Ovilinga 20 - Etestamende Epe Moludhimba

Paulus ma pitile moMakedonia nomoGreka

¹ Kon̯ima otjuuyila hitja u pohi, Paulus wa ithana ovaitaveli, he ve vandhipaleke, he ve lekele, ha tyaa: “Kalen̯i po nawa.” Iya he ve thii po, ha i koMakedonia.

² Paulus wa yatakana moulongo noulongo, ha vandhipaleke ovantu nodhondaka odhingi, ha i kotjilongo tjaGreka,

³ ha ka kala ko oule womiedhi vitatu. Tainkolo Paulus a li ama longele, a ende koSiria, wa nongonoka okutya Ovajuda ve mu panga ompango. Iya wa tokolele okutjuna nondjila ndjii pitila moMakedonia.

⁴ Paulus va ile naSopater munkwaPirro, Omuberea, naAristarkus naSekundus owokoTessalonika naGaius Omuderbe, naTimoteus, nOvaasia vavali Tikikus naTrofimus.

⁵ Ovalumentu hemba va tenga koTroas oko ve ke tu kevelela.

⁶ Kon̯ima yotjipito tjomingome mbihavi tuwa ontathi, nt̯e twa kulama nombapolo okudha koFilippi, twa enda po omatango atano okuthika koTroas, hatu kala mo otjivike tjimo.

Okuvalula kwaPaulus kwathiinina moTroas

⁷ Etango lyolutenga lyotjivike nt̯e twa ongana pamo okuliyandjela omungome, Paulus wa popya nawo katee mokati kovit̯iku, mena lyokutya komuhuka ma dhi po.

⁸ Iya mondjuwo yopeulu, moka mutwa li atwa onganene, mwa li amu na odholamba odhingi ndhaa tema.

⁹ Omudhantu umo etele nguu tiwa oEutikus, wa li aa kala pohi pondjanena. Iya Paulus hiaa popi olule, Eutikus wa uta okunyekuka ha lala. Wa wa kondjuwo yopeulu ontyatatu, ha wile pohi, ha tjindwa po aa t̯i.

¹⁰ Iya Paulus wa heluka pohi, he liyumbu kombanda yaEutikus, he mu tjiike ha tyaa: “Hámu tila, u na omwenyo.”

¹¹ Hiaa dhi mpoka ha tjuna kondjuwo yopeulu, wa uta okunyembula omungome ha li, ha utu uke okupopya nawo katee etango lya tumbu, tjau ha i.

¹² Iya wo va twala omudhantu hengu, have mu thindikile koyawo ae nomwenyo, iya hehi tja tendeleka omitima vyawo.

Paulus ma i koMileto

¹³ Nt̯e twa tenga nombapolo, hatu i koAsso tu ka pitile Paulus, mena lyokutya ye wa li ama hala okweenda pohi, he tu heele tu ke mu pitile hoka.

¹⁴ Iya Paulus twa wanene naye moAsso, hatu mu tambula mombapolo, hatu i koMitilene.

¹⁵ Etango lyolutenga twa li odhompalakana naKios, etango etyavali twe thika moSamos, netango etyatatu otjo twe thika moMileto.

¹⁶ Iya Paulus wa tokolele okutya ahama ende moEfeso, opo há mana po oluvedhe lwe moAsia. Ye wa li aa kanyauka, wa li ama hala okutya andaa matji tjiiwa, e ke thike koJerusalem metango lyaPentekoste.

Paulus ma popitha ovanene veongalo Ovaefeso moMileto

¹⁷ MoMileto Paulus wa tuma elaka koEfeso, ha ithana ovanene veongalo, ve ye kuye.

¹⁸ Iya hive ya, we ve heela ha tyaa: “Okudha ketango lyolutenga himba lyata ompadhi yandje moAsia, noluvedhe ndumba kala pun̯e aluhe, mu ndji i okutya mba li vi.

¹⁹ Ame nandaku tiwa Ovajuda va mpangele ompango yokundjetela omaudheu, mba undapela Muhona nelinunupiko alihe nomihodhi.

²⁰ N̯e mu tji i okutya himba li andji teetha nokulonga ovantu poluhandja nomodhonganda dhen̯i, hí na himbe mu holeka, mbe mu yulikila ovipuka mbyoka mbimavi mu popile.

²¹ Iya mba heela Ovajuda nOvagreka, ve liteyulule, wo va tjune kuKalunga, wo va itavele muMuhona wetu Jesus Kristus.

²² Iya napano talen̯i, omutima wandje we likutu, iya me i koJerusalem hoka huhe tji i okutya me ka wanena ko natji.

²³ Iya ame ndji tji i okutya motjitungwalongo atjihe Ombepo Ondhilikwa ya ntjeela okutya odhonkuto nomatatetho mavi nkevelele.

²⁴ Iya kombinga yandje ame híme yavala omwenyo wandje, tjinene vala me hwithile po ovilinga mbyoka Muhona Jesus mbyaa mpa okuundapa, vyokuteetha ondaka ombwa yet̯ilonkenda lyaKalunga.

²⁵ “Iya napano ame ndji tji i okutya n̯e mboka mbamba valulila po, he mu teethele ouhunga notjilongo tjaKalunga, kaamu ka mbona uke.

²⁶ Iya ame ndino otjo me mu heele okutya andaa mwa ka keka, hankali yandje, oyen̯i ovene.

²⁷ Iya ame hí tjunine mon̯ima, mbe mu heela poluhandja ehalo lyaKalunga alihe.

²⁸ Iya litakamethen̯i n̯e ovene mu takamethe otjuunda soka himwa pewa kOmbepo Ondhilikwa oku tji takametha. Kalen̯i ovat̯ita veongalo lyaKalunga, ndyoka ndyee limonena mena lyombindhi yOmuna.

²⁹ Iya ame ndji tji i okutya andaa mba dhi po, omaungu omavi ngahae na onkenda mae ke ya mokati ken̯i oku mu kambula.

³⁰ Ovalumentu vamo owomun̯e mava ka popya ovithithi, hava tyoletha ovaitaveli, ve ve landule.

³¹ Iya lungamen̯i, n̯e mu thipaluke himba ninga odhombula ndatu, ame auhe mbe mu longa nomihodhi omutenya nout̯iku.

³² “Iya napano me mu yandja motjiho tjaKalunga nokodhondaka dhet̯ilonkenda lye. Ye u na odhonkono dhoku mu koleka noku mu pa oumpinga pamo novantu ovadhilikwa ve avehe.

³³ Ame hí na himba halele notjimotjimo, kutya otjisilveri odhombongo ne ovikutu vyomuntu.

³⁴ N̯e mu tji i okutya ame mbe liundapela nomawoko andje omwene okulimonena hime hepa omwene nomapanga andje.

³⁵ Iya movipuka avihe ame mbe mu yulikila okutya twa thele okuundapa hinyahi nodhonkono, hatu popile ovinkundi. Thipaluken̯i odhondaka ndhoka Muhona Jesus omwene ndhaa popya ha tyaa: ‘Okuyandja otjiwa okupon̯a okupewa.’ ”

³⁶ Kon̯ima Paulus hiaa mana okupopya, wa twika odhongolo pamo nawo avehe, ha kumbu.

³⁷ Auhe wa lila, have lipetele kuye, have mu hupita.

³⁸ Wo va li ava etetha onkenda, mena lyokutya Paulus we ve heela ha tyaa: “N̯e kaamu ka mbona uke.” Wo have mu thindikile kombapolo.