Ovilinga 19 - Etestamende Epe Moludhimba

Paulus moEfeso

¹ Iya Apollos tainkolo a li moKorinto, Paulus wa yatakana movilongo vyomalukonko katee e ya koEfeso. KoEfeso wa vadha ko ovaitaveli vamo,

² he ve pula ha tyaa: “Mwa pewa Ombepo Ondhilikwa himwa ninga ovaitaveli?” Wo ve mu yaka hava tyaa: “Aai, nt̯e nkee twa dhile katuya tyaa okutya ku na Ombepo Ondhilikwa.”

³ Paulus we ve pula ha tyaa: “Iya nan̯i mwa tjatjwa etjatjo patji?” Ve mu yaka hava tyaa: “Nt̯e twa tjatjwa etjatjo lyaJohannes.”

⁴ Iya Paulus we ve heela ha tyaa: “Johannes wa tjatja ovantu mboka mbave liteyulula kodhonkali dhawo, he ve heele okutya ngava itavele mungoka ngume ya kon̯ima ye, okutya ngava itavele muJesus.”

⁵ Iya ovantu hiva tee otjipuka soka hitja popiwa kuPaulus, va tjatjelwa mena lyaMuhona Jesus.

⁶ Iya Paulus we ve tendeka omawoko, Ombepo Ondhilikwa hai ya muwo. Va uta okupopya momalaka ngahae iwe, otjo mava teetha odhondaka dhaKalunga.

⁷ Ovalumentu mboka avehe kumo va li omulongo navavali.

⁸ Paulus wa ya kosinagoga, ha tompola nawo, ha kondjo oku ve teethela nouvandhi ouhunga notjilongo tjaKalunga oule womiedhi vitatu.

⁹ Ovantu vamo ve likukutika, hava anya okwiitavela eteetho lyaPaulus, hava penye ondjila yaMuhona Jesus movipathi vyovantu avehe. Iya Paulus we ve thiaa po, ha holowola mo ovaitaveli, ha i nawo kondongetho yaTirannus. Nahi owo a tompola nawo etango alihe

¹⁰ oule wodhombula mbali, katee Ovajuda nOvagreka avehe moAsia va tee odhondaka dhaMuhona.

OomunkwaSkeva

¹¹ Iya Kalunga wa pa Paulus odhonkono okuundapa ovilingankono ovinene,

¹² nangahi tji li wo omalesu novitopa mbyaa t̯in̯ine kolutu lwaPaulus, hive vi tendeke kovavedhi, ovavedhi hava veluka, nodhombepo odhombi hadhi dhi mo movavedhi.

¹³ Ovajuda vamo ovaendaendi ovimbanda va uta oku ka itha mo odhombepo odhombi, amava undapetha ena lyaMuhona Jesus. Va heela odhombepo odhombi hava tyaa: “Me mu anetha okutya mena lyaMuhona Jesus nguu teethwa kuPaulus, piten̯i mo momuntu hengu!”

¹⁴ Mokati kovantu mbava ninga ovipuka hembi mwa li ovadhantu epanduvali womuyambethi omunene Omujuda nguu tiwa oSkeva.

¹⁵ Ombepo ombi ye ve yaka hai tyaa: “Jesus ndji mu i, naPaulus mbe mu tyaa. Iya n̯e, on̯e oowaan̯i?”

¹⁶ Omulumentu ngoka ngwaa li nombepo ombi, we ve lombokela, he ve tono. Monganda va taula mo, hava ka inkola nyahinya ava kulaumuka.

¹⁷ Ovajuda nOvagreka avehe mbava kala moEfeso, hive tji tee, va kambulwa kontilo, hava tumbaleke unene ena lyaMuhona Jesus.

¹⁸ Iya ovengi owomuwo mbava ninga ovaitaveli ve ya, hava hipulula, wo hava hololola ovilinga vyawo.

¹⁹ Iya ovantu ovengi owomuwo va li ava undapetha oumpule wawo, va eta omambo awo oumpule, have e hike po movipathi vyovantu, ondando yao hiya havelwa kumo, ya ninga odhombongo dhotjisilveri omayovi omilongo vitano.

²⁰ Iya odhondaka dhaMuhona dha handjana, hadhi kala nodhonkono.

²¹ Kon̯ima yovipuka avihe mbyaa ningwa ko, Paulus wa tokola okuyatakana moMakedonia naAkaia hima i koJerusalem. Ye wa popya ha tyaa: “Hime dhi ho, me tha okuya koRoma.”

