Ovilinga 5 - Etestamende Epe Moludhimba

Ananias naSafira

¹ Iya kwa li omulumentu umo nguu tiwa oAnanias nomukadhe nguu tiwa oSafira. Wo va landetha po otjana tjawo,

² Ananias wa holeka po odhombongo dhimo, omukadhe naye wa li ae tji i. Otjihupe tjodhombongo we tji eta kovayapostoli.

³ Iya Petrus we mu pula ha tyaa: “Ananias, omena lyatji hiwa yetha Satana, a tumine omutima woye, ove ho kembele po Ombepo Ondhilikwa? Omena lyatji wa holeke odhombongo dhimo ndhaa landa otjana tjen̯i?

⁴ Otjana soka tainkolo hóye tji landetha po, katja li otjoye? Hiwe tji landetha po, odhombongo ndhoka ndhaa dha mo, hadhoye? Iya omena lyatji hiwa tokola okuninga nyahoka momutima woye? Havantu wa heele po ovithithi, iya oKalunga wa heele po ovithithi.”

⁵ Ananias hiee tji tee, wa wila pohi, ha t̯i. Ovantu avehe mbava tyaa otjipuka hehi, va vadhelwe kontilo onene.

⁶ Iya mwe ya omatele, hae mu tjikile, hae mu twala pondje, hae mu paka.

⁷ Hipa piti odhowola ndatu, omukadhintu waAnanias we ya mondjuwo moka mumwa li Petrus, ye kaa li ae tji i hitja ningilwa omulumentu we.

⁸ Petrus wa pula Safira ha tyaa: “Ntjeela ndje okutya n̯e nomulumentu woye odhombongo ndhimwa landetha otjana tjen̯i opudho vala mpa?” Ye we mu yaka ha tyaa: “Iinga opudho.”

⁹ Petrus we mu heela ha tyaa: “Omena lyatji n̯e nomulumentu woye mwa tokola okulola Ombepo yaMuhona? Ovalumentu mboka mbava ka pakele omulumentu woye, opo ve li pomuvelo, mave ke ku paka.”

¹⁰ Dhivadhiva Safira we lisata po podhompadhi dhaPetrus, ha t̯i. Omatele e ya mo, haa mono okutya wa t̯i. Wo ve mu twala pondje, have ke mu paka.

¹¹ Eongalo alihe novantu avehe mboka mbava tyaa otjipuka hehi, va tila nodhonkono.

Ovilingatangan̯eko novilingakumithi

¹² Ovayapostoli va ninga ovilingatangan̯eko novilingakumithi ovingi mokati kovantu. Ovaitaveli avehe va li ava onganene pamo motjiwalanda tjaSalomo.

¹³ Kapa li omuntu noumo nguhaa li omwiitaveli ngwaa lolele okuya muwo, nandaku tiwa ovantu ve ve tumbalekele.

¹⁴ Iya otjihavelo tjovantu mbava itavela muMuhona, tja tana. Muwo mwa li ovalumentu novakadhintu ovengi.

¹⁵ Ovantu va eta ovavedhi pondjila, have ve twaa komitala nokoviyalo, opo Petrus hima ende po, otjidhidhimbe tje tji vadhe vamo owomovavedhi.

¹⁶ Kodhondolopa dhopoulaanganda naJerusalem kwa dha ovantu ovengi, hava eta ovavedhi vawo, namboka mbava li nodhombepo odhombi. Wo avehe va velulilwe.

Ovayapostoli mava tatethwa

¹⁷ Omuyambethi omunene novantu ve avehe nOvasadukai va t̯ila onki ovayapostoli.

¹⁸ Va kambulitha ovayapostoli, have ve yedhilile mokaliwoso.

¹⁹ Iya mokati kovit̯iku omweengeli waMuhona Kalunga wa yelula omivelo vyokaliwoso, ha pititha mo ovayapostoli, he ve heele ha tyaa:

²⁰ “Enden̯i motempeli n̯e mu ka hipululile ovantu ovipuka avihe ouhunga nonkalamwenyo hendji ompe.”

²¹ Iya ovayapostoli hive tji tee, va ya omuhuka omunene kotempeli, hava utu okulonga ovantu. Iya omuyambethi omunene pamo novantu ve, va hiva Otjoongi tjawo tjOvanene, ovanene avehe wOvaisraeli, ve ye kotjoonganene. Va tuma odhontumwa kokaliwoso, va ka ete ovayapostoli.

