Ovilinga 3 - Etestamende Epe Moludhimba

Omulumentu otjilema ma velulwa

¹ Petrus naJohannes va ile kotempeli mondatu yokomatango, ndjaa li owola yokukumba.

² Omulumentu umo ngwaa yumukwa otjilema, etango alihe u tjindwa, ha etwa pomuvelo wotempeli, mboka mbuu tiwa Omuvelomuwa, mpaa kumbila odhombongo kovantu mbamava hiti motempeli.

³ Omulumentu hengu hiaa mono Petrus naJohannes, hiva li amava hiti motempeli, we ve kumba, ve mu pe odhombongo.

⁴ Petrus naJohannes ve mu tongolola, Petrus ha tyaa: “Tala kunt̯e!”

⁵ Iya we ve tongolola, he liun̯ike okutya pamo mave mu pa odhombongo.

⁶ Iya Petrus we mu heela ha tyaa: “Ame hí na tja odhombongo, iya hehi hindji na tjo, otjo me ku pa. Mena lyaJesus Kristus Omunasareta me ku heele okutya kulama, enda.”

⁷ Iya we mu yaka mokuwoko kwe kwokokulyo, he mu kulametha, iya dhivadhiva odhompadhi nodhongunyu dhe hadhi kolo,

⁸ iya ye wa lomboka, ha kulama, ha hiti nawo motempeli, wa enda ama lombauka, otjo ma tanga Kalunga.

⁹ Ovantu avehe ve mu mona, hiaa li ama ende, otjo ma tanga Kalunga.

¹⁰ Iya ve mu dhimbuka okutya oye e li ye nguu kala pomuvelo wotempeli mbuu tiwa Omuvelomuwa, a pewe odhombongo, va kuminwa soka hiaa ningilwa.

Petrus ma teethele motempeli

¹¹ Tainkolo omuvelulwa a li nooPetrus naJohannes, ovantu avehe ve kumwa, hava ka dhamukila mo, have ke ve onganena motjiwalanda tjaSalomo.

¹² Iya Petrus hiee ve mono, we ve heela ha tyaa: “Vaisraeli n̯e, hehi tje mu kumithile tji? Mamu tu tongolola tji? Mamu tya pamo omuntu hengu hima ende twe tji ningi kodhonkono dhetu ovene ne kouvyuuki wetu?

¹³ Kalunga kaAbraham, Kalunga kaIsak naKalunga kaJakob, Kalunga kootateombwale, wa tumbaleketha omuntu we Jesus, ngumwa yandja, a dhipawe, hamu litendele ye movipathi vyaPilatus ngwaa pangele ompango yoku mu yetha.

¹⁴ N̯e mwa yekelahi Jesus ngwaa li omuvyuuki, omudhilikwa, n̯e hamu kumbu Pilatus, e mu kutululile omudhipai.

¹⁵ Iya mwa dhipaetha Omuyandjimwenyo. Kalunga ngunya we mu imuna kout̯e, nt̯e tudhombangi motjipuka hehi.

¹⁶ Iya ena hendi ndyaa itavela, lya koleke omulumentu hengu ngumu lwete, ngumu i, neitavelo ndyoka muJesus lya velula omulumentu hengu movipathi vyen̯i.

¹⁷ “Iya napano vakwetu, ame ndji tji i okutya n̯e novanene ven̯i, hehi himwa undapela Jesus, mwe tji undapa vala, mena lyokutya kamu vadhelwe amu tji i.

¹⁸ Iya Kalunga ovipuka hembi we vi hwithila po ae lukulu movinyo vyovaprofeti avehe, hiva popya okutya Messias we ma ka tatethwa.

¹⁹ Iya liteyululen̯i n̯e mu tjune kuKalunga, odhonkali dhen̯i dhi ithwe po,

²⁰ opo Muhona Kalunga e ke mu tumine otembu ombwa yomatendeleko. Iya ye me ke mu tumina Messias ngumwa udhikilwa ae lukulu, oye e li Jesus.

²¹ Iya Jesus ma tha okukala meulu, katee Kalunga ovipuka avihe me vi ningi ovipe, Kalunga ngahi a popya ae lukulu okupitila movinyo vyovaprofeti ve ovadhilikwa.

²² Iya Moses wa tile: ‘Muhona Kalunga ken̯i me ke mu holowolela umo owomovantu ven̯i, a kale omuprofeti ngahi a ntjolowolele. Omuprofeti ngoka mu tyeen̯i movipuka avihe mbime mu heele.

²³ Ngoka nguhama itavele komuprofeti hengu, ma ithwa mo, ye kaa ka kala uke owomovantu vaKalunga.’

²⁴ Iya ovaprofeti avehe okudha kuSamuel novapopi avehe mbave mu landula, va thimbila ouhunga womatango henga.

²⁵ On̯e odhompinga dhovaprofeti nodhewaneneno, Kalunga ndyaa ninga nootateombwale, hiaa heela Abraham ha tyaa: ‘Moluyumuko lwoye omaanda aehe mouye maa ka pewa elao.’

²⁶ Kalunga hiaa imuna omuntu we kout̯e, olutenga we mu tuma kun̯e, he mu pa elao hiaa teyulula ovantu avehe komauvi awo.”