Ovilinga 14 - Etestamende Epe Moludhimba

Paulus naBarnabas moIkonium

¹ Paulus naBarnabas va teetha mosinagoga yOvajuda moIkonium, ngahi va ningile moAntiokia. Ovajuda nOvagreka ovengi hava ningi ovaitaveli mena lyeteetho lyawo.

² Iya Ovajuda mbava anya okwiitavela, va longa ovapaani ovimama okutya va kondjethe ovaitaveli.

³ Paulus naBarnabas va ninga omatango moIkonium. Va teetha ondaka yaKalunga nouvandhi. Muhona Kalunga wa koleka odhondaka dhet̯ilonkenda lye, hiaa yandjele ovayapostoli okuundapa ovilingatangan̯eko novilingakumithi.

⁴ Ovantu womondolopa yaIkonium ve liyapukile pokati, vamo va ama kOvajuda, vamo hava ama kovayapostoli.

⁵ Ovapaani nOvajuda nodhosekulu dhawo va ongana pamo, hava panga ompango yokutatetha Paulus naBarnabas noyoku ve dhipaa nomawe.

⁶ Ovayapostoli hive tji mono mo, va ka inkolela koListra nokoDerbe odhondolopa dhomoLikaonia nokodhontyo dhotjilongo.

⁷ Kompuka hoka ovayapostoli va teethela ko ondaka ombwa.

Paulus naBarnabas moListra

⁸ MoListra mwa li amu na omulumentu ngwaa yumukwa otjilema tjodhompadhi, nokweenda nguha ende.

⁹ Omulumentu hengu otjilema wa li ama teelele Paulus hima popi. Paulus we mu tongolola, ha mono okutya omulumentu hengu wa itavele, ma ulu okuvelulwa.

¹⁰ Paulus wa ithana omulumentu otjilema ha tyaa: “Kulama nodhompadhi dhoye!” Omulumentu otjilema wa lomboka, ha utu okweenda.

¹¹ Owingi wovantu hiwa mono hitja ningwa kuPaulus, wa wololoka melaka lyOtjilikaonia hau tyaa: “Ookalunga ve ya kunt̯e molupe lwomuntu.”

¹² Ovantu va luka Barnabas ena Zeus, Paulus ngwaa li ama popi have mu luku Hermes.

¹³ Omuyambethi wotempeli yaZeus ndjaa li pondje yotjitungwalongo, wa eta odhontwedhi dhodhongombe nodhontemo pomuvelo wotjitungwalongo, mena lyokutya ye nowingi wovantu va li amava hala okuyamba ovayapostoli.

¹⁴ Iya ovayapostoli Paulus naBarnabas hive tji tee, va taula ovikutu vyawo, hava ka dhamukila mowingi wovantu, hava popi nondaka yopeulu hava tyaa:

¹⁵ “Valumentu n̯e, otjitji himamu ningi nyahoka? Nt̯e tuvantu ngan̯e! Nt̯e twe ya oku mu teethela ondaka ombwa okutya mu yethe ovipuka mbihavi na tjilinga, n̯e mu itavele muKalunga omunamwenyo, ngoka ngwaa uta eulu nohi nelunga nahitji li mo atjihe.

¹⁶ Lukulu Kalunga oviwan̯a we vi yethele vi ninge ngahi mavi hala.

¹⁷ Iya Kalunga u moneka okutya oko e li mena lyovipuka oviwa mbyaa undapa, Kalunga u mu lokethela ombula okudha keulu, u mu pa ompepela, u mu pa ovilya, he mu hulukithwa.”

¹⁸ Paulus naBarnabas nandaku tiwa va popya odhondaka ndhoka, va kala noudheu okutjaela owingi wovantu mboka mbava li amava hala oku ve yamba.

¹⁹ Ovanene vamo wOvajuda mbava dhile koAntiokia nokoIkonium, va longa ovantu ovimama, va kondjethe Paulus, ve mu tona nomawe, hava tya pamo wa t̯i, have mu kokololele kotjila tjotjitungwalongo.

²⁰ Ovaitaveli hive mu onganena, wa imuka po, ha tjuna motjitungwalongo. Komuhuka hikwa tji, Paulus naBarnabas hava i koDerbe.

Paulus naBarnabas mava tjuna koAntiokia motjilongo tjaSiria

²¹ Paulus naBarnabas va teetha ondaka ombwa mondolopa ndjoka yaDerbe, ovantu ovengi ve ve ninga ovaitaveli. Kon̯ima yanyahoka Paulus naBarnabas va tjuna uke koListra nokoIkonium nokoAntiokia motjit̯indwalongo tjaPisidia.

²² Paulus naBarnabas va vandhipaleka ovaitaveli va kambulithe eitavelo, hava tyaa: “Olutenga amatu hiti motjilongo tjaKalunga matu pitile momatatetho omengi.”

²³ Paulus naBarnabas eongalo alihe ve liholowolela ovanene veongalo. Wo ve litjaela ovikulya, hava kumbu kuKalunga, iya va yandja ovanene veongalo motjiho tjaMuhona, nguva itavela.

²⁴ Paulus naBarnabas va yatakana moPisidia, hava i koPamfilia.

²⁵ Va teetha ondaka ombwa moPerge, hava i koAtalia.

²⁶ Hiva dhi koAtalia va londa mombapolo, hava tjuna koAntiokia moSiria, eongalo hoka oko lya yandjelele Paulus naBarnabas met̯ilonkenda lyaKalunga, mena lyotjilinga soka hiva undapa.

²⁷ Paulus naBarnabas hive thiki koAntiokia va konga eongalo. Ve li hipululila ovipuka mbyoka Kalunga mbyee ve undapetha, okutya Kalunga wa yelulila ovapaani omuvelo, nawo va ninge ovaitaveli.

²⁸ Paulus naBarnabas okudha mpoka va kala oluvedhe olule moAntiokia pamo novaitaveli.