Ovilinga 13 - Etestamende Epe Moludhimba

Barnabas naSaulus va holowolwa hava tumwa

¹ Meongalo lyomoAntiokia mwa li ovaprofeti novalongethi, ngahi tji li Barnabas naSimeon (nguu tiwa Omundholodhi) naLukius Omukireni, naManaen (ngwaa kulila pamo nomutumini Herodes) naSaulus.

² Iya tainkolo va li amava undapele Muhona Kalunga, have litjaele ovikulya, Ombepo Ondhilikwa ye ve heela hai tyaa: “Ntjolowolela ndjen̯i Barnabas naSaulus, va ka undape otjilinga soka himbe ve ithanena.”

³ Iya ve litjaela ovikulya, hava kumbu, hava tendeke omawoko awo kuBarnabas naSaulus, have ve lekele.

Barnabas naSaulus mava teethele moKipros

⁴ Iya Barnabas naSaulus hiva tumwa kOmbepo Ondhilikwa, va ya koSeleukia, iya hoka va dha ko nombapolo, hava i kompanga yaKipros.

⁵ Iya wo hive thiki koSalamis, va teetha ondaka yaKalunga modhosinagoga dhOvajuda, wo va li naJohannes Markus, nguu ve popila.

⁶ Barnabas naSaulus va endaenda mompanga aihe katee moPafos, hoka huva vadha omulumentu umo Omujuda ompule, omuprofeti wovithithi nguu tiwa oBarjesus.

⁷ Ye wa li epanga lyomutumini wompanga, Sergius Paulus, ngwaa li omulumentu wodhondunge. Omutumini hengu wa ithana Barnabas naSaulus, ve ye kuye mena lyokutya wa li ama hala okutyaa odhondaka dhaKalunga.

⁸ Ompule hendji Elimas (Elimas ena lye mOtjigreka) ya t̯ila Barnabas naSaulus onki, hai kondjo okutjaela omutumini okutya ahama itavele muKalunga.

⁹ Saulus, ngoka nguu tiwa wo oPaulus, we yulithwa Ombepo Ondhilikwa, ha tongolola Elimas

¹⁰ ha tyaa: “Ove undele yaSatana, undjedhi yovipuka avihe oviwa! Ove we yula ovineya ovivi, iya apehe u lola okupilulula otjatjili tjaMuhona, tji ninge ovithithi!

¹¹ Iya napano Muhona me ku pa ombedhi, mo twika, koo ka mona etango katee ketango ndimali tuwa po kuKalunga.” Okudha mpoka omeho e a t̯imikwa ket̯iku, iya we likondauluka, otjo ma taendha ngume mu kambula mokuwoko.

¹² Omutumini hiaa mono soka hitja ningwa, wa itavela. Iya he kuminwa elongo lyaMuhona.

Paulus ma teetha moAntiokia motjilongo tjomoPisidia

¹³ Paulus novakwawo mbava li pamo naye, koPafos va dha ko nombapolo, have ya koPerge motjilongo tjomoPamfilia. Iya Johannes Markus hoka oko a thiaa ovakwawo, ha tjuna koJerusalem.

¹⁴ Iya wo va dha moPerge hava i koAntiokia motjilongo tjomoPisidia, metango lyEsabati va ya mosinagoga, hava kala pohi, hava teelele.

¹⁵ Iya kon̯ima yokutanga oveta yaMoses nomambo ovaprofeti, ovatumini wosinagoga va tuma ko omuntu kooBarnabas naSaulus hava tyaa: “Onwe, andaa mu na po epukululo lyatja ndimali popile ovantu, alikana popyen̯i vala.”

¹⁶ Iya Paulus wa kulama, he ve nyimitha nokuwoko ha tyaa: “Vaisraeli vakwetu novapaani amuhe mbamu tila Kalunga, nteelela ndjen̯i!

