Ovilinga 17 - Etestamende Epe Moludhimba

Paulus naSilas moTessalonika

¹ Paulus naSilas va yatakana moAmfipolis nomoApolonia, have ya moTessalonika, mumwa li osinagoga yOvajuda.

² Paulus wa ya kosinagoga ngahi e ilila, hoka huve litetha ombata, he ve suku mOmisonekwa moule wOmasabati atatu ngae lilandula.

³ Iya ye we ve thitululila okutya Messias wa li ae na okutatethwa, kon̯ima ha imuka kout̯e. Paulus ha tyaa: “Iya Jesus, ame ngume mu hipululile, oye e li Messias.”

⁴ Ovajuda vamo va itavela odhondaka dhaPaulus naSilas, hava yembe kuwo, nowingi wOvagreka ovatilikalunga nowingi wovakadhintu mbava tumbalekwa va yemba kuwo.

⁵ Iya Ovajuda ve ve t̯ila onki, hava ongedha ovalumentu wondjaya nambava vadhwa pomalandethelo, va kongolola ovantu, hava tono otjuuyila motjitungwalongo, hava hitilile onganda yaJason, amava taendha Paulus naSilas, ve ve ete komeho yowingi wovantu.

⁶ Iya hihave ve vadhele mo va kokololela Jason novaitaveli vamo kovipala vyovatumini, hava wololoka hava tyaa: “Ovalumentu mboka odhomputji mouye auhe, napano ve li motjitungwalongo tjetu.

⁷ Iya Jason we ve thikithila monganda ye. Wo avehe va tomba elaka lyomukesari Omuroma, mena lyokutya wo va longa ovantu okutya ku na uke ohamba imo, ndjii tiwa oJesus.”

⁸ Elaka hendi hilya teeka, lya ngwangwaneka ovantu novatumini wotjitungwalongo.

⁹ Iya ovatumini va thutitha Jason novakwawo, tjau have ve yetha.

Paulus naSilas moBerea

¹⁰ Iya out̯iku watjo vala mboka ovaitaveli va tuma Paulus naSilas koBerea. Wo hive thiki, va ya kosinagoga yOvajuda.

¹¹ Ovantu womoBerea va li nehalo unene okwiitavela okupon̯a Ovatessalonika. Wo va hopele okuthongonona omisonekwa, andaa Paulus hima popi otjatjili.

¹² Owingi womuwo va ninga ovaitaveli, novakadhintu ovengi Ovagreka ovatumbalekwa novalumentu ovengi Ovagreka va ninga ovaitaveli.

¹³ Iya Ovajuda wokoTessalonika hiva tee okutya Paulus wa teetha odhondaka dhaKalunga moBerea, ve ya ko, hava utu okuhongaetha owingi wovantu, have ve ngwangwaneke.

¹⁴ Ovaitaveli va tuma Paulus dhivadhiva a ende kelunga, iya Silas naTimoteus ve thiwa moBerea.

¹⁵ Ovalumentu mboka mbava thindikila Paulus, ve mu thindikila katee moAtena. Iya va tjuna koBerea nondaka ndjiva lawa kuPaulus ndjimai tyaa, Silas naTimoteus ngave ye dhiva kuye.

Paulus moAtena

¹⁶ Iya Paulus hiaa li ama kevelele Silas naTimoteus moAtena, wa li ae yuvite navi hiaa mona, okutya motjitungwalongo moka mwe yula ovikalunga.

¹⁷ Paulus wa ya kosinagoga yOvajuda oku ka tompola nOvajuda novapaani ovaundapelikalunga, tjo otjo a popya uke etango alihe novantu mbava enda pomalandethelo.

¹⁸ Ovafilosofi vamo Ovaepikuri navamo Ovastoiki ve mu tetha ombata. Ovantu vamo va pula hava tyaa: “Omuntu nguka wa puma, napano ma hala okupopya tji?” Ovakwawo hava tyaa: “Ye ma ngala ma popi kombinga yookalunga kovantu vamo.” Va popya hinyahi, mena lyokutya Paulus wa li ama hipulula Jesus neimuko kout̯e.

¹⁹ Iya va twala Paulus kotjoongi tjokoAreopagi hava tyaa: “Nt̯e matu hala okwiiwa elongo hendi epe ndyuu longa.

²⁰ Ovipuka vimo mbimo tu heele katu vi i, iya nt̯e matu hala tu vi iwe okutya mavi tya vi.”

²¹ Iya ovantu avehe womoAtena nodhongendi ndhii kala mo, kave na uke nahi tjimo hiva undapa, oluvedhe aluhe va kala vala amava hipaulula, otjo mava teelele omalongo omape.

²² Iya Paulus wa kulama komeho yovanene wotjoongi ha tyaa: “Valumentu n̯e Ovaatena! Ame ndji lwete okutya n̯e muvatakamethi movipuka avihe vyeundapelokalunga.

²³ Iya ame mba li ame endaenda motjitungwalongo tjen̯i, mba tala omaluvedhe en̯i omadhilikwa, mbe lipuma motjiyambelo hitja sonekwa hinyahi: ‘Otjiyambelo tjaKalunga nguhe iwe.’ Kalunga ngoka ngumu kumba, nguhamu i, ame oye me mu teethele.

²⁴ Kalunga oye a uta ouye novipuka avihe mbii li mo, oye e li Muhona weulu nowohi, ye ka kala modhotempeli ndhaa tungwa nomawoko ovantu.

²⁵ Kalunga ka hepele okuundapelwa komuntu, mena lyokutya ye omwene oye a pa ovantu avehe omwenyo nomuthuumo kovipuka avihe.

²⁶ Iya Kalunga wa uta oviwan̯a avihe vyovantu mbyaa dha momuntu umo, vi kale kombanda yohi aihe. Kalunga ovantu we ve udhikila odhotembu dhawo nomaluvedhe awo okukala,

²⁷ va taendhe Kalunga andaa pamo mava ulu oku mu vadha noku mu mona nandaku tiwa Kalunga ka kala kokule nant̯e.

²⁸ Kalunga oye e tu kaleka nomwenyo, oye e tu endetha tu kale ngahi tu li hinyahi. Ovanongo vamo va popile ovipuka ngahembi hava tyaa: ‘Nt̯e tudhondele dhaKalunga.’

²⁹ Iya andaa tudhondele dhaKalunga hátu lipula okutya olupe lwe, lwe litha kethano lyotjingoldo ne lyotjisilveri ne lyewe ndyaa hongwa kounongo nokomaeli omuntu.

³⁰ Kalunga we likambulithila ovantu potembu ndjoka hiva li ahave mu i. Iya napano ma heele ovantu avehe akuhe ve liteyulule.

³¹ Iya ye wa twaa po etango hima ka koya ouye pauvyuuki, me ke u koyetha omulumentu ngoka ngwaa holowola. Ye wa yulikila ovantu avehe otjipuka hehi poluhandja, hiaa imuna omulumentu ngoka kout̯e.”

³² Iya hiva tee Paulus hima popi ouhunga neimuko lyovat̯e, vamo ve mu penya, iya vamo hava tyaa: “Nt̯e matu hala okuteelela uke ovipuka hembi mbimo popi.”

³³ Iya Paulus wa dha mo motjoongi.

³⁴ Iya ovantu vamo ve liyembeka kuPaulus, hava ningi ovaitaveli, mokati kawo mwa li Dionisius, umo owomotjoongi tjokoAreopagi, mwa li uke omukadhintu nguu tiwa oDamaris, novakwawo vamo uke.