Ovilinga 16 - Etestamende Epe Moludhimba

Timoteus ma utu okweenda pamo naPaulus naSilas

¹ Paulus we ya koDerbe nokoListra, hukwa li omulongwa nguu tiwa oTimoteus. Ina, naye wa li Omujuda omwiitaveli, ihe wa li Omugreka.

² Ovaitaveli womoListra nowomoIkonium va popila Timoteus mouwa.

³ Paulus wa li ama hala okutya va ende naTimoteus mondjila, iya we mu pititha etanda mena lyokutya Ovajuda avehe mboka mbava li motjilongo soka va li ave tji i okutya ihe yaTimoteus wa li Omugreka.

⁴ Paulus naTimoteus ngahi va kala amava endaenda modhondolopa nodhondolopa, ve ve heela odhoveta ndhaa tuwa po kovayapostoli nokovanene womoJerusalem, ve dhi takamethe.

⁵ Iya omaongalo a kula meitavelo, omatango aehe otjihavelo tjovaitaveli tja enda amatji ningi otjingi.

Paulus ma mono emoneko moTroas

⁶ Paulus naSilas naTimoteus va pitakana motjit̯indwalongo hitji tiwa oFrigia nomoGalatia, Ombepo Ondhilikwa ye ve tjaela okuteethela ondaka yaKalunga moAsia.

⁷ Iya hive ya popedhi naMisia, hava lolo okuya koBitinia, iya Ombepo yaJesus kai ve yethele va ende ko.

⁸ Iya va pitakana poMisia, hava i koTroas.

⁹ Kout̯iku Paulus wa mona emoneko, omulumentu Omumakedonia aa kulama komeho ye, he mu kumbu ha tyaa: “Yauka, u ye tjikoohino koMakedonia, u ye, u tu popile!”

¹⁰ Iya Paulus hiaa mona emoneko, dhivadhiva twa uta okulipula ondjila yokuya koMakedonia, mena lyokutya twa mona okutya Kalunga we tu ithana, tu ka teethe ondaka ombwa kovantu womotjilongo soka.

Eliteyululo lyaLidia moFilippi

¹¹ MoTroas twa dha mo nombapolo, hatu vyuukilile kompanga ndjii tiwa oSamotrake. Iya metango etyavali otjo twa thika koNeapolis.

¹² Hitwa dhi moNeapolis, twa ya kotjitungwalongo tjaFilippi, hitji li otjitungwalongo hitja tumbala moMakedonia, hukwa dhilukila Ovaroma, motjitungwalongo moka twa kala mo omatango amo.

¹³ Iya metango lyEsabati twa pitila momuvelo wotjitungwalongo, hatu i komulonga hoka hutwa li amatu thimbile okutya ku na oluvedhe, Ovajuda huva onganena amava kumbu. Iya hitwe thiki ko, twa kala pohi, hatu popitha ovakadhintu mbatwa vadha ava ongana mpoka.

¹⁴ Pa li omukadhintu umo nguu tiwa oLidia, ngwaa dhile kotjitungwalongo tjaTiatira, nguu landetha ovitopa ovithilantu vyokalu. Omukadhintu ngoka wa li omutilikalunga, wa li ama teelele, Muhona ha patulula omwenyo we okwiitavela soka Paulus hiaa li ama popi.

¹⁵ Iya Lidia pamo nonganda ye hiva tjatjwa, we tu konga tu ye konganda ye, ha tyaa: “Iya amu ndwete okutya ndjimuliun̯ikwa muMuhona, indjen̯i mu kale monganda yandje.” Iya he tu hekele, tu kale puye.

Paulus naSilas mava tuwa mokaliwoso

¹⁶ Etango limo tainkolo twa li mondjila atwa vyuuka kompuka huku kumbilwa, twa wanena nomupikona umo, omukadhona ngwaa li nombepo yokutapetha. Okutapetha kwe kwa etela ovahona ve emona en̯ingi lyodhombongo.

¹⁷ Ye wa landula Paulus pamo nant̯e, ha wololoka ha tyaa: “Ovalumentu hemba ovantu vaKalunga Owokombandambanda! Iya wo mave mu heele ondjila yehupitho.”

¹⁸ Iya omukadhona hengu we tji ninga omatango omengi, hatji ulithwa Paulus. Iya wa piluluka, ha heele ombepo ndjoka ha tyaa: “Mena lyaJesus Kristus me ku heele okutya dha mo muye!” Iya ombepo ya dha mo muye poluvedhe ndoka.