¹⁷ Kalunga kOvaisraeli wa holowola ootateombwale, we ve ninga otjiwan̯a otjinene, tainkolo va li odhongendi motjilongo tjaEgipiti. Kalunga we ve dhilula mo moEgipiti kodhonkono dhe odhonene.

¹⁸ Iya Kalunga we likambulithila onkalo yawo oule wodhombula omilongo vine mokuti.

¹⁹ Iya ye wa han̯auna po oviwan̯a epanduvali mbyaa vadhelwe moKanana, notjilongo tjawo we tji pinganetha ovantu ve Ovaisraeli.

²⁰ Ovipuka avihe hembi vya kala oule wodhombula omathele ane nomilongo vitano. “Iya kon̯ima yanyahoka Kalunga we ve pa odhohongodhi katee motembu yomuprofeti Samuel.

²¹ Okudha mpoka ovantu va kumba va pewe ohamba. Iya Kalunga we ve pa Saul, munkwaKis, owomeanda lyaBenjamin, a ninge ohamba yawo. Saul wa tumina oule wodhombula omilongo vine.

²² Iya Kalunga hiaa itha ko Saul kotjipundi tjouhamba, polukalo lwe wa twaa po David, a ninge ohamba yawo. Kalunga wa popya onteto yaDavid ha tyaa: ‘Ame mba mono okutya David, munkwaIsai, oye e li omulumentu ngoka nguma ka hwithila po atjihe soka hime hala e tji ninge, oye mba hopo.’

²³ Jesus ontekulona yaDavid, Kalunga ngahi a udhikile, oye a twaa po a kale Omuhupithi wotjiwan̯a tjaIsrael.

²⁴ Iya tainkolo Jesus aheya uta otjilinga tje, Johannes wa teethela ovantu avehe moIsrael okutya ngave liteyulule, wo va tjatjwe.

²⁵ Iya Johannes hiaa li popedhi nokumana otjilinga tje, we ve pula ha tyaa: ‘N̯e himamu lipula mamu tya aame an̯i? Ame haame ngoka ngumu kevelela. Iya ngoka ngume ke ya kon̯ima yandje, ame híme tji ulu nangahi tji li okukutulula omivya vyodhongaku dhe.’

²⁶ “Valumentu vakwetu, luyumuko lwaAbraham, nan̯e ovatilikalunga amuhe, twa tuminwa ondaka yehupitho hendji.

²⁷ Ovantu womoJerusalem novatumini vawo kave ivilwe okutya Jesus oye e li an̯i. Iya wo kava teele nawa odhondaka dhovaprofeti ndhii tangwa mEsabati alihe. Iya wo va koya Jesus ngahi tja popiwa kovaprofeti.

²⁸ Iya wo nandaku tiwa kava mwene mo ombedhi muye yoku mu koyela et̯o, iya wo va kumba Pilatus, e mu yandje, a dhipawe.

²⁹ Hiva dhi pokuninga ovipuka avihe, ngahi a popiwa momisonekwa, ve mu itha ko komutjaakano, have mu paka mombila.

³⁰ Iya Kalunga we mu imuna kout̯e!

³¹ Omatango omengi Jesus wa kala ame liholololele ovantu mboka nahi mbava enda naye okudha koGalilea katee koJerusalem. Iya ovantu mboka owo ve li odhombangi dhe mokati kotjiwan̯a tjaIsrael.

³² Nt̯e matu mu heele ondaka ombwa, okutya Kalunga hiaa udhikila ootateombwale,

³³ we tji hwithila po nt̯e odhontekulona dhawo, hiaa imuna Jesus kout̯e, ngahi tja sonekwa mEpisalomi etyavali himamu tiwaa: ‘Oove omunwandje, iya ndino ame mba ile Iho.’

³⁴ Kalunga wa imuna Jesus kout̯e, iya nolutu lwe ke lu yethele lu wole. Iya otjatjili, Kalunga ngahi a popya ha tyaa: ‘Ame me ke mu pa omaudhiko omadhilikwa, omaudhiko otjiwa tjelao, ngahi mba udhikila David.’

