Ovilinga 15 - Etestamende Epe Moludhimba

Otjoonganene tjomoJerusalem

¹ KoJudea kwa dha ovantu vamo, have ya koAntiokia, hava utu okulonga ovaitaveli hava tyaa: “Andaa kaamu piti etanda ngahi tja popiwa moveta yaMoses, kaamu ulu okuhupithwa.”

² Paulus naBarnabas va li nombata onene novantu mboka mbava dhile koJudea. Hapa tokolwa okutya Paulus naBarnabas novaitaveli vamo womoAntiokia ngava ende koJerusalem va ka tompole otjipuka hehi pamo novayapostoli novanene veongalo.

³ Wo hiva dhi pokulekelwa keongalo, va yatakana moFoinikia nomoSamaria, va ka enda amava hipulula okutya ovapaani ve liteyulule, va itavele muKalunga. Ondaka hendji ya etela ovaitaveli avehe ehuluko.

⁴ Iya wo hive thiki moJerusalem, va yakulwa keongalo nokovayapostoli nokovanene veongalo. Ve ve hipululila ovipuka avihe Kalunga mbyee ve undapetha.

⁵ Ovafarisai vamo mbava ninga ovaitaveli, va popya hava tyaa: “Ovapaani mbava ila ovaitaveli mava tha okupita etanda, va heelwe okutya ngava takamethe oveta yaMoses.”

⁶ Ovayapostoli novanene veongalo va onganene okutompola otjipuka hehi.

⁷ Hive litetha ombata olule, Petrus wa kulama ha tyaa: “Vakwetu, n̯e mu tji i nawa okutya omatango omengi ngaa pita, Kalunga wa ntjolowola mokati ken̯i ndji ka teethele ovapaani ondaka ombwa, Kalunga hehi we tji ningila okutya va tyee, wo va itavele muKalunga.

⁸ Iya Kalunga, nguu iwa hitji li momutima womuntu, wa yulika okutya ovapaani we ve tambula, hiee ve pa Ombepo Ondhilikwa, ngant̯e wo hiee tu pa.

⁹ Kalunga hiee tu ningila, novapaani otjo e ve ningila. Mena lyeitavelo ndive na lyo, Kalunga we ve ithila po odhonkali dhawo.

¹⁰ Iya napano mamu yumanekethele tji Kalunga, himamu twike omutenge omudheu komapepe ovaitaveli? Omutenge mboka nt̯e nootateombwale katu u ulile oku u tjinda.

¹¹ Nt̯e atuhe twa itavela okutya matu ka hupithwa ket̯ilonkenda lyaMuhona Jesus, iya novapaani wo mbamava itavele mava ka hupithwa.”

¹² Owingi wovantu auhe wa nyima, hau teelele kuBarnabas naPaulus, himava hipulula ovilingatangan̯eko novilingakumithi mbyoka Kalunga mbyee ve undapetha mokati kovapaani.

¹³ Iya hiva mana okupopya, Jakob ha tyaa: “Vakwetu! Nteelela ndjen̯i!

¹⁴ Simon we tu thitululile Kalunga olutenga hiaa uta okulitaendhela omwene otjiwan̯a movapaani.

¹⁵ Odhondaka dhovaprofeti madhi i kumo motjipuka hehi, mena lyokutya mwa sonekwa hinyahi haku tiwaa:

¹⁶ ‘Aame Muhona, me ka tjuna kon̯ima yovipuka hembi, me ke ya okutungulula onganda yaDavid ndjaa han̯auka, iya ame me ya okutungulula ndji i imune po uke,

¹⁷ opo otjihupe tjovantu avehe va taendhe Muhona, novapaani avehe mbamba ithana, va ile ovantu vandje. Muhona otjo ma popi.

¹⁸ Muhona ovipuka hembi we vi ivithila ae ovakulu.’ ”

¹⁹ Jakob wa twikila okupopya ha tyaa: “Ame me lipula hinyahi okutya andaa ovapaani ve liteyulula, hava itavele muKalunga, hátu ve twike uke oudheu.