²² Odhontumwa hidhe ya mokaliwoso, ovayapostoli kava vadhelwe mo. Va tjuna, hava ka heela Otjoongi hava tyaa:

²³ “Nt̯e hitwe ya kokaliwoso, twa vadha omivelo avya yedhilwa nawa novayungi amava yungu pomivelo, iya hitwa hiti mo katu vadhele mo omuntu noumo.”

²⁴ Omunene wovayungi wotempeli novayambethi ovanene hive tji tee, ve lipula nonkumwe otjipuka soka hitja ningilwa ovayapostoli.

²⁵ Iya mondjuwo yOtjoongi mwe ya omulumentu umo, he ve heele ha tyaa: “Teelelen̯i, ovalumentu mbenya mbamwa twiile mokaliwoso, ve li motempeli mava longo ovantu.”

Ovayapostoli mava hipulula Jesus kotjipala tjovanene

²⁶ Omunene wovayungi wokaliwoso wa ya pamo novantu ve, hava ka eta ooPetrus naJohannes, kave ve etele kodhonkono, mena lyokutya va li amava tila okudhipawa nomawe kovantu.

²⁷ Wo va eta ovayapostoli, have ve kulametha kotjipala tjOtjoongi tjOvanene, omuyambethi omunene we ve pula ha tyaa:

²⁸ “Nt̯e twe mu heela okutya hámu longo uke ovantu mena lyomulumentu hengu Jesus. Talen̯i tuu himwa ninga nyahoka. Jerusalem atjihe mwe tji yulitha elongo lyen̯i. N̯e hámu tu tendeke ko uke oku tu pa onkali yet̯o lyomulumentu hengu Jesus.”

²⁹ Iya Petrus novayapostoli ovakwawo ve ve yaka hava tyaa: “Nt̯e twa thele okutyaa kuKalunga, hakutyaa kovantu.

³⁰ Kalunga kootateombwale oye a imuna Jesus kout̯e, ngoka ngumwa dhipaa himwe mu papela komutjaakano.

³¹ Omulumentu hengu Jesus, Kalunga we mu yelela peulu kokulyo kwe, a kale Ohongodhi nOmuhupithi, opo a pe Ovaisraeli oluvedhe lwokuliteyulula, va ithilwe po odhonkali dhawo.

³² Nt̯e tudhombangi dhokuhipulula ovipuka hembi pamo nOmbepo Ondhilikwa ndjoka Kalunga ndjaa yandja otjali kovantu mbave mu tyaa.”

Ovayapostoli mava tonwa hava yethwa

³³ Ovanene wOtjoongi hiva tee odhondaka ndhoka, va yumana, hava hala okudhipaa ovayapostoli.

³⁴ Iya omulumentu umo owomOtjoongi tjOvanene, ngwaa li Omufarisai nguu tiwa oGamaliel, omulongiveta ngwaa tumbalekwa kovantu avehe, wa kulama ha tya ovayapostoli ngavetji piti kanunu pondje.

³⁵ Iya Gamaliel wa heela Otjoongi ha tyaa: “Valumentu n̯e wOvaisraeli lungamenen̯i otjipuka himamu hala okuningila ovalumentu hemba.

³⁶ Iya kapa pitile olule, hipe dhile Teudas, he liningi ntumbayangandi, ovalumentu mbava li ave lithike pomathele ane, ve liameka kuye. Iya wa dhipawa, ovantu ve mbave liameka kuye, hava handjanekwa, hava manwa po.

³⁷ Kon̯ima yaTeudas, potembu yovantu hiva li amava hawa, kwe ke ya Judas Omugalilea. Owingi wovantu we mu landula, iya naye wo wa dhipawa, ovantu ve avehe hava handjanekwa.

³⁸ Iya ndino me hala oku mu heela okutya ovalumentu hemba, hámu ve ningile ouvi. Ovayapostoli hemba ve yethen̯i vala, andaa otjilinga hehi tjawo tja dha momuntu, matji ka hula,

³⁹ iya andaa tja dha muKalunga, kamu na himamu ulu. Mamu ke limona vala okutya mamu kondjetha Kalunga.” Otjoongi tjOvanene tja tambula epukululo lyaGamaliel.

⁴⁰ Ovanene wOtjoongi va ithanununina mo ovayapostoli, hava heele ovayungi, ve ve tone, have ve anda okutya háva popi uke mena lyaJesus, tjau have ve yetha.

⁴¹ Ovayapostoli va dha mOtjoongi tjOvanene ave hulukwa, mena lyokutya Kalunga we ve tala okutya va yauka okutatethelwa ena lyaJesus.

⁴² Ovayapostoli etango alihe motempeli nomodhonganda kava yethele okulonga nokuteetha ondaka ombwa ndjimai popi okutya Jesus oye e li Messias.