³⁵ Iya Episalomi ekwawo mali tyaa: ‘Ove koo yetha olutu lwomudhilikwa woye lu wole.’

³⁶ Iya David hiaa li nomwenyo wa undapa ngahi tja li atji hala Kalunga. Iya hiaa t̯i wa pakwa powoiheombwale, nolutu lwe lwa wolela mombila.

³⁷ Iya Kalunga wa imuna Jesus kout̯e, nolutu lwe kalu wolele.

³⁸ Iya vakwetu, kalen̯i amu tji i amuhe okutya Jesus ngumwa teethelwa, ma itha po odhonkali dhen̯i! Oveta yaMoses kaai ulu oku mu kutulula kodhonkali dhen̯i.

³⁹ Iya tji iwen̯i okutya auhe ngoka nguma itavele muJesus, ma ithilwa po odhonkali dhe adhihe.

⁴⁰ Iya lungamen̯i okutya soka hitja popiwa kovaprofeti ahamatji mu vadha, hiva tyaa:

⁴¹ ‘Teelelen̯i, n̯e mboka mbamwa tomba odhondaka dhaKalunga! Kumwen̯i, n̯e mu han̯auke po, mena lyokutya hehi hime ningi ndino hendi, kaamu tji itavele nandapa kala omuntu ngume mu thitululile tjo!’ ”

⁴² Paulus naBarnabas tainkolo va li amava piti mosinagoga, ovantu ve ve kumba okutya mEsabati ndimali ya ngave ye, ve ve teethele uke ovipuka hembi.

⁴³ Ovantu hive liyapauka, Ovajuda ovengi novapaani ovengi mbava undapela Kalunga mbave lininga Ovajuda, va landula Paulus naBarnabas. Iya Paulus naBarnabas ve ve teethela, have ve ilikin̯a, va kale ave liun̯ika met̯ilonkenda lyaKalunga.

⁴⁴ Iya mEsabati ndyaa landula ko, auhe owomotjitungwalongo we ya okuteelela odhondaka dhaKalunga.

⁴⁵ Iya Ovajuda hiva mono owingi wovantu himau ya kuPaulus, va uta oku ve t̯ila onki. Va penya, hava kondjetha ovipuka Paulus mbyaa popya.

⁴⁶ Iya Paulus naBarnabas va popya nouvandhi hava tyaa: “Nt̯e olutenga tainkolo hátuya teethela ovantu vamo, on̯e twa thele okuteethela ondaka hendji yaKalunga. Iya n̯e kamu i tambulile. Hehi matji tya, n̯e mwe limona okutya kamu thevelwe okuya momwenyo waapehe. Iya nt̯e napano matu ka teethela ovapaani.

⁴⁷ Hehi Muhona otjo e tu heela hiaa tyaa: ‘Ame mbe ku ninga otjiten̯i tjovapaani, u twale ehupitho mouye auhe.’ ”

⁴⁸ Iya ovapaani hive tji tee, ve hulukwa, hava tumbaleke odhondaka dhaKalunga, mboka Kalunga mbaa holowolela omwenyo waapehe va ninga ovaitaveli.

⁴⁹ Iya odhondaka dhaMuhona dha handjana notjilongo atjihe.

⁵⁰ Ovanene wOvajuda va ya kovalumentu mbava tumbala motjitungwalongo moka nokovakadhintu mbava tumbala, mbava undapela Kalunga. Ve ve longa ovimama okutya ahamava itavele mooPaulus naBarnabas, hava utu oku ve kondjetha, nopotjilongo mpoka have ve lamba po.

⁵¹ Paulus naBarnabas ve ve pupulila ombuma yokodhompadhi dhawo, wo hava i koIkonium.

⁵² Iya ovaitaveli womoAntiokia va li ave hulukwa unene, have yulithwa Ombepo Ondhilikwa.