Ovaroma 9 - Etestamende Epe Moludhimba

Kalunga novantu ve

¹ Ame ndjimuntu waKristus me popi otjatjili, híme kembe. Elityoo lyandje mali mpopile okutya híme kembe, mena lyokutya mali viyulwa kOmbepo Ondhilikwa.

² Ndji na oudheu ounene momutima noviihamo mbihamavi polo.

³ Ame omwene mbe tje hala okutya ndji thingwe kuKalunga, ame ndji yapulwe ko kuKristus mena lyovakwetu, omuhoko wandje,

⁴ mbave li Ovaisraeli. Kalunga we ve ninga ovana, ye he ve pa etumbalo, ewaneneno, oveta, eundapelokalunga nomaudhiko.

⁵ Mowoiheombwale omo mwa dha Kristus, hiaa yumukwa mountu. Kalunga, Omutuminiwaavihe, nga tumbalekwe apehe katee apehe! Amen.

⁶ Iya hakutya odhondaka dhaKalunga dha puka ngaile, mena lyokutya havantu avehe womoIsrael ve li Ovaisraeli.

⁷ Oluyumuko lwaAbraham halo aluhe lu li odhondele, Kalunga mbaa udhikila Abraham. Kalunga wa heela Abraham ha tyaa: “Oluyumuko lwoye malu ka dha muIsak.”

⁸ Hehi matji tya odhondele mbava yumukwa mountu, hawo ve li odhondele dha Kalunga, iya odhondele dhaKalunga ombava yumukwa meudhiko lyaKalunga, owo mava tiwa ovana.

⁹ Iya ondaka yeudhiko lyaKalunga mai tyaa: “Me ka tjuna ombula ndjimai ya poluvedhe ngahendu, me ka vadha Sara ae na ondele omudhantu.”

¹⁰ Hehi hatjo vala atjiika, iya naRebeka wa yumuka wo epaha ovadhantu, ihe wa li tateombwale Isak.

¹¹ Tainkolo epaha háliya yumukwa ne háliya undapa ouwa ne ouvi, eholowolo lyaumo opo li kale nawanawa, hamena lyovilinga, iya olyanguma ithana.

¹² Kalunga omwene wa heela Rebeka ha tyaa: “Omunoye omunene watjo ma ka undapela omunitje,”

¹³ omusonekwa ngahi mau tyaa: “Ame ndji hole Jakob, ndji yele Esau.”

¹⁴ Iya ngatu tye vi? Ngatu tye Kalunga ke na tja ouvyuuki? Hatjo nokanunu!

¹⁵ Iya Kalunga wa heela Moses ha tyaa: “Me t̯ile onkenda ngume hala okut̯ila onkenda, me etele olweembya ngume hala okweetela olweembya.”

¹⁶ Iya kaatji ningwa mena lyehalo ne lyovilinga vyomuntu, iya matji ningwa mena lyolweembya lwaKalunga.

¹⁷ Omusonekwa mau heele Farao amau tyaa: “Mbe ku yela peulu, ndji yulike mwoove odhonkono dhandje, nena lyandje li teethelwe mouye auhe.”

¹⁸ Iya Kalunga ma t̯ile onkenda nguma hala okut̯ila onkenda, ha kukutike nguma hala okukukutika.

Oluyuma nonkenda yaKalunga

¹⁹ Umo owomun̯e ma mpula ama tyaa: “Iya omena lyatji Kalunga me tu pa ombedhi? Iya aan̯i nguma ulu okukondjetha ehalo lyaKalunga?”

²⁰ Oove aan̯i mukwetu ngumo hala okuyaka Kalunga? Ombiya yoluma kaai ulu okupula ngwee i ma, hai tyaa: “Omena lyatji wa ndinga hinyahi?”

²¹ Nguu ma odhombiya ke na tja odhonkono okuma odhombiya dhimo ndhaa tumbala nadhimo ndhihadhi tumbalele?

²² Iya Kalunga otjo a ninga nyahoka. Ye wa li ama hala okuhololola oluyuma lwe nokuyulika odhonkono dhe, iya we likambulithila unene ovantu mboka mbava thele okuyumanekwa nokuhan̯aunwa po,

²³ opo a ule okuhololola ouhona wetumbalo lye, kumboka mbava t̯ilwa onkenda, mbava longekedhelwa ae lukulu etumbalo,

²⁴ nant̯e wo hemba mbaa ithana, hamOvajuda vala aveika, iya nomovapaani wo.

²⁵ Iya membo lyaHosea ma popi ama tyaa: “Ovantu mboka mbahave thi ovandje, me ke ve ithana ‘ovantu vandje’. Otjiwan̯a soka himba li ahe hole, me ke tji ithana ‘Otjihivilikwa tjandje’.

²⁶ Pomaluvedhe mpoka mpava tiwaa: ‘Kamuvantu vandje’ mpoka yatjo mava ka ithanwa odhondele dhaKalunga omunamwenyo.”

²⁷ Iya Jesaja wa wololokela Israel ha tyaa: “Ovaisraeli nandaku tiwa ovengi, ve lithike peheke lyokontyo yelunga, mokati kawo mbamava ka hupithwa ovanunu vala.

²⁸ Iya Muhona ma ka hwithila po ondaka ye kombanda yohi, me ke i hwithila po motjikando tjimo.”

²⁹ Hehi Jesaja otjo a popya lukulu ha tyaa: “Ngaile Muhona Sebaot ke tu thiilile po omaluyumuko, ngai twa ila Sodom, hatu ningwa ngaGomorra.”

Ovaisraeli nondaka ombwa

³⁰ Iya ngatu tye vi? Ovapaani kava kondjele okulitwaa pouvyuuki, iya ouvyuuki mbuva pewa owomeitavelo.

³¹ Ovaisraeli mbava kondja okulitanta noveta va ninge ovavyuuki, va anyenwa.

³² Omena lyatji? Omena lyokutya kava kondjele okupitila meitavelo, iya va kondja okupitila movilinga. Iya ve liputala mewe lyokuputaletha.

³³ Ngahi kwa sonekwa haku tiwaa: “Taa tuutuu, ame me twaa moSion ewe lyokuputaletha noluwaa lwoku ve withitha. Iya nguma itavele muye, kaa ka t̯ithwa ohon̯i.”