¹⁹ Iya ovahona ve hive tji mono okutya eliun̯iko lyawo lyokumona emona lyodhombongo lya keka, va lombokela Paulus naSilas, have ve kambula, have ve twala koluvedhe lwomalandethelo kovatumini.

²⁰ Iya ve ve twala kovipala vyovatumini wOvaroma hava tyaa: “Ovalumentu hemba Ovajuda mava ngwangwaneke otjilongo tjetu!

²¹ Wo ve tu longa ovipuka nt̯e Ovaroma mbitwa dhilikwa.”

²² Iya owingi wovantu wa uta okutona Paulus naSilas, novatumini va taulitha omidhalo vyovayapostoli, have ve tonetha nodhosokoti.

²³ Iya Paulus naSilas hiva dhi pokutonwa, va yedhililwa mokaliwoso. Omuyungi wokaliwoso wa heelwa okutya nge ve takamethe nawa.

²⁴ Omuyungi wokaliwoso hiaa tee nyahoka, we ve yedhilila mokaliwoso komokati, hava tuwa momukumbi.

²⁵ Iya mokati kovit̯iku Paulus naSilas va kala amava kumbu, otjo mava imbile Kalunga. Odhonkwatwa odhonkwawo dha li amadhi teelele kuwo.

²⁶ Iya dhivadhiva pe ya eteketo lyohi enene, hali teketetha ekulameno lyokaliwoso katee omivelo vya yeluka, nomalyenge odhonkwatwa ha kutuluka.

²⁷ Iya omuyungi wokaliwoso hiaa pathumuka wa mona omivelo vyokaliwoso avya yeluka, wa soka okutya odhonkwatwa adhihe kadhi mo, dha ka inkola. Ye wa nana mo omukonda we, e lidhipae.

²⁸ Iya Paulus wa wololoka peulu ha tyaa: “Hó liningile ouvi watja! Nt̯e atuhe omo tu li.”

²⁹ Iya omuyungi wokaliwoso wa kumba omulilo, ha dhamukile mokaliwoso, wa li ama teketa, ha twike odhongolo podhompadhi dhaPaulus naSilas.

³⁰ Okudha mpoka we ve pititha mo, he ve pula ha tyaa: “Vahona, nge ninge tji, opo ndji hupithwe?”

³¹ Paulus naSilas ve mu yaka hava tyaa: “Itavela muMuhona Jesus, ove u hupithwe nonganda yoye.”

³² Iya wo ve mu teethela odhondaka dhaMuhona pamo novantu womonganda ye avehe.

³³ Iya powola ndjoka yout̯iku omuyungi wa itha po Paulus naSilas, ha ka koha oviwalo vyawo. Iya ye pamo nowomonganda avehe va tjatjwa dhivadhiva.

³⁴ Omuyungi wa twala Paulus naSilas konganda ye, he ke ve pa ovikulya, wa li ae hulukwa unene pamo novantu wonganda ye avehe, mena lyokutya napano wa itavele muKalunga.

³⁵ Komuhuka hikwa tji ovatumini va tuma odhopulisa komuyungi, have mu heele hava tyaa: “Ovalumentu mboka ve yetha!”

³⁶ Iya omuyungi wokaliwoso wa heela Paulus ha tyaa: “Ovatumini va ntumine elaka ndimali tya nge mu yethe mu ende, n̯e naSilas. Iya kulamen̯i mu ende nouwa.”

³⁷ Iya Paulus wa heela odhopulisa ha tyaa: “Wo ve tu tonena movipathi vyovantu, ahatuya koywa, have tu twaa mokaliwoso, nt̯e atu na oukwatjilongo tjaRoma. Napano mava hala oku tu pitithila mo tji meholamo? Aai, kaatji tjiiwa nokanunu! Ovatumini mboka ngave ye huno ovene, owo ve ya oku tu pititha mo.”

³⁸ Odhopulisa dha ka hipululila ovatumini soka hitja popi Paulus. Ovatumini hiva tee okutya Paulus naSilas ve na oukwatjilongo tjaRoma, va li ava tila.

³⁹ Iya va ya kuwo okuliyaya, have ve pititha mo mokaliwoso, have ve pula okutya nomotjitungwalongo tjawo ngava dhe mo.

⁴⁰ Paulus naSilas va dha mo mokaliwoso, hava i koyaLidia. Hoka oko va ka wanena novaitaveli ovakwawo, have ve vandhipaleke meitavelo. Tjau hiva dhi mpoka, hava i.