Ovilinga 6 - Etestamende Epe Moludhimba

Ovalumentu epanduvali mava holowolwa okupopila ovayapostoli

¹ Iya momatango ngenya otjihavelo tjovaitaveli tja kala amatji ningi otjin̯ingi unene, pa ka kala omalutangu pokati kOvajuda mbava popya Otjigreka nOvaheberi. Ovajuda mbava popya Otjigreka va tanguna okutya etango alihe ovikulya amavi yandjwa, ovahepe vawo va hupa ko.

² Ovayapostoli va onganeka ovaitaveli avehe, have ve heele hava tyaa: “Nt̯e hanawa okuyetha okuteetha odhondaka dhaKalunga, tu litwee mokuyandja ovikulya.

³ Vakwetu, holowolen̯i mokati ken̯i ovalumentu epanduvali, mbave tjiiwa okuliuun̯ikwa, ovanandunge, wo mbave na Ombepo Ondhilikwa. Nt̯e owo matu twaa motjilinga hehi.

⁴ Nt̯e ovene matu hala okulitwaa mealikano nomotjilinga tjeteetho lyodhondaka dhaKalunga.”

⁵ Eongalo alihe lya pandula ondunge yovayapostoli. Iya va holowola Stefanus, omulumentu ngwaa li neitavelo nOmbepo Ondhilikwa naFilippus naProkorus naNikanor naTimon naParmenas naNikolaus lukulu ngwaa li omupaani wokoAntiokia, ngwee lininga Omujuda.

⁶ Eongalo lya eta ovalumentu hemba kotjipala tjovayapostoli, ovayapostoli ve ve tendeka omawoko, have ve kumbile.

⁷ Odhondaka dhaKalunga dha twikila okuhandjana. Otjihavelo tjovaitaveli moJerusalem tja ninga otjingi, nowingi wovayambethi va ninga ovaitaveli.

Stefanus ma kambulwa

⁸ Stefanus wa pelwe elao nodhonkono kuKalunga. Wa undapa ovilingakumithi novilingatangan̯eko ovinene mokati kovantu.

⁹ Iya ovalumentu vamo ve mu t̯ila onki. Ovalumentu mboka va li owomosinagoga ndjii tiwaa: “Osinagoga yovalumentu mbava kutuluka,” moka mumwa li Ovajuda, mboka mbava dha koKireni nokoAleksandria, va uta okutetha Stefanus ombata. Ovantu vamo mbava dha koKilikia nokoAsia, va uta uke oku mu tetha ombata.

¹⁰ Iya Ombepo ya pa Stefanus odhondunge, iya kava ulile uke oku mu yaka ne oku mu tetha ombata.

¹¹ Iya va longa ovalumentu vamo ovimama, opo va kuminine Stefanus va tyee: “Nt̯e twe mu tee ama penye Moses naKalunga.”

¹² Iya ovakuminini va hongaetha ovantu novanene novalongiveta, wo ve ya, have mu kambula, have mu nanene mOtjoongi tjOvanene.

¹³ Wo va eta po ovantu vamo mbava popya ovithithi, hava kuminine Stefanus hava tyaa: “Omulumentu hengu apehe u penya oluvedhe hendu oludhilikwa noveta yaMoses.

¹⁴ Nt̯e twe mu tyaa ama tyaa: ‘Jesus Omunasareta ma ka han̯auna po oluvedhe hendu, ye ha ka lundulula odhonteto ndhitwa pewa kuMoses.’ ”

¹⁵ Avehe mbava li mOtjoongi va tongolola Stefanus hava mono okutya otjipala tje matji ngala otjipala tjomweengeli.