

¹³ Simon omwene naye wo wa itavela Jesus, iya hiaa tjatjwa wa kala puFilippus. Ye wa li aa kuminwa ovilingatangan̯eko novilingankono mbyoka mbyaa li amavi undapwa kuFilippus.

¹⁴ Ovayapostoli womoJerusalem hiva tee okutya Ovasamaria va itavele odhondaka dhaKalunga, ve ve tumina Petrus naJohannes.

¹⁵ Wo hive thiki ko, va kumbila ovaitaveli, opo va pewe Ombepo Ondhilikwa,

¹⁶ mena lyokutya kakwa li aku na noumo muwo ngwaa vadhwa aa pewa Ombepo Ondhilikwa. Wo va tjatjelelwe vala mena lyaMuhona Jesus.

¹⁷ Petrus naJohannes va tendeka omawoko awo kovaitaveli, ovaitaveli mboka hava pewa Ombepo Ondhilikwa.

¹⁸ Iya Simon hiaa mono okutya auhe ngwaa tendekwa omawoko kovayapostoli, wa pewa Ombepo Ondhilikwa, wa etela Petrus naJohannes odhombongo ha tyaa:

¹⁹ “Naame mpa ndjen̯i wo odhonkono, opo auhe ngume tendeke omawoko, a pewe Ombepo Ondhilikwa.”

²⁰ Petrus we mu yaka ha tyaa: “Odhombongo dhoye enda nadho mekeko, mena lyokutya koo ulu okulanda otjali tjaKalunga nodhombongo.

²¹ Koo ulu okuundapa pamo nant̯e, mena lyokutya omalipulo oye kotjipala tjaKalunga kaa vyuukile.

²² Iya liteyulula, u yethe omalipulo oye omavi, kumba kuMuhona e ku ithile po soka hiwa ombo awe lipula momutima woye.

²³ Ame mba mono okutya u na onki unene momutima, ove unkwatwa youlundhi.”

²⁴ Simon wa yaka ooPetrus naJohannes ha tyaa: “Nkumbila ndjen̯i kuMuhona, opo hé vadhwa kovipuka mbyoka mbimwa popi.”

²⁵ Iya Petrus naJohannes hiva dhi pokuhipulula nokuteetha ondaka yaMuhona, va tjuna koJerusalem. Mondjila himava tjuna koJerusalem, va enda amava teethele moulongo owingi wOvasamaria ondaka ombwa.

Filippus nosekulu yokoEtiopia

²⁶ Omweengeli waMuhona wa heela Filippus ha tyaa: “Kulama, enda nokut̯a komakumbinda otjilongo kondjila ndjii heluka koJerusalem okweenda koGasa.” Ondjila hendji i enda moluhandja.

²⁷ Filippus wa kulama, ha i. Iya omulumentu umo ngwaa tumbala wokoEtiopia, wa vadhwa mondjila, ama tjuna konganda. Omulumentu hengu wa li osekulu onene nomuyungi wemona lyaKandake, omukadhintu ohamba yokoEtiopia. Ye wa ile koJerusalem oku ka kumba kuKalunga.

²⁸ Iya napano wa li ama tjuna koyawo, wa li aa kala pohi ketemba lye, ama tanga membo lyomuprofeti Jesaja.

²⁹ Iya Ombepo Ondhilikwa ya heela Filippus hai tyaa: “Enda, u ka kale popedhi netemba ndyoka.”

³⁰ Iya Filippus wa dhamukila ketemba, hiaa tee osekulu himai tanga membo lyomuprofeti Jesaja, we mu pula ha tyaa: “Himo tanga u tji yuvite?”

³¹ Osekulu ye mu yaka hai tyaa: “Me tee vi, andaa kape na nguma nt̯itululile?” Iya osekulu ya ithana Filippus, a londe metemba, ye a kale pohi naye.

³² Osekulu ya li amai tanga pomusonekwa mpamapa tyaa: “Ye wa li ngondhu ndjimai twalwa, i ka dhipawe, wa li ngondjona ndjihai wondala, amai heywa, iya naye otjinyo tje katji popile.

³³ Ye wa nunupikwa, iya ye ahama koywa nawa. Aan̯i nguma ulu okuhipulula odhontekulona dhe? Onkalamwenyo ye kombanda yohi ya andekwa.”

³⁴ Osekulu ya pula Filippus hai tyaa: “Alikana ntjeela ndje okutya omuprofeti ma popi an̯i? Me lipopi omwene ne u na nguma popi?”

³⁵ Iya Filippus wa uta okuthitululila osekulu okudha kesoneko ndyoka nokuteetha ondaka ombwa ndjimai popi Jesus.

³⁶ Iya tainkolo va li amava ende mondjila, ve ya pompuka mpape na omeva. Osekulu ya heela Filippus hai tyaa: “Omeva hoonga! Otjitji himatji ntjaele okutjatjwa?”

³⁷ [Filippus we mu yaka ha tyaa: “Kape na himatji ku tjaele, andaa wa itavele nomwenyo woye auhe.” Osekulu ye mu yaka hai tyaa: “Mba itavele okutya Jesus Kristus oye e li OmunwaKalunga.”]

³⁸ Osekulu ya kulametha etemba. Filippus nosekulu va ya momeva, iya Filippus he mu tjatja.

³⁹ Hiva dhi momeva, Ombepo yaMuhona ya itha po Filippus, osekulu kai mu mwene uke. Osekulu ya twikila ondjila yayo nehuluko enene.

⁴⁰ Filippus wa ka moneka moAsdod, ha ka yatakana movitungwalongo avihe ama teetha ondaka ombwa, katee e ya koKesarea.