Ovilinga 11 - Etestamende Epe Moludhimba

Petrus ma hipululile eongalo lyomoJerusalem

¹ Ovayapostoli novaitaveli mbava li moJudea atjihe, va tyaa okutya ovapaani nawo va itavela odhondaka dhaKalunga.

² Petrus hiee ya moJerusalem, Ovajuda mbava li amava hala ovapaani va pite etanda, ve mu vela ombedhi,

³ hava tyaa: “Ove we thikila ponganda yovapaani mbahava pitile etanda, ove ho li pamo nawo.”

⁴ Petrus wa uta oku ve hipululila ovipuka avihe, ngahi vya enda okudha pomautilo, ha tyaa:

⁵ “Ame himba li mondolopa yaJoppe, ame kumbu, mba mona emoneko. Mba mona eulu alye liyapuka, hamu dhi otjipuka himatji ngala otjitopa otjinene, hitja t̯itwa kodhontyo dhatjo ne, hatji thothonokethelwa pwaame.

⁶ Iya himba tala mo nawa, mba mona mo ovipuka mbii na omwenyo, mbii na omakulu ane vyopovantu novyomokuti, nambii kokoloka komadhimo, novidhila.

⁷ Ame mba tyaa elaka, ndimali popi naame, hali tyaa: ‘Petrus, kulama u dhipae ovipuka mbyoka, u lye.’

⁸ Iya ame mbe mu yaka he tyaa: ‘Aai Muhona, ame nkee mba dhile, hí na mpamba lile otjipuka hihatji kohokele.’

⁹ Iya ondaka ya dha meulu hai mpopitha otjikando otjityavali hai tyaa: ‘Atjihe soka Kalunga hiaa dhilika, ove koo ulu okutya katji kohokele.’

¹⁰ Otjipuka hehi tainkolo hátjiya tjun̯wa uke meulu tja ningwa ovikando vitatu.

¹¹ Iya mowola yatjo tuu ndjoka koKesarea kwa dha ovalumentu vatatu mbava tuminwe kwaame, have ya pondjuwo mpamba li.

¹² Ombepo Ondhilikwa ya ntjeela okutya hé limbililwa, nge ende dhiva pamo nawo. Iya ovakwetu hemba epandu, va ya wo pamo naame koKesarea, hatu i monganda yaKornelius.

¹³ Kornelius we tu heela okutya wa mona omweengeli, ngwaa kulamene pondjuwo ye, omweengeli we mu heele ha tyaa: ‘Tuma omuntu koJoppe, a ka ete omulumentu nguu tiwa oSimon Petrus.

¹⁴ Petrus me ku heele ondaka ndjimai ku hupitha pamo nonganda yoye aihe.’

¹⁵ Ame ngahi mba utu okupopya, Ombepo Ondhilikwa ye ya kuwo ngahi ye ya kunt̯e pomautilo.

¹⁶ Iya ame mba thipaluka odhondaka dhaMuhona hiaa popile ha tyaa: ‘Johannes wa tjatja nomeva, iya n̯e mamu ka tjatjwa nOmbepo Ondhilikwa.’

¹⁷ Iya Kalunga andaa we ve pa vala otjali hitji lithike ngant̯e hiee tu pa, mbatwa itavela muMuhona Jesus Kristus, ame aame an̯i ngumba thele okukondjetha Kalunga?”

¹⁸ Iya wo hiva tee odhondaka hendhi, kave na uke hiva popya, va hivilika Kalunga hava tyaa: “Kalunga wa yandja oluvedhe kovapaani, ve liteyulule, opo va kale nomwenyo.”

Eongalo lyomoAntiokia

¹⁹ Omatatetho ngaa uta, okudha Stefanus hiaa dhipawa, a handjaneka ovaitaveli. Vamo va ya katee koFoinikia nokoKipros nokoAntiokia, amava teetha ondaka ombwa, ve i teethele vala Ovajuda aveika.

²⁰ Iya ovaitaveli vamo ovalumentu mbava dhile koKipros nokoKireni, ve ya koAntiokia, hava ka teethela ovapaani ondaka ombwa okutya Jesus oye e li Muhona.

²¹ Odhonkono dhaMuhona dha li pamo novaitaveli, ovantu ovengi ve liteyulula, hava itavele muMuhona.

²² Ovipuka mbyaa ningwa moAntiokia, hivya teeka momakutwi eongalo lyomuJerusalem, lya tuma ko Barnabas.

²³ Iya ye hiee thiki koAntiokia, wa li nehuluko, hiaa mona ovilinga vyonkenda, Kalunga mbyaa undapa mokati kovantu. Barnabas we ve ilikin̯a okutya va kale puMuhona nomitima vyawo avihe.

²⁴ Barnabas wa li omulumentu omuwa weitavelo, ngwee yulithilwe Ombepo Ondhilikwa. Ovantu ovengi va ninga ovaitaveli vaMuhona.

²⁵ Iya Barnabas wa ya koTarso oku ka taendha Saulus.

²⁶ Iya hiee mu mono, we mu eta koAntiokia. Barnabas naSaulus va kala pamo meongalo ombula imo, meongalo moka va longa mo ovantu ovengi. MoAntiokia ovaitaveli omo va uta okulukwa ovakriste.

²⁷ Iya pomatango atjo ngoka, kwa dha ovaprofeti vamo koJerusalem, hava i koAntiokia.

²⁸ Iya Agabus umo owomovaprofeti mboka wa kulama, mepopilo lyOmbepo Ondhilikwa wa popya okutya mouye auhe mamu ke ya ondjala onene. Iya ondjala yatjo ndjoka, ya ningwa potembu ndjoka Klaudius hiaa li omukesari moRoma.

²⁹ Ovaitaveli moAntiokia va tokola okutya auhe nga yandje hiee na tjo ngahi ma ulu, tjo tji tuminwe ovaitaveli vakwawo mbave li koJudea.

³⁰ Ovaitaveli va onga oviyandjwa, havi yandjwa kooBarnabas naSaulus, ve vi twale kovanene veongalo koJerusalem.