Ovilinga 24 - Etestamende Epe Moludhimba

Paulus ma kondjethwa kovanene wOvajuda

¹ Kon̯ima yomatango atano omuyambethi omunene Ananias we ya moKesarea pamo novanene vamo nomunongoveta nguu tiwa oTertullus. Wo va ya komutumini wotjilongo oku ka yandja oumbangi ouhunga naPaulus.

² Iya Paulus hiaa ithanwa, Tertullus wa uta oku mu kondjetha, ha tyaa: “Mutumbalekwa omunene Feliks! Etumino lyoye lyounongo lye tu etela ouwa oun̯ingi, omauwa onkalo mena lyotjiwan̯a hehi, a ningwa.

³ Nt̯e atuhe twe hulukilwa hiwe tu ningila.

⁴ Iya opo hé mana po oluvedhe, me ku kumbu, u teelele etompo lyetu pauthupi, mena lyokutya u na onkenda.

⁵ Iya omulumentu hengu twe mu mona, u ngala ouvela wolutambu nomungwangwaneki mokati kOvajuda avehe mouye auhe. Ye omwene oye e li ohongodhi yopaati yopontyo yOvanasarene.

⁶ Wa kondjetha wo okusilika otempeli, nt̯e hatu mu kambula. [Twa li amatu hala tu mu koye moveta yetu ovene,

⁷ iya ondjai yovita Lisias we ya, he tu nyeka ye kodhonkono.

⁸ Iya ye we tu heela okutya ngatu ye tu mu kondjethele kotjipala tjoye.] Ove omwene mo ulu oku mu pula, u iwe ovipuka avihe hembi, nt̯e mbimatu mu kondjethele.”

⁹ Iya ovanene wOvajuda ve litwaa kumo, hava koleke wo okutya ovipuka mbyoka avihe ovyatjatjili.

Paulus me lipopile kotjipala tjaFeliks

¹⁰ Omutumini wa pa Paulus oluvedhe, a popye. Paulus wa uta okupopya ha tyaa: “Ame ndji tji i okutya ove wa koyela odhombula odhingi motjiwan̯a hehi, ame otjo ndji na ehuluko okulipopila otjipopya tjandje.

¹¹ Ove ngahi mo ulu okwiiwa okutya pa piti vala omatango omulongo naavali okudha ame himba ile koJerusalem oku ka kumba kuKalunga motempeli.

¹² Ovajuda kava mbwene nokanunu ame tanguna novantu motempeli ne ame hongaetha ovantu modhosinagoga ne motjitungwalongo.

¹³ Iya wo kave na oumbangi wovipuka mbimba ningi, humava nkondjethele.

¹⁴ Ame hempa kotjipala tjoye me hipulula okutya ndji undapela Kalunga kootateombwale nokulandula ondjila yaMuhona Jesus, ndjoka wo ndjimava tya ya puka. Mba itavela movipuka avihe mbyoka mbyaa sonekwa moveta yaMoses nomomambo ovaprofeti.

¹⁵ Ame ndji na ekevelelo limo nawo okutya Kalunga ma ka imuna ovantu avehe kout̯e, ovavyuuki nambahave thi ovavyuuki.

¹⁶ Iya ame apehe ndji kondja okutya ndji kale nelityoo lyokomwenyo ndyaa kohoka kotjipala tjovantu notjaKalunga.

¹⁷ “Kon̯ima yodhombula odhingi mbe ya, he etele otjiwan̯a tjandje odhombongo dhokupopila ovathona nokuya okuyamba omayambo.

¹⁸ Iya himba li ame undapa ovilinga hembi, Ovajuda womoAsia va mbona motempeli, mba li ambe likohola. Iya kamwa li owingi wovantu ne otjuuyila.

¹⁹ Iya Ovajuda mboka womoAsia owo va thele okuya kotjipala tjoye, va nkondjethe andaa ndji na mpava mbona amba lundha.

²⁰ Ne hemba mbave li po ngava popye andaa ndji na himba lundha, himba li kotjipala tjOtjoongi tjOvanene.

²¹ Kakele vala himba wololokele, tainkolo mba kulamene kotjipala tjawo he tyaa: ‘N̯e mamu nkoyo, mena lyokutya mba tya ovat̯e mava ka imuka kout̯e.’ ”

²² Iya Feliks ngwaa ivilwe nawa ondjila yaMuhona Jesus, wa tulika ompela. Iya ye wa heela ovanene wOvajuda ha tyaa: “Me ka teelela uke kodhondaka dhen̯i, andaa Lisias, ondjai yovita, we ya.”

²³ Feliks wa heela omunene wovakwavita nguu yunga Paulus okutya nge mu yunge uke, ye nga yandje okaluvedhe komapanga aPaulus, ve mu etele atjihe hima hepa.

Paulus komeho yooFeliks naDrusila

²⁴ Kon̯ima yomatango amo Feliks we ya pamo nomukadhe, Omujuda nguu tiwa oDrusila, Feliks wa ithana Paulus, ye he mu teelele hima hipulula okwiitavela muKristus Jesus himaku hee.

²⁵ Iya Paulus hiaa popya uke ouhunga nouvyuuki neliyungo netango lyekoyo ndimali ya, Feliks wa tila, ye ha tyaa: “Tjau tja hulu, ngotji i, me ke ku ithana uke kon̯ima, andaa mba mono okaluvedhe.”

²⁶ Iya kombinga imo wa li ame lipula okutya pamo Paulus me mu pa odhombongo, iya wa kala ame mu ithana otwingi okutompola naye.

²⁷ Iya hipa piti odhombula mbali, Porkius Festus wa pinga polukalo lwaFeliks. Iya Feliks hiaa li ama hala okulimoneketha nawa kOvajuda, wa thiaa Paulus mokaliwoso.