²² Paulus wa tuma ovapopili ve vavali Timoteus naErastus koMakedonia, ye tainkolo me tji kala kanunu koAsia.

Oudheu womoEfeso

²³ Potembu ndjoka pe ya oudheu ounene mena lyondjila yaMuhona Jesus.

²⁴ Iya omuhambuli umo wotjisilveri nguu tiwa oDemetrius, nahi u hambula motjisilveri omathano otempeli yaArtemis. Otjilinga soka tja etela ovanongo vakwawo mbava undapa pamo naye emona en̯ingi.

²⁵ Demetrius wa ongedha ovantu avehe mboka mbava undapa pamo naye nambava undapa otjilinga ngotjawo, ha tyaa: “Vakwetu, mu tji i okutya ouhona wetu tu u mona movipuka hembi.

²⁶ Iya napano mwe tji mono naa nawa, n̯e mu tji yuvite omulumentu hengu Paulus ovipuka mbima ningi. Ye u tya ookalunga mbava undapwa nomawoko ovantu haookalunga, wa hekela ovantu ovengi, he ve ameke kuye, hamomuno vala moEfeso, iya omotjilongo atjihe tjaAsia.

²⁷ Pe na oudheu okutya ovilinga vyetu mavi ka tombwa, hatjo vala atjiika, iya notempeli yakalungakadhona Artemis mai ka kala vala. Ovantu kaava ka tumbaleka uke kalungakadhona Artemis, nguu tumbalekwa moAsia nomouye auhe.”

²⁸ Ovantu hive tji tee va li ava yumana, hava wololoka peulu hava tyaa: “Artemis kalungakadhona kOvaefeso, oye e li omunene!”

²⁹ Otjuuyila hehi tja handjana notjitungwalongo atjihe. Ovantu avehe va lombokela Ovamakedonia vavali, Gaius naAristarkus, mboka mbava endele pamo naPaulus, have ve lambele kontanga yovidhano.

³⁰ Paulus wa li ama hala okupopya komeho yowingi wovantu, atjaa ovaitaveli kave tji itavelele.

³¹ Ovanene vamo uke wotjilongo, mboka mbava li omapanga aPaulus, ve mu tumina elaka have mu kumbu okutya há i ko kontanga yovidhano.

³² Kontanga kwa li vala ovantu mbava ngwangwana, otjo mava wolauluka, amava popi otjontumba notjongandi. Owingi kawa li au tji i okutya va onganene tji.

³³ Ovajuda hiva yundulile Aleksander komeho yovantu, ovantu vamo va li amava tya pamo oye a etetha otjuuyila. Aleksander wa nyimitha ovantu nokuwoko kwe, mena lyokutya wa li ama hala okupopila Ovajuda komeho yowingi wovantu.

³⁴ Ovantu hiva mono okutya Aleksander Omujuda, va uta okuwololoka peulu ngomuntu umo oule wodhowola mbali hava tyaa: “Artemis kalungakadhona kOvaefeso, oye e li omunene!”

³⁵ Kon̯ima omusonekelipo wotjitungwalongo wa nyimitha ovantu, he ve heele ha tyaa: “Vaefeso n̯e, ovantu avehe ve tji i okutya otjitungwalongo tjOvaefeso otjaameni tjotempeli yakalungakadhona omunene Artemis, noyewe edhilikwa ndyoka ndyaa wa meulu.

³⁶ Kape na tja noumo nguma tetha ombata ovipuka hembi. Iya nyimen̯i, hámu undapa ovipuka mbihavya thele okuningwa.

³⁷ N̯e mwa eta ovalumentu hemba huno, nandaku tiwa wo kava vakele mo ovipuka ovidhilikwa vyomotempeli, wo kava penyene kalungakadhona ketu nokoholo.

³⁸ Demetrius novaundapi vakwawo andaa ve na oudheu watja nomuntu wontumba, omatango ngaa tuwa po ovikoya oko e li, nambava koya opo ve li, ngako va ka tangunina hoka.

³⁹ Andaa pe na uke tjimo himamu hala, iya tja thele okutompolwa motjoongi tjotjiwan̯a moveta yotjilongo.

⁴⁰ Iya otjipuka hehi hitja ningwa ndino, matji tu moneketha okutya nt̯e matu ngwangwaneke ovantu, nandaku tiwa hatjo. Kaatu ulu uke okulipopila otjuuyila tjotjipuka hehi.”

⁴¹ Iya hiaa mana okupopya otjipuka hehi, wa heela ovantu ve liyapauke.