Ovilinga 26 - Etestamende Epe Moludhimba

Paulus me lipopile kotjipala tjaAgrippa

¹ Agrippa wa heela Paulus ha tyaa: “U na okaluvedhe kokulipopila.” Iya Paulus wa yela okuwoko, he lipopile ha tyaa:

² “Hamba Agrippa! Ndji lwete okutya ame ndjimunalao himba yandjelwa okulipopila kotjipala tjoye ndino hendi mena lyovipuka avihe mbyoka ovanene wOvajuda mbimava nkondjethele,

³ unene tuu ove hiuu i nawa odhonteto nomapulo aehe Ovajuda, iya ame me ku kumbu u nteelele nonkenda.

⁴ “Ovajuda avehe va iwa okukula kwandje okudha koulele, himba kala motjiwan̯a tjandje nahimba kala moJerusalem.

⁵ Wo okudha lukulu ve ndji i, andaa mava hala okuhipulula okutya naame lukulu mba li Omufarisai wopaati ndjoka ndjaa kambulitha eitavelo lyetu.

⁶ Napano mba kulama hempa me koywa mena lyekevelelo lyeun̯iko ndyoka Kalunga ndyaa udhikila ootateombwale.

⁷ Omaanda etu omulongo naavali a un̯ika eudhiko hendi okutya mali hwithilwa po, himaa undapele Kalunga omutenya nout̯iku. Ekevelelo hendi, hamba omutumbalekwa, olyo me kondjethelwa kovanene wOvajuda!

⁸ Iya omena lyatji n̯e Ovajuda mamu anya okwiitavela okutya Kalunga ma imuna ovat̯e?

⁹ “Naame wo mba li ame lipula okutya mba thele okukondjetha nodhonkono adhihe ena lyaJesus Omunasareta.

¹⁰ Otjo mba ningile wo moJerusalem, he yedhilile ovantu ovadhilikwa ovengi mouliwoso, himba pelwe odhonkono kovayambethi ovanene. Nahiva ka koyelwa et̯o, naame mbe tji itavela.

¹¹ Ovikando ovingi mbe ve tonetha modhosinagoga adhihe, mba kondja oku ve n̯in̯ikidha, opo va anye eitavelo lyawo. Ame mbe ve toyele unene, katee mbe ke ve lambalamba kovitungwalongo vyovilongo vimo.”

Paulus ma hipulula okuliteyulula kwe

¹² “Hamba Agrippa, etango limo mba li ame i koDamasko, mba li nodhonkono ndhimba pelwe kovayambethi ovanene.

¹³ Iya himba li mondjila mokati komutenya, hamba omutumbalekwa, mba mona otjiten̯i otjinene hitja dhi meulu, hitja pon̯a potjiten̯i tjetango, hatji tu kondoloka pamo novakwetu mbatwa li nawo.

¹⁴ Nt̯e atuhe twa wila pohi, ame mba tyaa elaka ndimali mpopitha mOtjiheberi hali tyaa: ‘Saulus, Saulus, mo ntaantele tji? Ove mo liihametha omwene, himo sana motjimuti ngonani amai sana motjimuti tjomwiiomboli.’

¹⁵ Iya ame mbe mu pula he tyaa: ‘Muhona, iya oove aan̯i?’ Ye wa ndjaka ha tyaa: ‘Aame Jesus, ngoka ngumo taata.

¹⁶ Iya kulama nodhompadhi dhoye. Ame mbe lihololola kwoove, opo ndji ku holowole, u kale omuntu wandje, ove u ka hipululile ovantu soka hiwa mono ndino, nambyoka mbime ke ku yulikila komeho.

¹⁷ Ame me ke ku hupitha momawoko Ovajuda nomomawoko ovapaani mboka hume ke ku tuma

¹⁸ okupathumuna omeho awo, opo va dhe mo met̯iku, ve ye motjiten̯i, wo va thiee po etumino lyaSatana, ve ye kuKalunga. Iya ava ndjitavele, mava pewa eithepo lyodhonkali noumpinga pamo novantu ovadhilikwa vaKalunga.’

Paulus ma hipulula ovilinga vye

¹⁹ “Iya hamba Agrippa, ame mba itavela kemoneko lyokeulu.

²⁰ Iya olutenga mba teethela owomoDamasko nowomoJerusalem nowomotjilongo atjihe tjaJudea nomokati kovapaani wo okutya ve liteyulule, ve ye kuKalunga, va undape ovilinga mbyoka mbimavi yulike okutya wo ve liteyulula.

²¹ Mena lyovipuka hembi Ovajuda va nkambulila motempeli, va li amava hala okundhipaa.

²² Iya Kalunga wa mpopila katee kundino hendi, opo mba dhi okukulama hempa, hime hipululile ovantu avehe ovanene novanunu, hí na tjimo hime popi, me popi soka ovaprofeti naMoses hiva tile matji ka ningwa

²³ okutya Messias u tha okut̯a, ye oye ma kala omutenga okwiimunwa kout̯e, opo a teethele Ovajuda novapaani otjiten̯i tjehupitho.”

²⁴ Iya Paulus hiaa li ame lipopile nyahoka, Festus we mu popitha nondaka onene ha tyaa: “Paulus, mo vele komutwe! Okulilonga kwoye unene kwe ku uvalaleka!”

²⁵ Paulus we mu yaka ha tyaa: “Mutumbalekwa Festus, hí uvalalele, me popi otjatjili nodhondaka dhodhondunge.

²⁶ Hamba, ame me ku hipululile ovipuka hembi nomutima auhe, mena lyokutya ove u vi i nawa. Ndji tji i nawa okutya ovipuka avihe hembi we vi koneka, mena lyokutya kavi ningililwe meholamo.

²⁷ Hamba Agrippa, ove wa itavela tuu ovaprofeti? Ame ndji tji i okutya wa itavela.”

²⁸ Agrippa wa yaka Paulus ha tyaa: “Mo tya pamo mo ndingi omukriste mokaluvedhe okathupi?”

²⁹ Paulus we mu yaka ha tyaa: “Katji na otjilinga u tya oluvedhe olule ne oluthupi, ame me kumbu vala Kalunga okutya ove pamo novantu avehe mboka mbamava nteelele napano mu ninge ovakriste ngaame, kakele n̯e vala ahamamu kala modhonkuto.”

³⁰ Iya ohamba Agrippa nomutumini wotjilongo Festus naBernike novantu avehe mboka mbava li pamo nawo, va kulama po, hava i.

³¹ Hiva i, va enda amava tompola hava tyaa: “Omulumentu hengu, ke na hiaa ningi hitja thele oku mu dhipaetha ne oku mu kambulitha.”

³² Agrippa wa heela Festus ha tyaa: “Omulumentu hengu, ngaile wa kutululwa, ohiee liameka vala komukesari.”