²⁰ Iya ngava sonekelwe vala omukanda, va heelwe okutya ngave litjaele ovikulya avihe vyovikalunga, háva li onyama yotjipuka hitja pondwa ne ombindhi, wo háva lala novantu.

²¹ Iya Moses u na ovateethi ve nalukulu movitungwalongo avihe, omisonekwa ngahi vi tangwa modhosinagoga Esabati alihe.”

Etokolo lyOtjoonganene

²² Ovayapostoli novanene veongalo neongalo alihe va tokola okuholowola ovalumentu vamo, have ve tumu koAntiokia pamo naPaulus naBarnabas. Va holowola Judas nguu tiwa Barsabas naSilas, mbava li ovanakomeho wovaitaveli,

²³ have ve pa omukanda mbwaa sonekwa hinyahi: “Nt̯e ovayapostoli novanene veongalo ovakwen̯i, matu mu menekele po n̯e amuhe ovaitaveli ovakwetu owomoAntiokia, nomoSiria nomoKilikia mbamwa dha moupaani.

²⁴ Nt̯e twa tyaa okutya ovantu vamo owomunt̯e ve mu pukitha, have mu ngwangwaneke nodhondaka dhawo ovene, iya nt̯e hant̯e twe ve tuma.

²⁵ Nt̯e atuhe twa ongana, hatu tokola okuholowola ovalumentu vamo tu ve tume kun̯e pamo novakwetu ovatumbalekwa Barnabas naPaulus,

²⁶ mbave liyambela omienyo vyawo mena lyotjilinga tjaMuhona wetu Jesus Kristus.

²⁷ Nt̯e napano matu mu tumine Judas naSilas mbamave ya oku mu hipululila nawa ovipuka hembi mbitwa soneka.

²⁸ Ombepo Ondhilikwa ye tu yulikila okutya ahamatu mu twike uke omutenge umo kakele vala kovipuka mbimavi landula hempa:

²⁹ Hámu li ovikulya vyombaveka, hámu li ombindhi ne onyama yotjipuka hitja pondwa, n̯e hámu lala novantu. Andaa mamu litjaele ovipuka hembi, mamu ningi nawa. Kalen̯i po nawa!”

³⁰ Odhontumwa dha lekelwa okudha koJerusalem, hive thiki moAntiokia, va onga ovaitaveli avehe, have ve pa omukanda.

³¹ Ovaitaveli hiva tanga omukanda, omitima vyawo vya li nehuluko enene mena lyondaka ombwa ndjee ve tendeleka.

³² Judas naSilas mboka mbava li ovaprofeti va popya otjingi okukoleka nokuvandhipaleka ovaitaveli.

³³ Judas naSilas va kala ko ovivike vimo, ovaitaveli ve ve lekela nawa va tjune kumbave ve tumine.

³⁴ [Iya Silas wa tokola okukala puwo.]

³⁵ Paulus naBarnabas va kala omatango moAntiokia, va li amava longo otjo mava teetha ondaka yaMuhona pamo novaitaveli ovakwawo.

Paulus naBarnabas mave liyapuka

³⁶ Kon̯ima yomatango Paulus wa heela Barnabas ha tyaa: “Ngatu ende tu ka valulile po ovakwetu kodhondolopa adhihe hutwa teethelele ondaka yaMuhona, nt̯e tu ka tale okutya ve li po vi.”

³⁷ Barnabas wa halele okutya va ende pamo naJohannes nguu tiwa oMarkus.

³⁸ Paulus kaa li ama hala va ende naMarkus, mena lyokutya we ve thiaa moPamfilia, ha anya okuundapa pamo nawo.

³⁹ Pa kala odhombata odhonene pokati kooPaulus naBarnabas, katee ve liyapuka. Barnabas wa ya naMarkus, hava londo mombapolo, hava i koKipros.

⁴⁰ Iya Paulus wa holowola Silas. Ovaitaveli hiva yandja Paulus met̯ilonkenda lyaMuhona, ha i.

⁴¹ Ye wa yatakana moSiria nomoKilikia ama pameke omaongalo.