Ovilinga 4 - Etestamende Epe Moludhimba

Petrus naJohannes mava kambulwa

¹ Petrus naJohannes tainkolo va li amava popitha ovantu, ovayambethi nomunene wovayungi wotempeli nOvasadukai ve ya kuwo.

² Va li ava yumana, mena lyokutya ovayapostoli va li amava longo ovantu okutya ovat̯e mava ka imunwa kout̯e ngaJesus hiaa imunwa kout̯e.

³ Ve ve kambula, have ve twala mokaliwoso, va kevelele komuhuka, mena lyokutya kwa li akwa toko.

⁴ Iya ovantu ovengi mbava tyaa odhondaka dhaPetrus naJohannes, va itavela muJesus, otjihavelo tjovaitaveli tja li atji lithike pomayovi atano.

Petrus naJohannes mava twalwa mOmpela yOtjoongi tjOvanene

⁵ Iya komuhuka hikwa tji ovatumini wOvajuda novanene novalongiveta va wanena moJerusalem.

⁶ Pompuka mpoka pa li Hannas omuyambethi omunene naKaifas naJohannes naAleksander navamo ovawo womuyambethi omunene.

⁷ Wo va eta Petrus naJohannes, have ve kulametha pontanga, hava utu oku ve pula hava tyaa: “Ovipuka mbika mu vi undapa kodhonkono dhaan̯i nomena lyaan̯i?”

⁸ Petrus we yulithwa Ombepo Ondhilikwa, he ve yaka ha tyaa: “Vanene novatumini wotjiwan̯a!

⁹ Iya ndino andaa mamu tu pula ouhunga notjilinga hitja ningilwa otjilema, okutya tja veluka vi,

¹⁰ tji iwen̯i nawa amuhe otjiwan̯a tjaIsrael atjihe okutya omulumentu nguu li kovipala vyen̯i wa velulwa mena lyaJesus Kristus Omunasareta, ngumwa papela komutjaakano, Kalunga we mu imuna kout̯e.

¹¹ Jesus oye ma popiwa momisonekwa himavi tyaa: ‘Ewe ndyoka, n̯e ovatungi ndimwa yekelahi, olyo lya ninga ewe ndyaa tumbala okupon̯a omawe aehe.’

¹² Ehupitho mali moneka vala muye aika, mouye auhe kamu na tja uke ena nolimo Kalunga ndyaa yandja kovantu li tu hupithe.”

Ovayapostoli mava andwa wo hava yethwa

¹³ Ovanene wOtjoongi va kuminwa ouvandhi waPetrus naJohannes nahiva mona okutya ovayapostoli mboka va li vala ovantu mbahava longelwe. Iya wo ve ve ivilwe okutya ovalumentu mboka nahi va kala naJesus.

¹⁴ Iya hiva mono omulumentu hengu ngwaa velulwa, hiaa kulama pamo novayapostoli, kave na uke hiva ula okupopya.

¹⁵ Ovanene wOtjoongi va heela Petrus naJohannes, ve tji pite mo mondjuwo yOtjoongi, wo va tompola

¹⁶ hava tyaa: “Ovantu hemba ngatu ve ninge vi? Iya otjilingatangan̯eko hehi hiva ninga, tja moneka, tjo tji iwe kOvajerusalema avehe, nt̯e kaatu ulu oku tji anya.

¹⁷ Iya otjipuka hehi opo hátji handjana uke mokati kovantu avehe, tu ve anden̯i, ahamava popi uke komuntu noumo ena hendi Jesus.”

¹⁸ Iya va ithanununina mo uke ovayapostoli mboka vavali, have ve heele okutya háva popi, wo háva longo uke ovantu mena lyaJesus nokanunu.

¹⁹ Iya Petrus naJohannes ve ve yaka hava tyaa: “Tokolen̯i vala n̯e ovene, andaa kotjipala tjaKalunga hitja vyuuka okutyaa kun̯e ne okutyaa kuKalunga.

²⁰ Nt̯e kaatu ulu okukala ahamatu hipulula hitwa mona nahitwa tyaa.”

²¹ Ovanene wOtjoongi ve ve anda nodhonkono, have ve yetha. Wo va mona okutya kaatji tjiiwa oku ve yumaneka, mena lyokutya ovantu avehe va li amava tumbaleke Kalunga mena lyotjipuka soka hitja ningwa.

²² Omulumentu ngoka ngwaa ningilwa otjilingatangan̯eko, wa li nodhombula ndhaa pon̯a pomilongo vine.

Ovaitaveli mava kumbu va pewe ouvandhi

²³ Iya Petrus naJohannes hiva yethwa, va ya kovakwawo, have ke ve hipululila ovipuka avihe mbiva heelwa kovayambethi ovanene nokovanene wotjiwan̯a.

²⁴ Ovaitaveli hive tji tee, va kumba kuKalunga nomutima umo hava tyaa: “Muhona, oove wa uta eulu nohi nelunga novipuka avihe mbii li mo.

²⁵ Oove wa popitha omuntu woye, tateombwale David kodhonkono dhOmbepo Ondhilikwa hiaa popya ha tyaa: ‘Omena lyatji ovapaani hiva puha, omena lyatji ovantu hiva panga ompango yomawoova?

²⁶ Odhohamba dhokombanda yohi dhi longekedha ovita, ovatumini ve litwaa kumo, hava kondjetha Muhona, wo hava kondjetha Messias we.’

²⁷ Iya Herodes naPontius Pilatus pamo novapaani notjiwan̯a tjaIsrael va ongana motjitungwalongo hehi okukondjetha Jesus, omuntu woye omudhilikwa, ngoka nguwa ninga Messias.

²⁸ Wo va ongana, opo va kondjethe atjihe soka ove omwene kodhonkono dhoye nokehalo lyoye hiwa twaa po ae lukulu tji ningwe.

²⁹ Muhona, taa tuutuu himave tu tilitha, nt̯e tuvantu woye. Tu pa wo ouvandhi wokuteetha odhondaka dhoye.

³⁰ Yela okuwoko kwoye okuvelula ovavedhi, ove u undape ovilingatangan̯eko novilingakumithi mena lyaJesus, omuntu woye omudhilikwa.”

³¹ Ovaitaveli hiva mana okukumba, oluvedhe mpoka mpava li amava kumbile, hapa teketa. Wo avehe ve yulithwa Ombepo Ondhilikwa, hava utu okupopya nouvandhi odhondaka dhaKalunga.

Ovaitaveli mava twaa kumo emona lyawo

³² Ovaitaveli avehe va li nomutima umo nomalipulo amo. Kapa li omuntu noumo ngwaa li ama ulu okutumbula okutya otjipuka tjomemona lye otje omwene, iya ve liyandjela atjihe hiva li natjo.

³³ Ovayapostoli va hipulula nodhonkono adhihe okutya Muhona Jesus wa imunwa kout̯e, Kalunga avehe we ve pa elao en̯ingi.

³⁴ Mokati kawo kamwa li omuntu noumo ngwaa hepa. Mboka mbava li novyana ne odhonganda, ve vi landetha po, odhombongo ndhoka ndhaa dha mo, have dhi eta

³⁵ kovayapostoli, dhi yandjelwe ovaitaveli, opo auhe a pewe hitji lithike puhima hepa.

³⁶ Josef, Omulevi ngwaa yumukilwa moKipros ngoka ovayapostoli nguva ithana Barnabas (ena ndyoka li tya omuvandhipalethi),

³⁷ naye wa landetha po otjana tje, odhombongo ndhoka he dhi eta, ye he dhi yandja kovayapostoli.